எகிப்து அதிபருக்கு எதிராக 10 லட்சம் பேர் திரண்டு போராட்டம் - ராணுவம் சுட மறுப்பு

எகிப்து அதிபருக்கு எதிராக 10 லட்சம் பேர் திரண்டு போராட்டம் - ராணுவம் சுட மறுப்பு; பேச்சுவார்த்தைக்கு அதிபர் அழைப்பு



கெய்ரோ, பிப்.2- எகிப்து அதிபருக்கு எதிராக 10 லட்சத்துக்கும் மேற்பட்டோர் திரண்டு நின்று போராட்டம் நடத்தினர். அவர்கள் மீது துப்பாக்கி சூடு நடத்த மாட்டோம் என்று ராணுவம் அறிவித்தது. பேச்சுவார்த்தைக்கு அதிபர் விடுத்த அழைப்பை எதிர்க்கட்சி நிராகரித்தது.

10 லட்சம் பேர் திரண்டனர்

எகிப்து நாட்டில் ஹோஸ்னி முபாரக் 30 ஆண்டுகளாக சர்வாதிகார ஆட்சி நடத்தி வருகிறார். அவருக்கு எதிராக கடந்த ஒரு வாரமாக பயங்கர கலவரம் நடந்து வருகிறது. அதில் சிக்கிய இந்தியர்கள் தாயகம் திரும்பி வருகிறார்கள். போராட்டக்காரர்களை அமைதிப்படுத்த, உமர் சுலைமான் என்பவரை துணை அதிபராக முபாரக் நியமித்தார். புதிய உளவுத்துறை தலைவரையும் நியமித்தார்.

ஆனால், போராட்டக்காரர்கள் சமாதானம் அடையவில்லை. ராணுவம் தனக்கு ஆதரவாக இருக்கும் என்ற முபாரக்கின் நம்பிக்கையும் பொய்த்து வருகிறது.

இந்நிலையில், முபாரக் பதவி விலகக்கோரி, நேற்று தலைநகர் கெய்ரோவின் மையப்பகுதியில் உள்ள தரிர் சதுக்கத்தில் (விடுதலைசதுக்கம்) 10 லட்சத்துக்கும் மேற்பட்டோர் திரண்டு நின்று போராட்டம் நடத்தினர். இதில், டாக்டர்கள், வக்கீல்கள், மாணவர்கள், பெண்கள், குழந்தைகள் என பலதரப்பினரும் கலந்து கொண்டனர்.

அவர்கள், முபாரக் பதவி விலகக்கோரி எழுதப்பட்ட பேனர்களை கையில் பிடித்தபடி பங்கேற்றனர். `முபாரக் ஒழிக', `முபாரக்கே பதவி விலகு' என்று கோஷங்களை முழங்கினர். முபாரக், சவூதிக்கோ, பக்ரைனுக்கோ தப்பி ஓட வேண்டும் என்று கோஷமிட்டனர். முபாரக்கின் உருவ பொம்மைகள், போக்குவரத்து விளக்கு கம்பத்தில் தொங்க விடப்பட்டன.

ராணுவம் அனுமதி

தரிர் சதுக்கத்துக்கு வந்தவர்களை ராணுவம் தடுக்கவில்லை. அடையாள அட்டையை மட்டும் பரிசோதித்து விட்டு, அவர்களை செல்ல அனுமதித்தனர். ராணுவ கவச வாகனங்கள், போராட்ட இடத்தை சுற்றிலும் நிறுத்தப்பட்டு இருந்தன.

போராட்டக்காரர்களின் கோரிக்கைகள் சட்டப்பூர்வமானவை என்பதால், அவர்கள் மீது துப்பாக்கி சூடு நடத்த மாட்டோம் என்று ராணுவம் அறிவித்துள்ளது. இதனால் போராட்டக்காரர்கள் அச்சமின்றி போராட்டத்தில் கலந்து கொண்டனர்.

பேச்சுவார்த்தை

இதற்கிடையே, அதிபர் முபாரக், போராட்டக்காரர்களுடன் பேச்சுவார்த்தை நடத்த அழைப்பு விடுத்துள்ளார். இத்தகவலை துணை அதிபர் உமர் சுலைமான் தெரிவித்தார்.

ஆனால் எதிர்க்கட்சி தலைவரும், அமைதிக்கான நோபல் பரிசு பெற்றவருமான முகமது எல்பராடி, பேச்சுவார்த்தைக்கான அழைப்பை நிராகரித்து விட்டார். அல் அரேபியா டெலிவிஷனுக்கு அளித்த பேட்டியில் அவர் கூறியதாவது:-

முதலில் போராட்டக்காரர்களின் கோரிக்கை ஏற்கப்பட வேண்டும். அதிபர் முபாரக் பதவி விலகி, நாட்டை விட்டு வெளியேற வேண்டும் என்பது தான் எங்கள் கோரிக்கை. அது நிறைவேறிய பிறகுதான் பேச்சுவார்த்தை நடத்தப்படும். இடைக்கால அரசு அமைப்பது பற்றியும், பாராளுமன்றத்தை கலைப்பது பற்றியும் பேச்சுவார்த்தை நடத்த விரும்புகிறோம். முபாரக் வெளியேறினாலே, எகிப்தில் அமைதி திரும்பி விடும்.

இவ்வாறு அவர் கூறினார்.

அமெரிக்க தூதர்

ஆனால், அதிபர் முபாரக் பதவி விலக விரும்பாததால், சிக்கல் நீடிக்கிறது. இதற்கிடையே, எகிப்து தலைவர்களுடன் பேச்சுவார்த்தை நடத்துவதற்காக, எகிப்துக்கான முன்னாள் தூதர் பிராங்க் ஒய்ஸ்னரை தனது சிறப்பு தூதராக அமெரிக்கா அனுப்பி வைத்துள்ளது.

முபாரக்கை வெறுத்த போதிலும், எதிர்க்கட்சி தலைவர் முகமது எல்பராடியை புதிய அதிபராக ஏற்க போராட்டக்காரர்களில் பலர் விரும்பவில்லை. இதனால், முபாரக்குக்கு பிறகு யார் என்ற குழப்பமும் ஏற்பட்டுள்ளது.

தினதந்தி