ஆயர்குல மக்களின் ஆண்டவர்!

அணிகோபநாதேஸ்வரர்

"தொண்டை நாடு சான்றோறுடைத்து' என்றாள் தமிழ் மூதாட்டி ஒüவை. காஞ்சி மண்டலம், தொண்டை நாட்டின் ஓர் பகுதி. இதற்கு "சத்திய விரத úக்ஷத்திரம்' என்றும் ஓர் பெயருண்டு. "சத்ய புத்ர' என்று தொண்டை நாட்டை, அசோகர் தன்னுடைய சிலா சாஸனத்தில் குறித்திருப்பதாக காஞ்சி பெரியவர் கூறியிருக்கிறார்.

"உலகமே மாறினாலும்கூட இந்தத் தொண்டை மண்டலத்தார் மட்டும் பொய்யே உரைக்கமாட்டார்கள்' என்று ஐயன் புகழேந்தி உரைத்துள்ளார்.

இத்தகைய பெருமை கொண்ட தொண்டை மண்டலத்தைச் சேர்ந்த கணியனூர், ஆற்காடு வட்டத்தில்- வேலூர் மாவட்டத்தில் உள்ளது.

கணியன் பூங்குன்றனார்:

"யாதும் ஊரே யாவரும் கேளீர்' என்று முழங்கிய சங்ககாலப் புலவரான கணியன் பூங்குன்றனார் இவ்வூரைச் சேர்ந்தவர் என்று செவிவழிச் செய்தி ஒன்று கூறுகிறது.

புராணம்:

கண்ணன் மீது மையல் கொண்ட கோபீகா ஸ்திரீகள், அவனையே கணவனாக அடைய வேண்டி ஈசனைத் துதித்தனர். அதற்காக பிருந்தாவனத்தில் கோயில் கொண்டிருந்த, "ஸ்ரீ கோபேஸ்வர மஹாதேவர்' என்ற சிவபெருமானையும், "காத்யாயனி' தேவியான அம்பாளையும் மனமுருகி வழிபட்டனர். இவ்வரலாறு கிருஷ்ணனின் புகழ்பாடும் ஸ்ரீமத் பாகவத புராணத்தில் கூறப்பட்டுள்ளது.

பிற்காலத்தில் இப்பெயர் கொண்ட சிவலிங்கங்கள் நம் நாட்டில் சில பகுதிகளில் பிரதிஷ்டை செய்யப்பட்டன. அப்படிப்பட்ட சிவலிங்கமே கணியனூரில் அருள் வழங்கும் "அணி கோப நாதேஸ்வரர்'. "கோப நாதர்' எனில் "ஆயர் குல மக்களின் ஆண்டவர்' என்பது பொருள்.

கோயிலின் அமைப்பு:

ஆற்காட்டிலிருந்து "திமிரி' வழியாகச் சென்றால், சுமார் 15 கி.மீ. தொலைவில் கணியனூர் உள்ளது.

ஈசன் குடிகொண்ட கோயில், கிழக்குப் புறம் ஒரு சிறிய வாயிலைக் கொண்டு அமைந்திருக்கிறது. வாயிலுக்கு சற்று எதிரே ஒரு கல் தீப ஸ்தம்பம் அமைந்திருக்கிறது. வெளிவாயிலுக்கு மேலே உள்ள மாடத்தில் ஈசன் ரிஷபாரூடராகக் காட்சியளிக்கிறார்.

கோயிலுக்குள் நுழைந்தால், உட்கோயிலின் முகப்பில் மற்றொரு இடப வாகனரும், ஈசனின் கருவறை விமானமும், அம்பிகையின் கருவறை விமானமும் தரிசனம் ஆகின்றன.

ஈசன் "அணி கோப நாதேஸ்வரர்' கருவறையில் கிழக்குப் பார்த்து காட்சியளிக்கிறார் சதுர ஆவுடையார்! கல்வெட்டு ஆதாரங்கள் சரிவரக் கிடைக்காத காரணத்தினால், கோயிலின் காலத்தைக் கண்டுபிடிக்க முடியவில்லை.

ஸ்ரீகாமாட்சியம்மன்:

அம்பிகை காமாட்சி, தெற்கு நோக்கிய தனி சந்நிதியில் தரிசனமாகின்றாள். நின்ற கோலத்தில் நான்கு திருக்கரங்களோடு, மேல் இரு திருக்கரங்களில், அங்குச- பாசம் ஏந்தி, கீழ் திருக்கரங்களில் அபய-வரத முத்திரை காட்டிக் காட்சியளிக்கிறாள். அம்பிகை சதுர பீடத்தில் ஆவுடையார் போன்ற அமைப்பின் மீது நிற்பதால் அம்பிகையின் சந்நிதியே சிவசக்தி சொரூபமாக கருதப்படுகிறது. பிராகாரத்தில் விநாயகா, முருகன், துர்கை சந்நிதிகளும், தீர்த்தக் கிணறும் உள்ளன. இக்கோயிலின் தலமரம், வில்வம்.

வீற்றிருந்த வீரராகவப் பெருமாள்:

ஈசன் கோயிலுக்கருகிலேயே இக்கோயில் உள்ளது. ஸ்ரீதேவி, பூதேவி சமேதராக வீற்றிருந்த நிலையில் பெருமாள் காட்சியளிக்கிறார். பின்னமான பெருமாளின் பழைய சிலை ஒன்று வாயிற்புறத்தில் உள்ளது. இவர் நம் கண்ணையும், கருத்தையும் கவர்கின்றார்.

இவ்வூரில் சிவன், பெருமாள் கோயில் தவிர பொன்னியம்மன் கோயிலும் மாரியம்மன் கோயிலும் உள்ளன.

குடமுழுக்கு:

அணி கோப நாதேஸ்வரர் கோயில் மிகச் சிறந்த முறையில் புனரமைக்கப்பட்டு, குடமுழுக்கு விழா நிறைவு பெற்றுள்ளது.

வழித்தடம்:

சென்னையிலிருந்து ஆற்காட்டிற்கும், திமிரிக்கும் நிறைய பேருந்து வசதி உள்ளது. ஆற்காட்டிலிருந்தும் திமிரியிலிருந்தும் கணியனூருக்கு பேருந்து வசதியும், ஆட்டோ வசதியும் உள்ளன. அணியணியாக அனைவரும் வருகை தந்து அணி கோப நாதேஸ்வரரின் புனிதமான தரிசனத்தைப் பெற்று ஆனந்திக்க வேண்டுகிறோம்.

- உமாசங்கரன்

கோவிலை தரிசித்தது போன்றதொரு பிரம்மையை ஏற்படுத்துகின்றது அண்ணா .
நன்றி தகவல் பகிர்வுக்கு .