மல்யுத்த மன்னன் சுஷில்குமார்

2008-ம் ஆண்டு சீனாவின் தலைநகர் பெய்ஜிங்கில் நடைபெற்ற ஒலிம்பிக் போட்டியில், 66 கிலோகிராம் `பிரீஸ்டைல்' பிரிவில் வெண்கலம் வென்று இந்தியாவுக்குப் பெருமை சேர்த்தவர், மல்யுத்த வீரர் சுஷில்குமார்.

ஒலிம்பிக் மல்யுத்தப் போட்டிகளைப் பொறுத்தவரை, கடந்த 58 ஆண்டு காலமாக இந்திய அணி பதக்கம் எதுவும் வெல்லவில்லை. கடைசியாக 1952-ம் ஆண்டு பின்லாந்தின் ஹெல்சின்சியில் நடந்த ஒலிம்பிக் மல்யுத்தப் போட்டியில், இந்தியாவின் கசாபா ஜாதவ் முதன்முதலில் வெண்கலப் பதக்கம் பெற்று அசத்தினார். அப்போதைய விதிகளின்படி 52 முதல் 57 கிலோகிராம் பிரிவினருக்கான `பிரீஸ்டைல்' பிரிவில் இந்தச் சாதனையைப் படைத்தார்.

சுதந்திர இந்தியாவில் முதல் ஒலிம்பிக் தனிநபர் பதக்கம் வென்ற வீரரும் ஜாதவ் தான். அதற்கு முன்னர் 1900-ம் ஆண்டு நடைபெற்ற ஒலிம்பிக் போட்டியில் நார்மன் பிரிட்சர்டு என்பவர் ஓட்டப்பந்தயத்தில் இரண்டு வெள்ளிப் பதக்கங்களைப் பெற்றிருந்தார்.


மல்யுத்தப் போட்டிகளைப் பொறுத்தவரை, சர்வதேச அளவில் எந்தச் சாதனையையும் இந்தியா செய்துவிடவில்லை. 1952-ம் ஆண்டுக்குப் பிறகு ஒலிம்பிக்கிலும் பதக்கம் வெல்லாததால், இந்தியாவில் மல்யுத்தத்திற்கு பெரிய வரவேற்பு இல்லை. இந்த நிலையில் தான் ஒலிம்பிக்கில் வெண்கலம் வென்று சாதனை படைத்துள்ளார் சுஷில்குமார். இதன்மூலம் ஒலிம்பிக் போட்டியின் மல்யுத்த விளையாட்டில் `56 ஆண்டுகளுக்குப் பிறகு பதக்கம் வென்ற முதல் வீரர்' என்ற பெருமை அவருக்கு கிடைத்துள்ளது.

டெல்லியில் இருந்து பல கிலோமீட்டர்கள் தொலைவில் உள்ள `பாப்ராலா' என்ற இடத்தில் தான் சுஷில்குமார் பிறந்தார். பேருந்து ஓட்டுநரான சுஷிலின் தந்தையும் ஒரு மல்யுத்த வீரர் தான். உள்ளூரில் நடைபெறும் போட்டிகளில் அவர் கலந்து கொண்டுள்ளார். எனவே, தன்னுடைய மகனை சிறந்த மல்யுத்த வீரனாக்க வேண்டும் என்று ஆசைப்பட்டு, சுஷிலின் 14 வயதிலேயே டெல்லியில் உள்ள சட்டர்சால் மைதானத்துக்கு பயிற்சி பெற அனுப்பி வைத்தார்.

சுஷில்குமாருக்கு பயிற்சி அளித்தவர், முன்னாள் ஆசிய சாம்பியனான சட்பால் சிங். சிறந்த மல்யுத்த வீரரான இவர், 1972-ம் ஆண்டு நடைபெற்ற ஒலிம்பிக் போட்டியில் பங்குபெற்றவர். இவரிடம் தீவிர பயிற்சி மேற்கொண்ட சுஷில், மாநில மற்றும் தேசிய அளவிலான போட்டிகளில் முத்திரை பதிக்கத் துவங்கினார். 2004-ம் ஆண்டு ஏதென்சில் நடைபெற்ற ஒலிம்பிக் போட்டியில் பங்கேற்றவரால் 14-வது இடத்தை மட்டுமே பிடிக்க முடிந்தது. பின்னர் 2007-ம் ஆண்டு அசர்பெய்ஜானில் உள்ள பாகுவில் நடந்த உலக மல்யுத்த சாம்பியன்ஷிப் போட்டியில் பங்கேற்றார். அதில் 7-வது இடத்தையே அவரால் பெற முடிந்தது. அதே ஆண்டு கஜகஸ்தானில் உள்ள பிஸ்கேக்கில் நடந்த காமன்வெல்த் போட்டியில் தங்கத்தைக் கைப்பற்றினார்.

ஒலிம்பிக்கில் பதக்கம் வென்றது தான் தன் வாழ்வின் மறக்க முடியாத தருணம் என்று கூறும் சுஷில், ரெயில்வேயில் தலைமை டிக்கெட் பரிசோதகராகப் பணியாற்றியவர். ஒலிம்பிக்கில் பதக்கம் வென்றதும், அவருக்குப் பதவி உயர்வு கொடுத்து அரசு கவுரவித்துள்ளது.