ஸ்பெக்டரம் விவகாரம் : சுப்பிரமணியசாமிக்கு கருணாநிதி நோட்டீஸ்

by **சிவா** Sun Feb 06, 2011 8:52 pm

சென்னை : ஸ்பெக்ட்ரம் வழக்கில் கருணாநிதியையும் எதிரியாக சேர்க்க வேண்டும் என்று ‌கோரிய ஜனதா கட்சி தலைவர் சுப்பிரமணியசாமிக்கு முதல்வர் கருணாநிதி நோட்டீஸ் அனுப்பியுள்ளார். 2ஜி ஸ்பெக்ட்ரம் அலைவரிசை ஒதுக்கீட்டில் நாட்டுக்கு ரூ.1 லட்சத்து 76 ஆயிரம் கோடி இழப்பு ஏற்படுத்தியதாக மத்திய கணக்கு தணிக்கைக்குழு அறிக்கை அளித்தது. இதனை தொடர்ந்து எழுந்த எதிர்ப்பு அலைகளால் ராஜா, அமைச்சர் பதவியை கடந்த நவம்பர் 14ம் தேதி ராஜினாமா செய்தார். இதையடுத்து ராஜா எந்த நேரமும் கைது செய்யப்படலாம் என்ற சூழல் நிலவி வந்தது. எதிர்பார்க்கப்பட்டது போலவே கடந்த 2ம் தேதி ராஜா கைது செய்யப்பட்டார். அவருடன் தொலைதொடர்பு துறை மாஜி அதிகாரிகள் ஆர்.கே.சந்தோலியா, பெஹீரியா, ராஜாவின் சகோதரர் கலியபெருமாள் ஆகியோரும் கைது செய்யப்பட்டனர். அவர்களை சிபிஐ போலீசார் காவலில் எடுத்து விசாரித்து வருகிறார்கள்.

இந்நிலையில் ஜனதா கட்சி தலைவர் சுப்பிரமணியசாமி, ஸ்பெக்டர் வழக்கில் முதல்வர் கருணாநிதியையும் எதிரியாக சேர்க்க வேண்டும் என்று அறிக்கை வெளியிட்டார். இதுதொடர்பாக, மனு ஒன்றைத் தாக்கல் செய்ய உள்ளதாகவும் கோர்ட்டில் அவர் தெரிவித்தார். ராஜா மீது நடவடிக்கை எடுக்க வேண்டும் என்று கோரி சுப்பிரமணியசாமி அளித்த புகார் மீதான விசாரணை கடந்த 5ம் தேதி நடைபெற்றது. விசாரணையின் போது, "2-ஜி அலைக்கற்றை முறைகேடு தொடர்பான தனது புகார் மிகவும் விரிவானது என்றும் இதில் தேச பாதுகாப்பு சம்பந்தப்பட்டுள்ளது. இந்தப் பிரச்னையில் சி.பி.ஐ.யின் விசாரணை சிறிய கோணத்திலேயே உள்ளது' என்று சுப்ரமணியசாமி தெரிவித்தார். இந்த முறைகேட்டில் தமிழக முதல்வர் கருணாநிதி உள்ளிட்ட அரசியல் தலைவர்களுக்கு உள்ள பங்கு குறித்தும், தேசத்தின் பாதுகாப்பு பாதிக்கப்படுவது குறித்தும் தனியாக மனு தாக்கல் செய்ய உள்ளதாகவும் சுப்ரமணியசாமி தெரிவித்தார்.

சுப்பிரமணியசாமியின் இந்த வாதம் நாடு முழுவதும் மேலும் பரபரப்பை ஏற்படுத்தியது. இந்நிலையில், முதல்வர் கருணாநிதி, சுப்பிரமணியசாமிக்கு வக்கீல் நோட்டீஸ் அனுப்பியுள்ளார். கருணாநிதி சார்பில் அவரது வக்கீல் ராமன் அசோசியேட்ஸ் மூலம் அனுப்பப்பட்டுள்ள நோட்டீசில், தமிழக முதல்வர் கருணாநிதி 70 ஆண்டுகளாக பொதுச் சேவையிலும், தமிழக சட்டமன்றப் பணியில் ஏறத்தாழ 50 ஆண்டுகளாகவும் பணியாற்றி வருகிறார்; ஸ்பெக்ட்ரம் விவகாரத்தில் தேசத்தின் பாதுகாப்பு சம்பந்தப்பட்டுள்ளது குறித்து எனக்கு தெரியும் என்றும், ஸ்பெக்ட்ரம் ஒதுக்கீட்டில் கருணாநிதிக்கு தொடர்பு உள்ளது என்றும் நீங்கள் கூறியதாக செய்தி வெளியாகியுள்ளது. இது அரசியல் பகை, தனிப்பட்ட விரோதம், மலிவான விளம்பரம் ஆகியவற்றின் அடிப்படையில் உங்களால் வெளியிடப்பட்டுள்ளது. முதல்வரின் புகழுக்கு களங்கம் ஏற்படுத்தும் வகையில் உங்கள் கருத்து அமைந்துள்ளது. எனவே, 24 மணி நேரத்திற்குள் உங்களின் முந்தைய கருத்துக்கு பகிரங்கமாக மறுப்பு வெளியிட வேண்டும். இல்லையென்றால் முதல்வர் கருணாநிதியின் பெயருக்கு களங்கம் விளைவிக்க முயன்றதற்காக உங்கள் மீது சிவில் மற்றும் கிரிமினல் வழக்கு நடைமுறைகள் மேற்கொள்ளப்படும்.என்று கூறப்பட்டுள்ளது.

தினமலர்

by கலைவேந்தன் Sun Feb 06, 2011 8:59 pm

சபாஷ் ...!

by **T.N.Balasubramanian** Mon Feb 07, 2011 8:30 am

இது விஷயம் சுவாமியின் கவனத்துக்கு கொண்டுவந்தபோது, " கோர்ட்டில் கோர்ட்டுக்குக்காக கூறிய சிறப்பு செய்தி / ஊடகங்களுக்கு ,கோர்ட்டில் கூறிய செய்தி என்றே கூறி உள்ளேன். சட்ட ரீதியாக என் மீது கேஸ் போடமுடியாது. கோர்ட்டுக்கு அவர் போனால் எனக்கு சந்தோஷமே" என்று கூறி உள்ளார்.
(தகவல் : டைம்ஸ் ஆப் இந்தியா /சென்னை பதிப்பு 7 பிப் 2011 )

ரமணீயன்