கைதான அமெரிக்கரை விடுவிக்க மறுத்ததால் பாகிஸ்தானுடன் உயர்மட்ட தொடர்பை அமெரிக்கா துண்டித்தது

கைதான அமெரிக்கரை விடுவிக்க மறுத்ததால் பாகிஸ்தானுடன் உயர்மட்ட தொடர்பை அமெரிக்கா துண்டித்தது, வெளிநாட்டு மந்திரி குரேஷியை சந்திக்க ஹிலாரி மறுத்து விட்டார்


வாஷிங்டன், பிப்.9- 2 பாகிஸ்தானிர்களை சுட்டுக்கொன்றதால், அமெரிக்க தூதரக அதிகாரி ஒருவர் கைது செய்யப்பட்டார். அவர் காவலில் வைக்கப்பட்டு இருக்கிறார். தூதரக அதிகாரி என்ற முறையில் அவரை விடுவிக்க பாகிஸ்தான் மறுத்து விட்டதால் கோபம் அடைந்த அமெரிக்கா அந்த நாட்டு உடன் உயர்மட்ட தொடர்பை துண்டித்துக்கொண்டது. பாகிஸ்தான் வெளிநாட்டு மந்திரி குரேஷியை அமெரிக்க மந்திரி ஹிலாரி சந்திக்க மறுத்து விட்டார்.

சுட்டுக்கொலை

பாகிஸ்தானில் உள்ள பஞ்சாப் மாநிலத்தில் லாகூர் நகரில் அமெரிக்க தூதரகத்தில் அதிகாரியாக பணிபுரிந்த ரேமண்ட் டேவிஸ் காரில் சென்றபோது அவரது காரை மறித்த 2 பாகிஸ்தானியர்களை அவர் சுட்டுக்கொன்று விட்டார்.

இதை தொடர்ந்து அவரை பாகிஸ்தான் போலீசார் கைது செய்தனர். கோர்ட்டில் ஆஜர்படுத்தப்பட்ட அவரை காவலில் வைக்கும்படி கோர்ட்டு உத்தரவிட்டது. அவர் மீது வழக்கு விசாரணை நடந்து வருகிறது.

விடுவிக்க கோரிக்கை

இந்த நிலையில் அவரை விடுதலை செய்யவேண்டும் என்றும் அவர் தூதரக அதிகாரி என்பதால் அவர் மீது பாகிஸ்தான் சட்டப்படி நடவடிக்கை எடுக்க விதிவிலக்கு அளிக்க வேண்டும் என்றும் பாகிஸ்தான் அரசை அமெரிக்கா கேட்டுக்கொண்டது.

இதற்கு பாகிஸ்தான் அரசு சம்மதிக்க வில்லை. பிரச்சினை கோர்ட்டில் உள்ளது. கோர்ட்டு என்ன நடவடிக்கை எடுக்கிறதோ அதை அனைத்து தரப்பினரும் ஏற்றுக்கொள்ள வேண்டும் என்று பாகிஸ்தான் கூறிவந்தது. இந்த பதிலால் அதிருப்தி அடைந்த அமெரிக்கா பாராளுமன்ற குழுவை அனுப்பி பாகிஸ்தான் பிரதமரை சந்திக்க ஏற்பாடு செய்யப்பட்டது. அந்த குழுவினர் ரேமண்ட் டேவிசை விடுவிக்கா விட்டால் ராணுவ உதவி கிடைப்பது தாமதம் ஆகும் என்றும் எச்சரித்தனர்.

அமெரிக்க தூதர் எச்சரிக்கை

இதற்கிடையில் அமெரிக்காவுக்கான பாகிஸ்தான் தூதர் ஹக்கானியும் ரேமண்ட்ஸ் டேவிசை உடனடியாக விடுவிக்க வேண்டும் என்றும் இல்லாவிட்டால் அமெரிக்க உறவு பாதிக்கப்படும் என்றும் எச்சரித்தார். இதனால் டேவிஸ் விடுதலை செய்யப்படுவார் என்ற சூழ்நிலை ஏற்பட்டது. ஆனால் பாகிஸ்தான் மீண்டும் வேதாளம் முருங்கை மரம் ஏறிய கதையாக கோர்ட்டு நடவடிக்கையில் தலையிடுவதில்லை என்ற முடிவை எடுத்தது.

இதை தொடர்ந்து பாகிஸ்தானுடனான உயர்மட்ட தொடர்பை அமெரிக்கா துண்டித்தது.

சர்தாரி பயணம் தள்ளிவைப்பு

அதோடு பாகிஸ்தான் அதிபர் சர்தாரி அமெரிக்காவில் அடுத்தமாதம் சுற்றுப்பயணம் செய்ய இருந்தார். இந்த பயணத்தை அமெரிக்கா தள்ளி வைத்து உள்ளது.

ஜெர்மனி நாட்டில் முனீச் நகரில் நடந்த பாதுகாப்பு தொடர்பான மாநாட்டில் கலந்து கொண்ட அமெரிக்க மந்திரி ஹிலாரி கிளிண்டனை சந்திக்க பாகிஸ்தான் வெளிநாட்டு மந்திரி ஷா முகமது குரேஷி விரும்பினார். ஆனால் அவரை சந்திக்க ஹிலாரி மறுத்து விட்டார்.

பெண் தற்கொலை

இதனால் இருநாடுகளுக்கும் இடையேயான உறவு பாதிக்கப்பட்டு உள்ளது. பாகிஸ்தான் நிலைமை அரசாங்கத்தின் கையை விட்டு நழுவி வருகிறது. அமெரிக்க நலனுக்கு எதிரான சக்திகள் அமெரிக்காவுக்கு எதிராக பொதுமக்கள் எண்ணத்தை திரட்டும் பணியில் ஈடுபட்டு உள்ளன.

இதற்கிடையில் அமெரிக்க தூதரக அதிகாரியால் சுட்டுக்கொல்லப்பட்டவரின் மனைவி ஷூமைலா கன்வால் எலிமருந்தை தின்று தற்கொலை செய்து கொண்டார். கொலைகார அதிகாரி விசாரணை இல்லாமல் விடுவிக்கப்படுவார் என்று கிடைத்த தகவலால் அவர் இந்த முடிவை தேடிக்கொண்டதாக மரணத்துக்கு முன்னால் வாக்குமூலம் கொடுத்தார். இதனால் அவர் மீதான அனுதாபம் அமெரிக்கா மீதான வெறுப்பாக வளர்ந்து உள்ளது.

தினதந்தி