அலங்காநல்லூர் பகுதியில் வயிற்றுப்போக்கு: ஒருவர் பலி

by **சிவா** Fri Feb 11, 2011 5:53 pm

அலங்காநல்லூர்:அலங்காநல்லூர் அருகே புதுப்பட்டியில் வயிற்றுப்போக்கிற்கு ஒருவர் பலியானார். பலர் சிகிச்சை பெற்று வருகின்றனர். அலங்காநல்லூர் அருகே புதுப்பட்டியில் இரண்டு தினங்களுக்கு முன் இரண்டு பேருக்கு வயிற்று போக்கு ஏற்பட்டது. தொடர்ந்து நேற்று வரை காந்திகிராமம், செல்லக்கவுண்டன்பட்டி, சிறுவாலை குதியில் ஏராளமானவர்களுக்கு வயிற்று போக்கு ஏற்பட்டது. நேற்று முன்தினம் அளவுக்கு அதிகமான வயிற்று போக்கு காரணமாக காளியம்மாள்(60) இறந்தார். அரியநாச்சி(60), நாகஜோதி(40), முருகன்(45), செல்வராஜ்(55), முத்துப்பாண்டி(26), கலா(50), கார்த்திகைகனி(17) அழகுசுந்தரம்(37), முருகன்(37) ஆகியோர் தொடர்சிகிச்சையில் உள்ளனர். நூற்றுக்கு மேற்பட்டவர்தற்காலிக சிகிச்சை பெற்றுவருகின்றனர்.

சுகாதார துணை இயக்குனர் நேர்முக உதவியாளர் மச்சக்காளை,வட்டார தலைமை மருத்துவ அதிகாரி வளர்மதி, அய்யங்கோட்டை தலைமை மருத்துவர் ரத்னசுந்தரம் தலைமையில் சுகாதார ஆய்வாளர்கள், வட்டார சுகாதார ஆய்வாளர்கள், கிராம செவிலியர்கள், சுகாதார செவிலியர்கள் அடங்கிய குழுவினர் தொடர் சிகிச்சை பணி செய்து வருகின்றனர். டாக்டர் ரத்ன சுந்தரம்: வயிற்று போக்கு ஏற்பட்டதற்கு குடிநீர் காரணமாக இருக்கலாம் என்ற அடிப்படையில் குடிநீர் பரிசோதனைக்கு அனுப்பபட்டுள்ளது. மருத்துவ குழுவினர் வீடு வீடாக சென்று முன் தடுப்பு பணியில் ஈடுபட்டுள்ளோம். வயிற்று போக்கு அறிகுறி இருந்தால் தற்காலிகமாக அமைக்கப்பட்டுள்ள முகாமில் சிகிச்சை பெற அறிவுறுத்தி வருகிறோம் என்றார். ஊராட்சி தலைவி அழகுபிள்ளை: கிராமத்தில் தொடர்ந்து மூன்று நாட்கள் விஷேசங்கள் நடந்தன. வித விதமான உணவு பரிமாறப்பட்டது. இதுவும் காரணமாக இருக்கலாம்.

பொதுசுகாதார பணி, பிளீச்சிங் பவுடர் தெளிக்கப்பட்டுள்ளது. குடி நீர் தொட்டி சுத்தம் செய்யப்பட்டுள்ளது. எங்கள் ஊரில் வயிற்றுப்போக்கிற்கு விழா காரணம் என்றால் பக்கத்து ஊராட்சி சிறுவாலையிலும் வயிற்று போக்கு உள்ளது. இந்த வயிற்று போக்கிற்கு இன்ஜினியரிங் படிக்கும் என் மகள் நித்யாவும் தப்பவில்லை என்றார். செல்லம்மாள்(30): எனது பெரியம்மாள் காளியம்மாள்(60) நேற்று முன் தினம் வயிற்று போக்கு இருப்பதாக கூறினார். உடனடியாக

அலங்காநல்லூர் ஆஸ்பத்திரிக்கு சென்றோம். உடல் நிலை மோசமாக இருப்பதால் வீட்டிற்கு அழைத்து செல்லுமாறு டாக்டர்கள் தெரிவித்தனர். வீட்டிற்கு வந்த சிறிது நேரத்தில் இறந்து போனார். அடுத்தவர்களுக்கு வயிற்றுபோக்கு பரவகூடாது என்ற நோக்கத்தில் உடனடியாக அடக்கம் செய்து விட்டோம் என்றார். கிராமங்களில் பொதுவாக சாக்கடை அள்ளும் பணியினை செய்வதில்லை. உள்ளாட்சி நிர்வாகங்கள்குடிநீர் குழா#களை நன்கு பராமரித்தால் இதுபோன்ற பிரச்னை ஏற்பட வாய்ல்லை.

தினமலர்