வேலை செய்யாமலே சம்பளம்: சென்னை மாநகராட்சி சாதனை

by **சிவா** Fri Aug 28, 2009 10:09 am

சென்னை மாநகராட்சியில் குப்பை அள்ளும் லாரிகளை இயக்கும் பணி தனியாரிடம் ஒப்படைக்கப்பட்டுள்ளதால், பல கோடி ரூபாய் பணத்தைத் தெரிந்தே வீணாக்கி வருகிறது மாநகராட்சி நிர்வாகம்.

மாநகராட்சி சார்பில் நியமிக்கப்பட்ட ஓட்டுநர்கள் வேலை செய்யாமலே, ஆயிரக்கணக்கில் சம்பளம் பெறும் நிலையும் தொடர்கிறது. சென்னையின் 6 மண்டலங்களில் குப்பைகளைச் சேகரித்து கிடங்குகளில் கொண்டு சேர்க்கும் பணியில் மாநகராட்சிப் பணியாளர்கள் ஈடுபட்டு வருகின்றனர். இதற்காக, மும்பையில் உள்ள தனியார் நிறுவனத்திடம் இருந்து 80 " காம்பக்டர்' லாரிகள் வாங்கப்பட்டன. காலை 6 மணியில் இருந்து பிற்பகல் 2 மணி வரை இந்த லாரிகள் முழு அளவில் இயக்கப்பட்டு வருவதாக மாநகராட்சி அதிகாரிகள் கூறுகின்றனர். ஆனால், லாரிகளை இயக்குவது மாநகராட்சிப் பணியாளர்கள் அல்ல. அனைத்து லாரிகளையும் ஓட்டும் பணிதனியார் நிறுவனத்துக்கு, கடந்த நிதியாண்டில் தாரை வார்க்கப்பட்டது.

வேலை செய்யாமல் சம்பளம்...

ஒரு லாரியை இயக்கும் ஓட்டுநர் மற்றும் கிளீனருக்கு தினமும் ரூ. 641 சம்பளமாகக் கொடுக்கப்படுகிறது. முதல் ஆண்டு ஒப்பந்தப்படி , ரூ. 641- ம், அடுத்த ஆண்டு ஒரு லாரிக்கு ரூ. 900 எனவும் ஒப்பந்தம் போடப்பட்டுள்ளது. முதல் ஆண்டு ஒப்பந்தம் நடைமுறையில் உள்ளது. ஒப்பந்தப்படி , 80 லாரிகளுக்கு தினமும் ரூ. 51,280 செலவாகிறது. மாதத்துக்கு ரூ. 15 லட்சத்து 38 ஆயிரத்து 400- ம், ஒரு ஆண்டுக்கு ரூ. 1 கோடியே 84 லட்சத்து 800- ம் செலவிடப்படுகிறது. இந்தச் செலவு ஒரு புறமிருக்க, சென்னை மாநகராட்சியில் ஒப்பந்த மற்றும் நிரந்தர அடிப்படையில் 1,178 ஓட்டுநர்கள் உள்ளனர். லாரிகளை இயக்கும் பணி தனியாருக்கு விடப்பட்டதால், சுமார் நூறுக்கும் மேற்பட்ட ஓட்டுநர்கள் வேலை இல்லாமல் மாநகராட்சியைச் சுற்றி வருகின்றனர் என்று தெரியவருகிறது.

ஆண்டுக்கு பல கோடி ரூபாய்...

"" மாநகராட்சியில் 700 பேர் நீண்ட காலமாக பணியாற்றி வருகின்றனர் என்பதன் அடிப்படையில், அவர்களுக்கு மாதத்துக்கு ரூ. 20,200- ம், அண்மையில் நிரந்தரம் செய்யப்பட்ட 300 பேருக்கு மாதத்துக்கு ரூ. 12 ஆயிரமும் சம்பளமாக வழங்கப்பட்டு வருகிறது. " காம்பக்டர்' லாரிகளை இயக்கும் ப ணி தனியாரிடம் இருப்பதால், ஓட்டுநர்கள் பலர் வேலையில்லாமல் இருக்கின்றனர். அதேசமயம், அவர்களுக்கு சம்பளமும் வழங்கப்படுகிறது. இதன் மூலம், ஆண்டுக்கு ரூ. 1 கோடி அளவுக்கு இழப்பு ஏற்படுகிறது. ஒரு புறம் தனியாருக்கு ஆதரவு, மற்றொரு புறம் ஊழியர்களுக்குச் சம்பளம் என இரட்டிப்பு இழப்பை மாநகராட்சி நிர்வாகம் தெரிந்தே செய்கிறது'' என்று மாநகராட் சி வட்டாரங்கள் தெரிவிக்கின்றன. இந்தப் புகார் குறித்து மாநகராட்சி ஆணையர் ராஜேஷ் லக்கானியிடம் கேட்ட போது, "" காம்பக்டர் லாரிகளை இயக்குவதில் இரண்டு விதமான ஒப்பந்தங்கள் போடப்பட்டன. அதன்படி , 62 லாரிகளை இயக்கும் பொறுப்பு மட்டுமே தனியாருக்கு விடப்பட்டது. மேலும், 108 சிறிய ரக லாரிகள் வாங்கப்பட்டது. அதை, மாநகராட்சி ஓட்டுநர்களே இயக்குகின்றனர். தனியாருக்கு விடப்பட்ட 62 லாரிகளில் 22 லாரிகளை மீண்டும் மாநகராட்சி எடுத்துக் கொண்டுள்ளது'' என்றார்.

தனியாரிடம் தாரை வார்க்கப்பட்டதன் விளைவால் ஏற்பட்ட நஷ்டத்தில் இருந்து மீளும் முயற்சியில் மாநகராட்சி நிர்வாகம் ஈடுபட்டிருப்பதாகவும் கூறப்படுகிறது. இதன் காரணமாகவே, கடந்த பல மாதங்களாக தனியார் விடப்பட்டிருந்த " காம்பக்டர்' லாரி இயக்கத்தை மீண்டும் மாநகராட்சி ஏற்று நடத்த முடிவு செய்திருப்பதாக மாநகராட்சி வட்டாரங்கள் தெரிவிக்கின்றன.