சிலந்தி வலை

வலைகளை உருவாக்குவதற்கு என்றே சிலந்திகளின் வயிற்றுப்புறத்தில் 7 வகையான சுரப்பிகள் உள்ளன. ஆனால், ஒரு சிலந்தியிலேயே எல்லா வகையான சுரப்பிகளும் இருப்பது கிடையாது. சிலந்தியின் வகையைப் பொறுத்து சுரப்பிகளின் எண்ணிக்கையும், அளவுகளும் மாறுபடுகின்றன. ஒவ்வொரு சுரப் பியும் குறிப்பிட்ட ஒரு வேலைக்கான வலையை உருவாக்கப் பயன்படுகின்றன.

சுரப்பியில் இருந்து திரவம் வெளிவந்ததும், அதிலுள்ள புரத மூலக்கூறு தன்னுடன் தானே மறுபடியும் மறுபடியும் இணைந்து நீண்ட புரதச்சங்கிலியாக இறுகி விடுகிறது. இந்த புரதநாருக்கு `பைபுரோனின்' என்று பெயர் சூட்டிய விஞ்ஞானிகளால், இந்த அதிசயம் எப்படி நிகழ்கிறது என்பதை இதுவரை கண்டுபிடிக்க முடியவில்லை.

இதைவிட மிக ஆச்சரியமான விஷயம், சிலந்தி வலையின் வலிமை. மனிதர்களால் சாதாரணமாக 10 சென்டிமீட்டர் தூரத்தில் தெளிவாகப் பார்க்கக்கூடிய ஒரு பொருளின் தடிப்பு 25 மைக்ரான்கள். ஒரு சிலந்தி வலையிலுள்ள இழையின் தடிப்பு இந்த நுண்ணிய அளவைவிட நூறு மடங்கு நுட்பமானது. அதாவது, தோராயமாக 0.15 மைக்ரான்கள். இதையும் வலை மீது ஒளி பட்டு பிரதிபலிப்பதாலேயே காண முடிகிறது. இருந்தாலும், அதே பருமனுடைய உருக்கு இழைகளை விட சிலந்தி இழை உறுதி வாய்ந்தது. செயற்கை இழையான நைலான் நார்களை விடவும் அதிக இழுவைத்தன்மை கொண்டவை. பென்சில் அளவு தடிமன் கொண்ட சிலந்தி இழையால், பறந்து கொண்டிருக்கின்ற போயிங் 747 ரக விமானத்தைக்கூட இழுத்து நிறுத்திவிட முடியும்.

கம்பளியுடன் ஒப்பிடும்போது, சிலந்தி இழை அதிக நீரை உறிஞ்சும் தன்மை படைத்தது. வலையானது காற்றில் உலர்ந்து உடைந்து போகாமல் இருக்க இந்த நீர்ப்பிடிப்பு உதவுகிறது. அத்துடன் பாக்டீரியா, பூஞ்சைகள் போன்ற வற்றால் வலை சிதைந்து போகாமல் இருக்க, பொட்டாசியம் ஹைட்ரஜன் பாஸ்பேட் என்னும் பாதுகாப்புப் பூச்சையும் வலைமீது தடவி வைக்கிறது சிலந்தி.

வலை பின்னுவதற்கு, இரைகளைப் பிடிப்பதற்கு, முட்டைக் கூடுகள் கட்டுவதற்கு, ஆபத்தான சமயங்களில் நூலேணி செய்து தப்பிப்பதற்கு என பல்வேறு வேலைகளுக்கு இந்த இழைகளை சிலந்தி பயன்படுத்திக் கொள்கிறது.

சிலந்தி இழையின் இந்த சிறப்பான இயல்புகள், உயிர்த் தொழில்நுட்பத்தில் பல்வேறு ஆராய்ச்சிகளை முடுக்கி விட்டிருக்கின்றன. பாராசூட்டில் பயன்படுத்தப்படும் நூலிழைகள், ராணுவத்தில் பயன் படுத்தப்படும் குண்டு துளைக்காத உடைகள் ஆகியவற்றைத் தயாரிப்பதில் இந்தத் தொழில் நுட்பத்தைப் பயன்படுத்த ஆராய்ச்சியாளர்கள் முயன்று வருகின்றனர்.

தினதந்தி

பகிர்வுக்கு நன்றி தல