நம்பிக்கை

பாரசீகத்தின் மீது அலெக்சாண்டர் படையெடுத்தபோது, சிட்னஸ் நதிக்கரையில் தங்கியிருந்தார். அந்த சமயம் அலெக்சாண்டரை விசித்திரமான காய்ச்சல் தாக்கியது. அவருடன் வந்த கிரேக்க மருத்துவர்களுக்கு, அந்தக் காய்ச்சலின் தன்மை புரியவில்லை. ஒருவேளை பாரசீகத்தின் அரண்மனை வைத்தியர் வந்தால் குணப்படுத்தி விடுவார் என்று சிலர் ஆலோசனை கூறினர்.

தாங்கள் படையெடுத்து வந்த எதிரி நாட்டு மன்னரின் வைத்தியரை அழைப்பதா? கூடவே கூடாது என்று மறுத்தனர் அலெக்சாண்டரின் தளபதிகள். அவர்களை சமாதானப்படுத்திய அலெக்சாண்டர், பாரசீகத்திற்கு ஆள் அனுப்பி, அரண்மனை வைத்தியரை அழைத்து வரச் சொன்னார்.

அதன்படி பாரசீகத்தில் இருந்து வந்த அரண்மனை வைத்தியர், அலெக்சாண்டரின் நாடி பிடித்து பார்த்தார். நோயின் தன்மையை உணர்ந்து கொண்ட அவர், மறுநாள் மருந்துடன் வருவதாக சொல்லிவிட்டுப் புறப்பட்டார்.


இதற்கிடையில் கிரேக்க ஒற்றன் ஒருவனிடம்இருந்து அலெக்சாண்டருக்கு கடிதம் வந்தது. பாரசீக வைத்தியன் கொண்டு வரும் மருந்தில் விஷம் கலந்திருப்பதாகவும், அதைக் குடிக்க வேண்டாம் எனவும் அந்த கடிதத்தில் குறிப்பிடப்பட்டிருந்தது. அலெக்சாண்டர் அந்தக் கடிதத்தைப் படித்துக் கொண்டிருக்கும்போதே பாரசீக வைத்தியர் மருந்துடன் வந்து சேர்ந்தார்.

அவரிடம் ஒற்றன் அனுப்பி கடிதத்தைக் கொடுத்து படிக்கச் சொல்லிவிட்டு, அவர் கொடுத்த மருந்தை எந்தத் தயக்கமும் இன்றி குடிக்கத் தொடங்கினார்.

அதைப் பார்த்த பாரசீக வைத்தியர், "என்மீது உங்களுக்கு இவ்வளவு நம்பிக்கை வந்தது எப்படி?'' என்று அலெக்சாண்டரைப் பார்த்து கேட்டார்.

"நீங்கள் விஷத்தைக் கொடுத்திருந்தாலும் பிரச்சினை கிடையாது. `நம்பி கெட்டான் அலெக்சாண்டர்' என்று உலகம் ஒரு படிப்பினையைப் பெற்றிருக்கும். நீங்கள் புனிதமான உயிரைக் காக்கும் தொழில் செய்பவர். தொழில் தர்மத்தைக் காப்பாற்றுவீர்கள் என்று எனக்கு தெரியும். மனிதர்கள் ஒருவரை ஒருவர் நம்புவது எவ்வளவு அவசியம் என்பதை இப்போது நாம் இருவரும் உலகத்துக்கு காட்டி இருக்கிறோம்'' என்று பதிலளித்தார் அலெக்சாண்டர்.

வாழ்க்கையில் எச்சரிக்கை தேவை தான். இருந்தாலும், நம்பிக்கை இல்லாமல் வாழ்க்கையில்லை.

நல்ல பதிவுக்கு நன்றி.....அண்ணா