மன்னாரில் விவசாயிகளுக்கு வழங்கப்படவிருந்த உழவு இயந்திரங்கள் இராணுவத்தின் வசம்

**சிவா** · **சிவா** Wed Feb 02, 2011 8:49 am

இந்திய அரசாங்கத்தினால் இலங்கை வடக்கு விவசாயிகளின் நலன் கருதி வழங்கப்பட்ட உழவு இயந்திரங்கள் பலவற்றை இராணுவம் பயன்படுத்தி வருவதாக தெரிய வருகின்றது.

இந்திய அரசாங்கம் இலங்கையின் வடக்கில் உள்ள விவசாயிகள் பயன்பெறும் வகையில் பெறுமதிமிக்க 500 உழவு இயந்திரங்களை இலங்கை அரசாங்கத்தினூடாக அன்பளிப்பு செய்துள்ளது.

அவற்றில் 60 உழவு இயந்திரங்கள் மன்னார் மாவட்டத்தில் உள்ள விவசாயிகள் பலனடைவதற்காக மன்னார் மாவட்டத்தில் உள்ள விவசாய திணைக்களங்களுக்கு வழங்குவதற்காக மன்னார் மாவட்டச் செயலகத்தில் ஒப்படைக்கப்பட்டது.

எனினும் 60 உழவு இயந்திரங்களில் 08 இயந்திரங்களை இரானுவத்தினர் தங்களின் தேவைக்காக கொண்டுசென்றுள்ளனர். எஞ்சிய 52 உழவு இயந்திரங்களும் வழங்கப்படாமல் உள்ளது.

விவசாயிகளுக்கு வழங்கப்படவிருந்த உழவு இயந்திரங்கள் சிலவற்றை இரானுவம் தம்வசப்படுத்திக்கொண்ட விடயம் இதுவரை வெளிவரவில்லை என்பதும் குறிப்பிடத்தக்கது.