உன்னால் முடியும் தம்பி

கணக்குப் பாடம் நடத்தி முடித்ததும், "பாடம் புரிந்ததா?'' என ஆசிரியர் கேட்க, அனைத்து மாணவ-மாணவிகளும் புரிந்தது என்பதாகத் தலையசைத்து தங்கள் பதிலைத் தெரிவித்தனர். ஆனால், மாரிமுத்து மட்டும் ஒப்புக்காகத் தலை அசைத்ததையும், அவனுக்குப் பாடம் புரியவில்லை என்பதையும் ஆசிரியர் தெரிந்து கொண்டார். ஒவ்வொரு தேர்விலும் அவன் கணிதத்தில் மிகக்குறைந்த மதிப்பெண் வாங்கியதோடு, மற்ற பாடங்களிலும் அவ்வளவாக மதிப்பெண்கள் எடுக்கவில்லை.

மாரிமுத்து கிராமத்தைச் சேர்ந்த மாணவன் என்பதால், அவனைத் தனியாக அழைத்து விவரம் கேட்டார். அவன் `ஓ...'வென அழுதான்.

"அய்யா, எனக்கு எதுவுமே புரியவில்லை. படித்தாலும் விளங்கவில்லை. அதுவும் கணிதம் எனக்கு மிகவும் கடினமாக இருக்கிறது'' என்று கூறி மீண்டும் அழுதான்.

அவனை தேற்றியவர், "உன்னிலும் தவறு இருக்கிறது. நீ முந்தைய ஆண்டுகளில் கவனம் செலுத்தி பாடங்களைப் படிக்கவில்லை. அப்படி நீ படித்து புரியாதிருந்தால், உடனே ஆசிரியரிடம் கேட்டு விளக்கம் பெற்றிருக்க வேண்டும். அதிலும் நீ உன் கடமையை சரியாகச் செய்யவில்லை. இப்போது உனக்குத் தேவை தன்னம்பிக்கையும், லட்சியத்தை அடைய வேண்டும் என்ற பிடிப்புமே. அது வந்துவிட்டால் நீ தேர்வில் வெற்றி பெறுவது உறுதி. கவலைப்படாதே! குறிக்கோளில் எப்போதும் கண்ணும், கருத்துமாக இருந்து படி. நல்ல முடிவு தானாகவே கிடைக்கும்'' என்றார் ஆசிரியர்.

சில நாட்கள் சென்றன. அன்று ஆசிரி யரின் மகனுக்குப் பிறந்தநாள். தன்னுடைய வகுப்பிலுள்ள அனைத்து மாணவ-மாணவி களையும் வீட்டுக்கு அழைத்திருந்தார். மாரி முத்துவும் வந்திருந்தான். ஆசிரியர் ஒரு பெரிய அடுக்கு மாடியின் இரண்டாவது தளத்தில் குடி இருந்தார். விருந்து முடிந் ததும் பால்கனியில் அனைவரும் நின்று வேடிக்கை பார்த்துக் கொண்டிருந்தபோது ஆசிரியர் அங்கு வந்தர். ஒரு இடத்தில் நிறைய எறும்புக் கூட்டம் அங்கு சிந்தி யிருந்த இனிப்புப் பதார்த்தங்களை ருசித்துக் கொண்டிருந்தது.

"சார், இங்கு மொய்க்கும் எறும்புகளை அப்புறப்படுத்தலாமா?'' என்று சில மாணவர்கள் கேட்கவும், ஆசிரியர் யோசித்தார். இதுதான் நல்ல சந்தர்ப்பம் என்று உணர்ந்து மாரிமுத்துவை அழைத்தார்.

"இங்கே பார், நான் இருப்பது இரண்டாவது தளம். இந்த எறும்புகள் இனிப்பை மோப்பம் பிடித்து எப்படி மண்ணில் இருந்து இரண்டு தளம் ஏறி வந்திருக்கின்றன என்பதைக் கவனி. அதன் லட்சியம் இனிப்பை உண்பது. அதற்கு மோப்ப சக்தி இறைவன் கொடுத்த வரம். அதை வைத்து இனிப்பு இருக்கும் இடத்தை கண்டு பிடித்து, இரண்டு மாடிகள் விடாமுயற்சியுடன் ஏறி தன் இலக்கான இனிப்பை ரசித்து, ருசித்து உண்கின்றன.

அதேபோல் நமக்கு ஆண்டவன் கொடுத்த வரம், பகுத்து அறியும் மூளை. ஒரு சாதாரண சிறு எறும்பால் செய்ய முடிவதை ஆறறிவு படைத்த உன்னால் ஏன் செய்ய முடியாது? முயற்சி இருந்தால் மனிதன் எதையும் சாதிக்கலாம் அல்லவா! அதனால் மனம் தளராதே. குறிக்கோளை எட்டும் வரை விடாமுயற்சியுடன் இந்த சிறு எறும்பைப்போல் கடினமாக உழைத்து போராடு. அதற்கு இனிப்பு கிடைத்தது போல் உனக்கும் வெற்றி உறுதியாய் கிடைக்கும்'' என்றார் ஆசிரியர்.

மாரிமுத்துவின் மனதில் தன்னம்பிகை பிறந்தது. விடாமுயற்சியுடன் படித்தான். பாடங்களில் ஏற்படும் சந்தேகங்களை ஆசிரியர்களிடம் கேட்டு விளக்கம் பெற்றான். சில மாதங்களுக்குப் பிறகு நன்றாகப் படிக்கக்கூடிய மாணவர்களின் பட்டியலில் மாரிமுத்துவின் பெயரும் இடம்பெற்றது.

ஜி. சுப்பிரமணியன்

பகிர்ந்தமைக்கு நன்றி தல