ஜெயலலிதா ஓய்வு எடுக்கிறாரா?: அன்பழகன் கருத்துக்கு அதிமுக கடும் எதிர்ப்பு

**சிவா** · **சிவா** Fri Feb 11, 2011 3:09 pm

சென்னை, பிப். 10: ஜெயலலிதா ஓய்வு எடுத்துக் கொண்டிருப்பதாக நிதியமைச்சர் க. அன்பழகன் தெரிவித்த கருத்துக்கு அதிமுகவினர் கடும் எதிர்ப்புத் தெரிவித்தனர். அவைக் குறிப்பில் இருந்து அந்த வாசகங்களை நீக்கக் கோரி கோஷங்களை எழுப்பினர்.

இந்த கோரிக்கை மறுக்கப்படவே, அதிமுக உறுப்பினர்கள் பேரவையிலிருந்து வியாழக்கிழமை வெளிநடப்புச் செய்தனர்.

சட்டப் பேரவையில் இடைக்கால நிதிநிலை அறிக்கை மீதான விவாதத்துக்கு நிதியமைச்சர் க. அன்பழகன் வியாழக்கிழமை பதிலளித்தார். அப்போது நடைபெற்ற விவாதம்:

க.அன்பழகன்: எதிர்க்கட்சி துணைத் தலைவர் தனது பேச்சை வழிபாட்டில் தொடங்கி கோரஸில் முடிப்பது வழக்கமான ஒன்று. அடுத்து அமைய உள்ள பேரவையில் திமுக எதிர்க்கட்சி வரிசையிலும், ஜெயலலிதா முதல்வர் இருக்கையிலும் அமர்வார் என்று கூறி தனது ஆசையுடன் பேச்சை முடித்திருக்கிறார். ஓய்வு எடுத்துக் கொண்டிருப்பவர் முதல்வராக வர வேண்டும் என ஆசைப்படுகின்றனர்.

(இதற்கு அதிமுகவினர் கடும் எதிர்ப்பு தெரிவித்து கூச்சல் எழுப்பினர்.)

ஜெயலலிதாவுக்கு உடல் நலம் சரியில்லாத காரணத்தால் அவருக்கு பூரண ஓய்வு தேவை என்று அவையில் நிறைவேற்றிய தீர்மானத்தை வைத்துத்தான் சொன்னேன். தீர்மானத்தில் வாசகம் இல்லாவிட்டால் எனது வாசகத்தை திரும்பப் பெற்றுக் கொள்கிறேன்.

(அன்பழகனின் பேச்சுக்கு அதிமுகவினர் தொடர்ந்து எதிர்ப்பு தெரிவித்து கூச்சல் போட்டனர்.)

பேரவைத் தலைவர் இரா.ஆவுடையப்பன்: தீர்மானத்தில் கூறப்பட்டுள்ள வாசகத்தைத்தான் கூறியுள்ளார். அதில் தவறில்லை.

அமைச்சர் துரைமுருகன்: அதிமுகவினர் பேசும் போது காரசாரமாகப் பேசினார்கள். திமுக ஆட்சியை ரௌடிகள் ஆட்சி எனக் கூறினர். அமைதியாக இருந்தோம். அவர்களது தலைவர் ஓய்வு எடுக்கிறார் எனக் கூறுவது தவறா? அது பேரவைக்கு உகந்த வார்த்தைதான்.

(அதிமுகவினர் தொடர்ந்து எதிர்ப்புத் தெரிவித்துக் கொண்டிருந்தனர்.)

பேரவைத் தலைவர் ஆவுடையப்பன்: உழைத்தவர்கள் ஓய்வு எடுப்பார்கள். அதுதான் உண்மை. ஓய்வு எடுக்கிறார் எனக் கூறியதில் என்ன தவறு அனைவரும் உட்காருங்கள்.

(பேரவைக்கு ஜெயலலிதா வராததற்காக, பேரவையில் கடந்த பிப்ரவரி 7-ம் தேதி கொண்டு வரப்பட்டு நிறைவேற்றப்பட்ட தீர்மானத்தை பேரவைத் தலைவர் வாசித்தார். அப்போது, திமுகவினர் மேசையைத் தட்டி வரவேற்பு தெரிவித்தனர்.)

அமைச்சர் க.அன்பழகன்: பெங்களூர் நீதிமன்றத்தில் நடைபெற்று வரும் வழக்கில், ஓய்வுக்காக அனுமதி கேட்டு பேரவையில் நிறைவேற்றப்பட்ட தீர்மானத்தைக் கூறியுள்ளனர். உங்களுக்கு (அதிமுக) அவர் தலைவராக இருக்கலாம். எனக்கு அவர் பேரவையின் உறுப்பினர் தான்.

அமைச்சரின் இந்தப் பேச்சுக்கு அதிமுக உறுப்பினர்கள் தொடர்ந்து எதிர்ப்பு தெரிவித்தனர்.

அமைச்சர் ஆர்க்காடு வீராசாமி: எதிர்க்கட்சி துணைத் தலைவர் ஓ. பன்னீர்செல்வம் ஒரு மணி நேரம் வரை பேசினார். அதன்பின் இப்போது, அவையை நடத்த விட முடியாத அளவுக்கு திட்டமிட்டு சதி செய்கிறார்கள்.

பேரவைத் தலைவர்: இடைக்கால நிதிநிலை அறிக்கையை நிறைவேற்ற வேண்டும். கொஞ்சம் ஒத்துழைப்பு கொடுங்கள். ஓய்வு எடுக்கிறார் எனக் கூறியதில் என்ன தவறு?

பேரவைத் தலைவரின் இந்த வேண்டுகோளை ஏற்று, எதிர்க்கட்சி துணைத் தலைவர் ஓ. பன்னீர்செல்வம், தனது கட்சியினரை சமாதானப்படுத்தி இருக்கையில் அமரும்படி கூறினார்.

ஓ.பன்னீர் செல்வம்: உடல் நலக்குறைவால் இந்த கூட்டத் தொடருக்கு வரமுடியாத காரணத்துக்காக தீர்மானம் நிறைவேற்றப்பட்டது. இது, இந்த கூட்டத் தொடர் முடியும் வரை ஒரு தாற்காலிக ஏற்பாடுதான். ஆனால், இதை அரசியல் ஆக்குகிற மாதிரி நிதியமைச்சர் பேசுகிறார்.

அமைச்சர் க.அன்பழகன்: எதிர்க்கட்சித் தலைவரை குறைபடுத்தி பேசவில்லை. இந்த அவையில் முதல்வர் இருக்கையில் ஜெயலலிதா அமரும் நிலை வரும் என்றார் எதிர்க்கட்சி துணைத் தலைவர். ஓய்வு எடுத்துக் கொண்டிருப்பவர் முதல்வர் என்ற நிலையை அடையும் போது, செயல்பட்டுக் கொண்டிருக்கின்ற ஒருவர் அந்த நிலையை காப்பாற்றிக் கொள்ள முடியாதா?

ஓ.பன்னீர்செல்வம்: 2001-ம் ஆண்டில் இருந்து 2006-ம் வரை சட்டப் பேரவைக்கு முதல்வர் வரவில்லை. அவர் இப்போது முதல்வராகி உள்ளார். அப்படி இருக்கும் போது, ஜெயலலிதா முதல்வராக மாட்டாரா?

இதைத் தொடர்ந்து, நிதியமைச்சர் க. அன்பழகன் ஜெயலலிதா குறித்து கூறிய பேச்சை அவைக் குறிப்பில் இருந்து நீக்க வேண்டும் என வலியுறுத்தினர்.

அப்போது பேசிய எதிர்க்கட்சி கொறடா கே.ஏ. செங்கோட்டையன், எதிர்க்கட்சி வலியுறுத்தியும் கூட, அமைச்சரின் கருத்துகள் வாபஸ் பெறப்படவில்லை. சர்வாதிகார ஆட்சி நடைபெறுகிறது என்பதைச் சுட்டிக் காட்ட வெளிநடப்புச் செய்வதாகக் கூறினார். அவரது இந்த அறிவிப்பைத் தொடர்ந்து, அதிமுக உறுப்பினர்கள் அனைவரும் பேரவையில் இருந்து வெளியேறினர். பேரவை நிகழ்வுகள் முடியும் வரை அவர்கள் பேரவைக்குத் திரும்பவில்லை.

தினமணி