இந்தியா 1998ல் நடத்திய அணுகுண்டு சோதனை முழு வெற்றி பெறவில்லை

புதுடெல்லி : இந்தியா 1998ல் நடத்திய அணுகுண்டு சோதனை முழு வெற்றி பெறவில்லை என்று விஞ்ஞானி சந்தானம் ஏற்படுத்திய சர்ச்சைக்கு முன்னாள் ஜனாதிபதி அப்துல் கலாம் பதில் அளித்துள்ளார். பொக்ரானில் இந்தியா நடத்திய அணுகுண்டு சோதனை எதிர்பார்த்த பலனை தந்தது. இந்த சோதனை வெற்றிகரமானது என்று அவர் கூறியுள்ளார்.

1998 மே 11, 13ம் தேதிகளில் ராஜஸ்தானில் உள்ள பொக்ரான் பாலைவனத்தில் இந்தியா 2வது அணுகுண்டு சோதனை நடத்தியது. இந்த சோதனை வெற்றிகரமாக நடத்தப்பட்டது என்று அறிவிக்கப்பட்டது. இந்நிலையில் அணுகுண்டு சோதனையில் ஈடுபட்ட முன்னணி விஞ்ஞானிகளில் ஒருவரான கே. சந்தானம் அளித்த பேட்டியில், "பொக்ரான்&2 அணுகுண்டு சோதனை எதிர்பார்த்தபடி முழு வெற்றியைத் தரவில்லை. இந்தியா இன்னும் அணுகுண்டு சோதனைகள் நடத்த வேண்டியது அவசியம். அவசரப்பட்டு சர்ச்சைக்குரிய அணுகுண்டு சோதனை தடை ஒப்பந்தத்தில் கையெழுத்திட்டு விடக் கூடாது" என்று கூறியுள்ளார்.

இது குறித்து உள்துறை அமைச்சர் ப. சிதம்பரத்திடம் கேட்டபோது, " இந்த அறிக்கை எந்த அளவுக்கு உண்மை என்பதை கண்டறிவோம். இதில் பெரிய அளவில் உண்மை இருப்பதாக தெரியவில்லை" என்றார். 1998ல் அணுசக்தி கமிஷன் தலைவராக இருந்த ஆர். சிதம்பரம் கூறுகையில், "பொக்ரான்&2 அணுகுண்டு சோதனையில் எந்த சர்ச்சைக்கும் இடமில்லை. இது பற்றி கேள்வி எழுப்புவது நகைப்புக்குரியது" என்றார்.

கலாம் பேட்டி: பொக்ரான்&2 அணுகுண்டு சோதனையில் முக்கிய பங்காற்றிய அணு விஞ்ஞானியும், முன்னாள் ஜனாதிபதியுமான அப்துல் கலாம் நேற்று அளித்த பேட்டியில், "இந்தியா நடத்திய அணுகுண்டு சோதனை வெற்றி அடைந்தது. எதிர்பார்த்த பலனைத் தந்தது. இந்த அணுகுண்டு சோதனை நடந்த பிறகு நிலநடுக்க அளவு, கதிர்வீச்சு அளவு இரண்டையும் ஆய்வு செய்தோம். அவை எதிர்பார்த்தபடி இருந்தது" என்றார்.

இன்னும் என்னய்யா பண்றீங்க?