மூங்கிலிலே மிதிவண்டிகள் தயாரிப்பு!

ரபீக் · ரபீக் Sun Jan 30, 2011 3:43 pm

உலகத்தில் முதன்முறையாக, கட்டுமானத்திற்கு ஏற்ற மூங்கிலில் இருந்து ஈருருளியான மிதிவண்டிகளை தயாரிக்கும் திட்டத்தை கானாவில் தொடங்கியுள்ளனர்.

மூங்கிலால் ஆன சட்டங்கள் இலகுவாகவும், எஃகுவை விட வலுவாகவும் இருக்கின்றன. அத்தோடு விலையும் குறைவு. பேம்பு பைக்ஸ் லிமிடட் என்ற நிறுவனம் ஆப்ரிக்க சந்தைக்காக இந்த மூங்கில் மிதிவண்டிகளை தயாரிக்கவுள்ளது.

இத்திட்டத்தின் முன்னோடியான கொலம்பிய பல்கலைக்கழகத்தின் பேராசிரியர் ஜான் மட்டர் நிருபர்களிடம் கூறுகையில் "இந்த திட்டத்தின் நோக்கமே, சீனாவில் இருந்து இறக்குமதி செய்யப்படும் மிதிவண்டிகளுக்கு மாற்றாக குறைந்த விலையில் நல்ல தரமுள்ள மிதிவண்டிகளை இங்கே தயாரிக்க வேண்டும் என்பது தான் என்றார்.
இங்குள்ள மக்களுக்கு தரமான மிதிவண்டிகளை உருவாக்கி கொடுப்பதால், அறுவடையான பயிர்களை சந்தைகளுக்கு எடுத்து செல்ல முடியும், சுகாதார வசதிகளை தேடி செல்ல முடியும், கல்விச்சாலைகளுக்கு செல்ல முடியும் என்றும் தெரிவித்தார். முதற்கட்டமாக இவர்கள் 750 மூங்கிலான மிதிவண்டிகளை உருவாக்கவுள்ளதாக தெரிவித்துள்ளனர்.

மூங்கில் மிதிவண்டி உருவாக்கி வெள்ளோட்டம் பார்ப்பதற்கு கிட்டதட்ட இரண்டாண்டுகள் பிடித்துள்ளன. இந்த காலக்கட்டத்தில் கற்றுக்கொண்ட பாடங்களைக் கொண்டு உற்பத்தி கட்ட மாறுதல்கள் செய்யப்படும் என்றும் அதன் பின்னரே பெரும் சந்தைக்கான வர்த்தக ரீதியான உற்பத்தி நடைபெறும் என்றும் ஜான் மட்டர் கூறியுள்ளார்
மூங்கிலிலே மிதிவண்டிகள் தயாரிப்பு! Bamboobike