கர்நாடகாவின் தகிடுதத்தோம் வேலை

தினமல்ர் செய்தி
மேட்டூர் அணை நீர்பரப்பு பகுதியில், பம்பிங் ஸ்டேஷன் அமைத்து, 20 கி.மீ., தூரம் வனப்பகுதியில் குழாய்கள் பதித்து, தங்கள் மாநிலத்தில் உள்ள கொள்ளேகால் தாலுகா, மாதேஸ்வரன் மலைக்கு குடிநீர் வினியோகம் செய்வதற்கான பணியை, கர்நாடக அரசு மேற்கொண்டுள்ளது, தமிழக விவசாயிகளை அதிர்ச்சியில் ஆழ்த்தியுள்ளது.
கர்நாடகா ஆண்டுதோறும், தமிழகத்துக்கு, 185 டி.எம்.சி., புதுச்சேரிக்கு 7 டி.எம்.சி., சேர்த்து மொத்தம், 192 டி.எம்.சி., நீர் வழங்க வேண்டும். தர்மபுரி மாவட்டம் ஒகேனக்கல் மேற்பகுதியில், பிலிகுண்டு பகுதியில் மத்திய அரசு நீர் அளவீடு மையம் அமைக்கப்பட்டுள்ளது. கர்நாடக அரசு, மேட்டூர் அணைக்கு திறக்கும் நீர் இங்கு அளவீடு செய்யப்படுகிறது.மேட்டூர் அணை, 152 சதுர கி.மீ., நீர்பரப்பு பகுதியைக் கொண்டது. அணையில் நீர் முழு கொள்ளளவில் இருக்கும் போது, ஒகேனக்கல் அருவி வரை நீர் தேங்கி நிற்கும். தமிழக எல்லையில் உள்ள பாலாறு வரை, மேட்டூர் அணையின் ஒரு பகுதியில் சேலம் மாவட்டமும், மற்றொரு கரையில் தர்மபுரி மாவட்டமும் உள்ளது. பாலாற்றில் இருந்து ஒகேனக்கல் வரை, மேட்டூர் அணை நீர்பரப்பு பகுதியின் ஒரு கரையில் கர்நாடக மாநிலமும், மற்றொரு கரையில் தர்மபுரி மாவட்டமும் உள்ளது.
தமிழக எல்லையில் உள்ள பாலாற்றில் இருந்து, கர்நாடக மாநிலம் மாதேஸ்வரன் மலை, 18 கி.மீ., தூரத்தில் உள்ளது. மாதேஸ்வரன் மலை பகுதியில் வசிக்கும் மக்கள், போர்வெல் குடிநீரையே நம்பியிருந்தனர். எனவே, கர்நாடக அரசு, தற்போது தங்கள் எல்லையில் உள்ள, மேட்டூர் அணை நீர்பரப்பு பகுதியில், பம்பிங் ஸ்டேஷன் அமைத்து, வனப்பகுதி வழியாக 20 கி.மீ., தூரம் குழாய் பதித்து, மாதேஸ்வரன் மலைக்கு குடிநீர் எடுக்கும் பணியை துரிதப்படுத்தியுள்ளது.குழாய்கள் பதிக்கும் பணி, இறுதிக் கட்டத்தை எட்டியுள்ள நிலையில், கர்நாடகா எல்லையில் உள்ள மேட்டூர் அணை நீர்பரப்பு பகுதியில், பம்பிங் ஸ்டேஷன் அமைக்கும் பணி மேற்கொண்டுள்ளது. அதற்காக காவிரியின் குறுக்கே மண் ரோடு அமைக்கும் பணி சில நாட்களாக நடந்து வருகிறது.கர்நாடகாவின் இந்த நடவடிக்கை, தமிழக விவசாயிகளை அதிர்ச்சியில் ஆழ்த்தியுள்ளது.
மேட்டூர் பொதுப்பணித் துறை அதிகாரிகள் கூறியதாவது:குடிநீர் தேவைக்காக, தங்கள் பகுதியில் உள்ள காவிரியில் இருந்து, கர்நாடகா குடிநீர் எடுக்கலாம். ஆனால், தற்போது கர்நாடகா குடிநீர் எடுக்கும் இடம், மேட்டூர் அணை நீர்பரப்பு பகுதி. எல்லை கர்நாடகாவிற்கு உரியது என்றாலும், தண்ணீர் மேட்டூர் அணைக்கு உரியது.எந்த அடிப்படையில், கர்நாடகா குடிநீர் எடுக்க திட்டமிட்டுள்ளது என்பது தெரியவில்லை. குடிநீர் அத்தியாவசிய தேவை என்பதால், மத்திய அரசு விதிமுறைக்கு உட்பட்டு, உயர்மட்ட அளவில் பேசி கூட குடிநீர் எடுக்க வாய்ப்புள்ளது. எனினும், இரு மாநிலம் சம்பந்தப்பட்ட பிரச்னை என்பதால், உயர் அதிகாரிகள் தான் இதற்கு விளக்கம் தர முடியும். இது தொடர்பாக உயர் அதிகாரிகளுக்கு தகவல் தெரிவித்துள்ளோம்.இவ்வாறு அவர்கள் கூறினர்.
குடிநீர் எடுப்பது நியாயமா?தமிழக விவசாயிகள் கேள்வி :நடுவர் மன்ற தீர்ப்புபடி, கர்நாடகா திறந்து விடும் நீரை, மத்திய நீர்வள ஆணையம், பிலிகுண்டு பகுதியில் இருந்து தமிழகத்துக்கு வழங்குகிறது. அந்த நீரில் இருந்து குடிநீர் எடுக்க தமிழக அரசு, 1,926 கோடி ரூபாய் செலவில் ஒகேனக்கல் கூட்டுக் குடிநீர் திட்டத்தை துவங்கியது.தமிழகத்துக்கு வழங்கிய நீரில் இருந்து, தமிழக மாவட்டங்களுக்கு குடிநீர் வழங்கும் ஒகேனக்கல் குடிநீர் திட்டத்துக்கு எதிர்ப்பு தெரிவித்து, கர்நாடக மக்கள் பல்வேறு போராட்டங்களை நடத்தினர். அதேநேரம் தமிழகத்துக்கு நீர் வழங்கிய பின், மேட்டூர் அணையில் தேக்கப்பட்டுள்ள அதே நீரில், கர்நாடக அரசு குடிநீர் எடுப்பது எந்த வகையில் நியாயம் என, தமிழக எல்லையோர மக்கள் கேள்வி எழுப்பியுள்ளனர்.மேட்டூர் அணை நீர்பரப்பு பகுதியில், கர்நாடகா குடிநீர் எடுப்பது தொடர்பாக, தமிழக அரசு விவசாயிகளுக்கு தகுந்த விளக்கம் அளிக்க வேண்டும் அல்லது குடிநீர் எடுக்கும் பணியை தடுத்து நிறுத்த வேண்டும் என்பதே தமிழக விவசாயிகளின் கோரிக்கை.