ஸ்பெக்ட்ரம் ஒதுக்கீடு: ராசாவிடம் சி.பி.ஐ. 3-வது முறையாக 9 மணி நேரம் விசாரணை

**சிவா** · **சிவா** Tue Feb 01, 2011 8:54 am

ஸ்பெக்ட்ரம் ஒதுக்கீடு: முன்னாள் மத்திய மந்திரி ஆ.ராசாவிடம் சி.பி.ஐ. 3-வது முறையாக 9 மணி நேரம் விசாரணை

புதுடெல்லி, பிப்.1- ஸ்பெக்ட்ரம் ஒதுக்கீடு தொடர்பாக, முன்னாள் மத்திய மந்திரி ஆ.ராசாவிடம் சி.பி.ஐ. அதிகாரிகள் 3-வது முறையாக விசாரணை நடத்தினர். இந்த விசாரணை, 9 மணி நேரம் நடைபெற்றது.

சுப்ரீம் கோர்ட்டு உத்தரவு

ஸ்பெக்ட்ரம் ஒதுக்கீடு தொடர்பாக, பெயர் குறிப்பிடாமல், தொலைத்தொடர்புத்துறை அதிகாரிகள் மீது சி.பி.ஐ. வழக்குப்பதிவு செய்துள்ளது. அமலாக்கப்பிரிவும் இவ்விவகாரம் பற்றி விசாரணை நடத்தி வருகிறது.

சி.பி.ஐ.யும், அமலாக்கப்பிரிவும் தங்களது விசாரணை குறித்த அறிக்கையை பிப்ரவரி 10-ந் தேதி தாக்கல் செய்ய வேண்டும் என்று சுப்ரீம் கோர்ட்டு ஏற்கனவே உத்தரவிட்டுள்ளது. அதன்படி, பிப்ரவரி 10-ந் தேதி, இவ்வழக்கு விசாரணைக்கு வருகிறது.

3-வது முறையாக விசாரணை

இந்நிலையில், ஸ்பெக்ட்ரம் ஒதுக்கீடு தொடர்பாக, முன்னாள் மத்திய தொலைத்தொடர்புத்துறை மந்திரி ஆ.ராசாவிடம் சி.பி.ஐ. அதிகாரிகள் நேற்று விசாரணை நடத்தினர். அவரிடம் கடந்த டிசம்பர் 24 மற்றும் 25-ந் தேதிகளில் இரண்டு தடவை சி.பி.ஐ. விசாரணை நடத்தியுள்ளது. நேற்று 3-வது தடவையாக விசாரணை நடத்தப்பட்டது. இதற்காக, காலையிலேயே சி.பி.ஐ. அலுவலகத்துக்கு ஆ.ராசா வரவழைக்கப்பட்டார்.

அவரிடம், ஸ்பெக்ட்ரம் ஒதுக்கீட்டுக்கு முந்தைய சூழ்நிலைகள், பண விவகாரம் ஆகியவை குறித்து விரிவாக விசாரணை நடத்தப்பட்டது. ஸ்பெக்ட்ரம் ஒதுக்கீட்டில், சில தொலைத்தொடர்பு சேவை நிறுவனங்களுக்கு சாதகமாக நடந்து கொண்டதாக கூறப்படுவது குறித்து அவரிடம் கேட்டனர்.

நீரா ராடியா

ஸ்பெக்ட்ரம் ஒதுக்கீடு பெற்ற தொலைத்தொடர்பு நிறுவனங்களின் கிளை நிறுவனங்களில் ஆ.ராசா குடும்பத்தினரின் தொடர்பு பற்றியும் விசாரித்தனர். ஸ்பெக்ட்ரம் ஒதுக்கீட்டுக்கு விண்ணப்பிக்கும் கடைசி தேதியை திடீரென முன்னால் கொண்டு வந்தது ஏன்? என்றும் கேட்டனர். அரசியல் பெண் தரகர் நீரா ராடியாவுடன் நடத்திய டெலிபோன் உரையாடல் பற்றியும் கேள்வி கேட்டனர்.

தொலைத்தொடர்புத்துறை அலுவலகங்களில் நடத்தப்பட்ட சோதனையின்போது கைப்பற்றப்பட்ட ஆவணங்களைக் காண்பித்து, சில கேள்விகளை கேட்டனர்.

9 மணி நேரம்

இந்த விசாரணை 9 மணி நேரம் நீடித்தது. விசாரணைக்கு பிறகு, ஆ.ராசா, அவரது வீட்டுக்கு செல்ல அனுமதிக்கப்பட்டார். இருப்பினும், அவர் மீண்டும் விசாரணைக்கு அழைக்கப்படுவார் என்று சி.பி.ஐ. வட்டாரங்கள் தெரிவித்தன.

அப்படி அழைக்கும்போது, சி.பி.ஐ. சோதனையில் கைப்பற்றப்பட்ட கம்ப்ïட்டர்களில் இருந்து எடுக்கப்பட்ட ஆவணங்களின் அடிப்படையில் சி.பி.ஐ. ஏராளமான கேள்விகள் கேட்கும் என்று சி.பி.ஐ. வட்டாரங்கள் தெரிவித்தன.

தினதந்தி