சிறந்த நிர்வாகத்துக்கு, வேகமான வளர்ச்சிக்கு ஊழல் பெரிய தடையாக உள்ளது. பிரதமர் மன்மோகன்சிங் வேதனை

புதுடெல்லி, பிப்.5-

சிறந்த நிர்வாகத்துக்கும், வேகமான வளர்ச்சிக்கும் ஊழல் பெரும் தடையாக இருக்கிறது என்று பிரதமர் மன்மோகன்சிங் வேதனை தெரிவித்தார்.

தலைமை செயலாளர்கள் மாநாடு

அனைத்து மாநில தலைமைச்செயலாளர்களின் வருடாந்திர மாநாடு நேற்று டெல்லியில் நடந்தது. மாநாட்டில் பிரதமர் மன்மோகன்சிங் பேசியதாவது:-

ஊழல் நாட்டின் சிறந்த நிர்வாகம் என்ற ஆணி வேரை கடுமையாக தாக்குகிறது. நாட்டின் வேகமான வளர்ச்சிக்கு முட்டுக்கட்டையாக, பெரிய தடையாக இருக்கிறது.

களங்கம்

இந்த ஊழல் சர்வதேச நாடுகளில் நமது நாட்டின் கவுரவத்தை குறைக்கிறது. நமது நாட்டின் பெருமைக்கு வடுவை ஏற்படுத்துகிறது. நமது நாட்டு மக்களிடையேயும் நமது மதிப்பும், மரியாதையும் குறைகிறது.

ஆகவே, ஊழலே இல்லாமல் அடியோடு வேரறுக்க வேண்டும். இல்லையென்றால் சமுதாய முன்னேற்றத்துக்கு நாம் செய்ய வேண்டிய பணிகளின் வீரியத்தை அது குறைத்து விடும்.

மந்திரிகள் குழு

ஊழல் புகார்கள் குறித்து நடவடிக்கைகள் எடுக்க நிதி மந்திரி பிரணாப் முகர்ஜி தலைமையில் ஒரு மந்திரிகள் குழு அமைக்கப்பட்டுள்ளது. அந்தக்குழு சட்டரீதியாக, நிர்வாக ரீதியாக தேவையான நடவடிக்கைகளை எடுக்க வழிவகைகாணும். இது தொடர்பாக பாராளுமன்றத்தில் 2 மசோதாக்கள் அறிமுகம் செய்யப்பட்டதை நினைவுபடுத்த விரும்புகிறேன்.

ஊழலை ஒழிப்பதற்கு எடுக்க வேண்டிய எந்த சவாலையும் சந்திக்க அரசு தயாராக இருக்கிறது. அறிமுகம் செய்யப்பட்டுள்ள சட்ட மசோதாக்களின் துணையோடு ஊழலை ஒழிக்க மாநில அரசுகள் விரைவான, உறுதியான, துணிச்சலான நடவடிக்கைகளை எடுக்க வேண்டும்.

கால தாமதம்

நாட்டின் வேகமான பொருளாதார வளர்ச்சிக்கு கால தாமதமும் ஒரு தடையாக உள்ளது. அதிகார பிரதிநிதித்துவம், தீவிரமான ஆட்சி பகிர்ந்தளிப்பு, பொறுப்புணர்வு ஆகியவை கொண்டு அந்த கால தாமதத்தை களைந்து பணிகளை விரைந்து முடிக்க வேண்டும். போட்டிகளை அறிமுகம் செய்தல், வாய்ப்புகளை உருவாக்குதல், தொழில்நுட்பம் ஆகியவை ஊழல் உருவாகும் சந்தர்ப்பங்களை தடுக்கும்.

காஷ்மீர் தீவிரவாதிகள் மற்றும் இடதுசாரி தீவிரவாதிகளால் நாட்டின் சில பகுதிகளில் உள்நாட்டு பாதுகாப்பு பதற்றமாக உள்ளது. அங்கு ஏற்றுக்கொள்ள முடியாதபடி வன்முறை வெறியாட்டம் நடக்கிறது. மத்திய-மாநில அரசுகள் பயனுள்ள பேச்சுவார்த்தைகள் நடத்தி, இடதுசாரி தீவிரவாதம், எல்லை தாண்டிய பயங்கரவாதம், மத ரீதியிலான தீவிரவாதம் ஆகியவற்றை கடுமையாக ஒழிக்க வேண்டும்.

தேவையான உதவிகள்

அதற்காக சம்பந்தப்பட்ட மாநிலங்களுக்கு தேவையான உதவிகளை அளிக்க மத்திய அரசு தயாராக இருக்கிறது. மாநில அரசுகளுக்கு தேவையான நிதி, வழிகாட்டுதல், தகவல் தொடர்பு, காவல் துறையை நவீன மயமாக்கல், அவர்களுக்கு தரமான-நவீன ஆயுதங்கள் வழங்குதல், காவல் துறையினரின் தகுதியை, தரத்தை மேம்படுத்துவது, அடிப்படை கட்டமைப்பை வலுவாக்குதல் ஆகியன செய்து தரப்படும்.

இதற்கு நிதி ஒரு தடையாக இருக்காது. தேவையான நிதி வழங்க 13-வது ஐந்தாண்டு திட்டத்தில் வழி வகை செய்யப்பட்டு உள்ளது.

தாழ்த்தப்பட்டவர்களுக்கு பாதுகாப்பு

தாழ்த்தப்பட்டவர்கள், பழங்குடியினர், சிறுபான்மையினர் மற்றும் பெண்கள் பெரிய பிரச்சினைகளை சந்தித்து வருகின்றனர். அவர்களுக்கு எதிரான கொடுஞ்செயல்களை, தண்டனைகளை தடுத்து, போதிய பாதுகாப்பு அளிக்க உங்களது நிர்வாகம் கவனம் செலுத்த வேண்டும்.

இவ்வாறு அவர் கூறினார்.

தினதந்தி

சாத்தான் வேதம் ஓதுது