கழிவு நீரை குடி நீராக பருகும் மக்கள்

கழிவு நீரை குடி நீராக பருகும் மக்கள் திருப்பாலைக்குடியின் அவலம்

ஆர்.எஸ்.மங்கலம்: கழிவு நீரை குடித்து அவதியடைந்து வரும் திருப்பாலைக்குடி கிராமத்தினரின் அவலத்துக்கு தீர்வளிக்க யாரும் முன்வராதது வேதனக்குறியதாகும்.ஆர்.எஸ்.மங்கலம் அருகே உள்ளது திருப்பாலைக்குடி . இங்குள்ள தல்லாகுளம் ஊரணியே பழங்கோட்டை, தேவர்குடியிருப்பு, திருப்பாலைக்குடி, காந்திநகர், மந்தநார்கோயில், முருகானந்தபுரம் பகுதிகளின் குடிநீர் ஆதாரமாக உள்ளது. இருந்தும் அதை பாதுகாக்க தேவையான நடவடிக்கைகள் மேற்கொள்ளாததால் கால்நடை புழகத்துக்கு ஊரணி மாறிஉள்ளது.


நெடுஞ்சாலையின் ஓரம் இருப்பதால் அவ்வழியே செல்வோர் குளித்தும், கழிவுகளை கொட்டியும் நீர் ஆதாரத்தை கெடுத்து வருகின்றனர். வேறு வழியின்றி கிராம மக்களும் தல்லாகுளம் ஊரணி நீரையே அள்ளி குடித்து வருகின்றனர். மக்கள் பிரதிநிதிகள் வரும் போதெல்லாம் தேர்தல் வாக்குறுதிக்காக இந்த ஊரணியை பயன்படுத்திய அளவுக்கு இங்குள்ள கிராம மக்களே பயன்படுத்தி இருக்கமாட்டார்கள்.


இருந்தும் இதனால் பயன் என்ன? தலைமுறைகளை கடந்தும் தாகம் தீர்ப்பதற்காக கழிவுநீரை குடித்து வாழும் அவல நிலை தான் தொடர்கிறது. இதனால் இங்குள்ள குழந்தைகள் அடிக்கடி உடல் நலம் பாதிக்கப்படுவதும் தொடர்கிறது. கேட்க நாதியின்றி தவித்து வரும் கிராமத்தினர் சிலரின் குமுறல்கள்: செல்வி: எனக்கு விபரம் தெரிந்த நாளில் இருந்து குடிநீர் தட்டுப்பாடு உள்ளது. இரண்டு ஆண்டுகளுக்கு முன்பு இரண்டு ரூபாய்க்கு விற்ற குடிநீர் தற்போது ன்கு ரூபாய் ஆகிவிட்டது. அதுவும் மூன்று நாட்களுக்கு ஒரு முறை தான் வருகிறது.


வினோதா: எனது கணவர் தினம் 50 ரூபாய் மட்டுமே சம்பாதிக்கிறார். இந்நிலையில் பணம் கொடுத்து குடிநீர் வாங்கும் திறன் இல்லை. ஊரணியில் தேங்கும் கழிவுநீரை குடித்து தான் பிழப்பை நடத்துகிறோம்.சுபகான்பீவி: தேர்தல் நேரத்தில் ஒரு பேச்சும் முடிந்ததும் மறுபேச்சும் பேசும் அதிகாரிகளால் தொடர்ந்து வஞ்சிக்கப் பட்டு வருகிறோம். எங்கள் குழந்தைகளுக்கும் இதே நிலை தொடருவதால் அச்சம் அடைந்துள்ளோம்.ஜமாலியா பேகம்: ஊரணியை பொறுத்தவரை சுத்தமான நீர் தான். இவ்வழியாக செல்பவர்களால் அது கழிவுநிராக மாற்றப் பட்டுவிட்டது. நெருங்க கூடமுடியாத நிலையில் நாற்றம் இருந்தும் அதை குடிக்கும் நிலைதான் உள்ளது.பசூருல் ஹக்: ஊரணியை செப்பனிடவும் , முள்வேலி அமைக்கவும் பலமுறை கோரியும் நடவடிக்கை இல்லை. இதே நிலை தொடர்ந் தால் குடிநீரே எங்களுக்கு விஷமாய் மாறி விடும்.


ஊராட்சி தலைவர் செல்வமணி கூறுகையில்,"" காந்திநகர் பகுதியில் மட்டுமே குடிநீர் வசதி இல்லை. இங்கு ஊராட்சி மூலம் குடிநீர் வசதி செய்து தரும் முயற்சிகள் மேற்கொள்ளப்பட்டு வருகிறது''என்றார்.


இடைத்தேர்தலுக்காக மொபைல் பம்பு...: இளையான்குடி இடைத்தேர்தலின் போது இங்குள்ள ஓட்டுகளை அள்ளுவதற்காக மொபைல் பம்பு மூலம் குடிநீர் வினியோகம் செய்யப்பட்டுள்ளது. ஓட்டு எண்ணிக்கை நடந்து கொண்டிருந்த போதே அந்த இணைப்பு துண்டிக்கப்பட்டதாம். பின்பு என்ன வழக்கம் போல மீண்டும் தல்லாகுளம் ஊரணி நீரை சேகரித்து வீடுகளில் ""தேய்த்தான் விதையை'' பயன்படுத்தி தெளிய வைக்கும் வேலையை குடும்பத்தலைவிகள் செய்து கொண்டிருக்கின்றனர். இந்த பிரச்னைகளுக்கு எப்போது தீர்வு கிடைக்கும் என்பது அரசுக்கே வெளிச்சம்.