யோகா பயிற்சியால் சர்க்கரை நோயைத் தடுக்கலாம்

தாமு · தாமு Fri 11 Feb 2011 - 7:09

Last Updated :

யோகா பயிற்சியால் சர்க்கரை நோயைத் தடுக்கலாம் Yoga

ஆரோக்கிய சித்த மருத்துவமனை, பெங்களூர் யோகா பல்கலைக்கழகம் ஆகியவை இணைந்து நடத்திய சர்க்கரை நோய் தடுப்பு யோகா முகாம் சென்னையில் ஞாயிற்றுக்கிழமை நடைபெற்றத

சென்னை,ஜன.23: முறையான யோகா பயிற்சி, முறையான உணவுப்பழக்கம் உள்ளிட்டவற்றின் மூலம் சர்க்கரை நோய் வராமல் 80 சதவீதம் தடுக்கலாம் என தேசிய சித்த மருத்துவ நிறுவனத்தின் இயக்குநர் டாக்டர் கே.மாணிக்கவாசகம் கூறினார்.
ஆரோக்கியா சித்த மருத்துவமனை, பெங்களூர் யோகா பல்கலைக்கழகம் ஆகியவை இணைந்து நடத்திய சர்க்கரை நோய் தடுப்பு யோகா முகாம் மற்றும் ஏழாம் சுவை நூல் வெளியீட்டு விழா சென்னை தென்னிந்திய திரைப்பட வர்த்தக சபையில் ஞாயிற்றுக்கிழமை நடைபெற்றது.
விழாவில் தேசிய சித்த மருத்துவ நிறுவனத்தின் இயக்குநர் டாக்டர் கே.மாணிக்கவாசகம் பேசியது:
இன்றை உலகில் பெரும்பாலான மக்கள் மன அழுத்தத்துக்கு ஆளாகின்றனர். இதனைப் போக்குவதற்கு வாழ்வியல் மாற்றம் தேவை. மேலும் தியானம் செய்வது மன அழுத்தத்தைக் குறைக்க உதவும்.
அமைதி, மனதை ஒருநிலைப்படுத்துதல் ஆகியவையே தியானத்தின் முக்கிய குறிக்கோளாகும். அவ்வாறு தியானம் செய்வதன் மூலம் நரம்பு மண்டலம் சீர்படும். உலகில் ஏற்படும் பெரும்பாலான இறப்புகளுக்கு சர்க்கரை நோய்தான் மூலகாரணம்.
உலகில் ஏற்படும் 60 சதவீத உயிரிழப்புகளுக்கு சர்க்கரை நோய் உள்ளிட்ட தொற்று அல்லாத நோய்கள்தான் காரணம். இந்திய மக்கள் தொகையில் சுமார் பாதி பேருக்கு சர்க்கரை நோய் உள்ளது. சரியான நேரத்தில் நோய் கண்டறிதல், மருத்துவம் ஆகியவை இல்லாவிட்டால், பல்வேறு பிரச்னைகளை உடலில் ஏற்படுத்தும்.
உடலில் இன்சூலின் சுரக்காததால் முதல் வகை சர்க்கரை நோய் ஏற்படும். இதனை யோகா உள்ளிட்ட தியான முறைகளால் குணப்படுத்த முடியாது. பெரியவர்களுக்கு ஏற்படும் இரண்டாவது வகை சர்க்கரை நோய் வாழ்க்கை முறை மாற்றம், மன அழுத்தம் சம்பந்தப்பட்ட கோளாறுகளால் ஏற்படுவது. இத்தகைய சர்க்கரை நோய்க்கு யோகா சிறந்த மருத்துவமாகும்.
முறையான யோகா பயிற்சி ரத்தத்தில் உள்ள சர்க்கரையின் அளவு, ரத்த அழுத்தம், உடல் எடை அதிகரித்தல் உள்ளிட்டவற்றை குறைக்கும். சரியான உணவுப் பழக்கவழக்கம், உடற்பயிற்சி, நல்ல சுற்றுச்சூழல் ஆகியவற்றால் இரண்டாவது வகை சர்க்கரை நோய் வராமல் 80 சதவீதம் பாதுகாத்துக் கொள்ளலாம் என்றார் அவர்.
ஸ்ரீ ராமச்சந்திரா பல்கலைக்கழக பேராசிரியர் எஸ்.தணிகாசலம் பேசுகையில் "" யோகா என்பது இந்து சமயத்தினருக்கு மட்டும்தான் என்ற தவறான கருத்து உள்ளது. யோகா என்பது அனைத்து மதத்தினருக்கும் உரியது. இன்று அமெரிக்காவில் சுமார் 150 மையங்களில் யோகா பயிற்சி அளிக்கப்படுகிறது. யோகாவின் பயனை அனைத்து நாட்டினரும் உணர்ந்து கொண்டிருக்கிறார்கள். என்றார்.
ஆரோக்கியா சித்த மருத்துவமனையின் நிர்வாக இயக்குநர் மருத்துவர் கு.சிவராமன் பேசியது: ஒரு நோயாளிக்கு மருந்துச் சீட்டு எழுதிக் கொடுப்பதால் மட்டும் டாக்டர்களின் கடமை முடிந்து விடுவதில்லை. நோயாளியின் நோய்க்கு காரணம் என்ன என்பதை டாக்டர்கள் கண்டறிந்து சிகிச்சையளிக்க வேண்டும்.
தொற்று அல்லாத நோய்களுக்கு பெரும்பாலான காரணம் உணவும், மனதும்தான். இது இரண்டும் சரியாக இருந்தால் பெரும்பாலான நோய்கள் மனிதனைத் தாக்காது. பொது மக்களில் பலர் புற மகிழ்ச்சியோடு காணப்படுகின்றனர்; ஆனால் அவர்களுக்கு அகமகிழ்ச்சி இருப்பதில்லை.
மனதில் மகிழ்ச்சி இல்லாததால் உணவில் மாற்றம் ஏற்படுகிறது. காலப்போக்கில் இது பல்வேறு நோய்களுக்கு வழி வகுக்கிறது. யோகா என்பது முதலில் கடவுள் மறுப்புக் கொள்கையில் இருந்து உருவாக்கப்பட்டது. யோகா என்பது இந்தியத் தத்துவம். மனதைச் செம்மைப்படுத்தும் பயிற்சியாகும் என்றார் அவர். ஊரக வளர்ச்சித் துறை ஆணையர் த.உதயசந்திரன், நடிகையும் சமூக ஆர்வலருமான ரோகிணி, மத்திய சித்த மருத்துவ ஆராய்ச்சி நிறுவனத்தின் இயக்குநர் டாக்டர் டி.ஆனந்தன் உள்ளிட்டோர் நிகழ்ச்சியில் பங்கேற்றனர்