குடிக்கப் பணம் கேட்டதால் நண்பன் கொலை

மதுரை, பிப்.8- குடிக்க பணம் கேட்டதால் நண்பனை கொலை செய்த வழக்கில் ஆட்டோ டிரைவருக்கு ஜாமீன் வழங்க மறுத்து மதுரை கோர்ட்டு உத்தரவிட்டது.

வாலிபர் கொலை

மதுரை வண்டியூர் பாலம் அருகே கடந்த டிசம்பர் மாதம் 22-ந் தேதி வாலிபர் ஒருவர் தலை சிதைந்த நிலையில் ரத்த காயங்களுடன் கொலை செய்யப்பட்டு கிடந்தார். அந்த வாலிபர் காக்கி நிற பேண்ட் அணிந்து இருந்தார். இதுகுறித்து கருப்பாயூரணி போலீசார் வழக்கு பதிவு செய்து விசாரித்து வந்தனர். இந்த வழக்கில் குற்றவாளிகளை கண்டுபிடிப்பதில் போலீசாருக்கு கடும் சவால் உருவானது. இதனால் மாவட்ட போலீஸ் சூப்பிரண்டு மனோகரனின் நேரடி கண்காணிப்பில் தனிப்படை அமைக்கப்பட்டு, அவர்கள் தீவிர விசாரணை நடத்தினர். அப்போது கொலை செய்யப்பட்டவர் ஒத்தக்கடை அருகே உள்ள ராஜகம்பீரம் பகுதியை சேர்ந்த அர்ஜுனன் மகன் ஸ்ரீசுதர்சன் என்பது தெரியவந்தது. இவர் ஆட்டோ டிரைவராக இருந்தார்.

ஜாமீன் மனு தள்ளுபடி

மது குடிப்பதற்கு பணம் கேட்டு அடிக்கடி ஸ்ரீசுதர்சன் தொந்தரவு செய்ததால், அவரது நண்பர்களான ஒத்தக்கடை, பாரதிநகரை சேர்ந்த பாண்டியன் என்பவரது மகன் சுந்தரபாண்டியன் (வயது 25), காட்டுவாஒலி(23), தர்மர்(23) ஆகியோர் தான் ஸ்ரீசுதர்சனை அழைத்துச் சென்று கொலை செய்து உடலை வீசி விட்டு சென்று இருப்பது கண்டுபிடிக்கப்பட்டது. இதன்பேரில் ஆட்டோ டிரைவர்களான அவர்கள் 3 பேரையும் போலீசார் கைது செய்தனர்.

மதுரை மாவட்ட கோர்ட்டு உத்தரவின்படி 3 பேரும் மதுரை மத்திய சிறையில் காவலில் வைக்கப்பட்டனர். அவர்களில் சுந்தரபாண்டியன், தன்னை ஜாமீனில் விடுவிக்கும்படி கேட்டு மதுரை மாவட்ட முதன்மை செசன்சு கோர்ட்டில் மனு தாக்கல் செய்தார். அந்த மனு நீதிபதி என்.ரத்னராஜ் முன்பாக விசாரணைக்கு வந்தது. அரசு தரப்பில் வக்கீல் எஸ்.மோகன்குமார் ஆஜராகி, ஜாமீன் வழங்க கடும் ஆட்சேபம் தெரிவித்தார். இதையடுத்து ஜாமீன் வழங்க மறுத்து மனுவினை தள்ளுபடி செய்து நீதிபதி உத்தரவிட்டார்.

தினதந்தி