கிரந்திநாயகம் - Ruellia strepens

கிரந்திநாயகம் - Ruellia strepens

தோலில் தோன்றும் தடிப்புகளும், கனத்த கட்டிகளும் கூட சில நேரங்களில் ஆறாத விரணங்களாக மாறும் வாய்ப்புண்டு. சிலருக்கு அடிபட்டதால் ஏற்படும் காயங்கள் ஆறுவதற்கு நீண்ட நாட்களாகும்பொழுது காயங்களை சுற்றியுள்ள தோல் பகுதியானது தடித்து, தழும்புகளாக மாறிவிடுகின்றன. இந்த தழும்புகளில் தேங்கும் உடல் நீரானது கிருமிகளினால் அடிக்கடி தொற்றுக்கு ஆளாகும்பொழுது மீண்டும் புண்களாக மாறி தழும்பு புண்களாக அவதாரம் எடுக்கின்றன. கீலாய்டு என்று சொல்லப்படும் இந்த புண்களை சித்த மருத்துவத்தில் ஆறாக்கிரந்தி என்று குறிப்பிடுகின்றனர். தோலில் தோன்றும் மாறுபட்ட தோலடுக்கு தடிப்பினால் தோன்றும் இந்த கிரந்திப் புண்கள் அதிகவில் மார்பு, முதுகு போன்ற பகுதிகளில் காணப்படுகின்றன. அறுவை சிகிச்சையினால் ஏற்படும் தழும்புகள், அடிபட்ட காயத்தினால் ஏற்படும் தழும்புகள், உறுத்தலினால் ஏற்படும் தழும்புகள் ஆகியன கிரந்திகளாக மாற்றமடைகின்றன.

நாட்பட்ட கிரந்தியினால் தோன்றிய புண்கள் ஆறாமல், தோல் தடித்து, வெடித்து, சதா நீரும், ரத்தமும், சீழும் வடிந்து சில நேரங்களில் துர்நாற்றத்துடன் காணப்படும். இந்த தழும்புகளை அறுவை சிகிச்சை மூலமாக நீக்க ஆரம்பிப்பது மீண்டும் நோயை தீவிரப்படுத்தும் என்பதால் எளிய மற்றும் துவர்ப்புச்சுவையுள்ள வெளிமருந்துகளை பயன்படுத்துவது மிகுந்த பலனளிப்பதாக ஆய்வுகள் தெரிவிக்கின்றன. கிரந்தியினால் தோன்றும் ஆறாத விரணங்களை ஆற்ற பயன்படும் எளிய மூலிகைதான் கிரந்திநாயகம். மலைப்பகுதிகளில் இவை அதிம் காணப்படுகின்றன.

Ruellia strepens என்ற தாவரவியல் பெயர் கொண்ட Acanthaceae குடும்பத்தைச் சார்ந்த இந்த சிறுசெடிகளின் இலைகளிலுள்ள டானின் போன்ற வேதிப்பொருட்கள் கனத்த புண்களிலுள்ள துர்நீரை வெளியேற்றி, நுண்கிருமிகளை நீக்கி, நுண்ணிய ரத்தக்குழாயின் அடைப்பை சீர்செய்து விரணங்களை ஆற்றும் தன்மை படைத்தவை. கிரந்தியால் தோன்றும் நாட்பட்ட விரணங்கள் ஆற கிரந்தி இலையை மைய அரைத்து, நீர் வடியும் புண்களின் மேல் தொடர்ந்து தடவி வரவேண்டும். இதனால் நீர் நன்கு வெளியேறி, புண்கள் விரைவில் ஆறுவதுடன், துர்நாற்றமும் நீங்கும்.


நீர் வடியாத, ஆனால், அரிப்புடைய கடின விரணங்களை ஆற்ற கிரந்திநாயக இலைகளை பழச்சாறு விட்டரைத்து, நன்கு பிழிந்து, அந்த சாற்றுடன் சம அளவு தேங்காய் எண்ணெய் சேர்த்து காய்ச்சி, பதத்தில் வடிகட்டி வைத்துக்கொள்ள வேண்டும். இதனை நாட்பட்ட கிரந்திப் புண்களின் மேல் தடவி வர கிரந்திப்புண்கள் விரைவில் ஆறும்.