நடக்காத பெண்.. நடந்த திருமணம்...

by **சிவா** Sat Feb 05, 2011 2:01 pm

என் நண்பருக்கு திருமணம் செய்துவைக்க அவனது பெற்றோர் பல இடங்களில் பெண் பார்த்தனர். அவனோ எந்தப் பெண்ணும் பிடிக்கவில்லை என்று தட்டிக்கழித்து வந்தான். ஒருவழியாக சமீபத்தில் தான் அவனுக்கு திருமணம் நிச்சயம் ஆனது. நான் வெளிïரில் வசித்ததால் பெண்ணைப் பற்றிய விபரம் எதுவும் எனக்கு தெரியாது. நான் பெண்ணைப் பற்றி கேட்டபோதும் அவன் விபரம் எதுவும் கூறாமல் தவிர்த்தான்.

அன்று முகூர்த்தம். காலையில் அவசரமாக பஸ்சில் போய் இறங்கிய நான், பெண்ணை பார்க்கும் ஆவலில் பந்தலில் உட்கார்ந்திருந்தேன். மணப் பெண்ணை வீல்சேரில் மணமேடைக்கு அழைத்து வந்தார்கள். பெண்ணின் இரண்டு கால்களும் ஊனமுற்றவை என்பதை நான் பார்த்ததும் அதிர்ந்தேன்.

கண்கள் குளமாக, தாலிகட்டு நடக்கும் வரை அமைதியாக இருந்தேன். பின்பு என் நண்பனை அணுகி, `என்னடா...இப்படி?' என்று மெதுவாக கேட்டேன். அவனோ `இப்படி ஒரு பெண்ணுக்கு வாழ்வு கொடுக்க வேண்டும் என்பதைத்தான் என் வாழ்நாள் லட்சியமாக வைத்திருந்தேன்' என்றான். அவன் முடிவுக்கு முதலில் வீட்டிலேயே பலத்த எதிர்ப்பு ஏற்பட்டு கடைசியில் இப்போதுதான் சம்மதித்தார்கள் என்றும் சொன்னான். "நீ என் நண்பன் என்பதில் எனக்கு நிஜமாகவே பெருமை'' என்று கூறி, மனப்பூர்வமாக வாழ்த்தினேன்.

மு.செல்லத்துரை, கோவில்பட்டி.