நெல்லை-தென்காசி :அகல பாதை பணிகள்

திருநெல்வேலி-தென்காசி இடையேயான அகல ரெயில்பாதை பணிகள் இந்த ஆண்டிற்குள் முடியும் என்று தெற்கு ரெயில்வே பொது மேலாளர் தீபக் கிரிஷன் கூறியுள்ளார்.


சென்டிரல் தெற்கு ரெயில்வே பொது மேலாளர் அலுவலகத்தில் நேற்று குடியரசு தின விழா கொண்டாடப்பட்டது. இந்த நிகழ்ச்சிக்கு தெற்கு ரெயில்வே பொது மேலாளர் தீபக் கிரிஷன் கலந்து கொண்டு, தேசியக் கொடியை ஏற்றி வைத்தார்.


காமன் வெல்த் போட்டிகள் மற்றும் சீனாவில் நடைபெற்ற ஆசிய விளையாட்டு போட்டிகளில் தெற்கு ரெயில்வே சார்பாக பங்கேற்று வெற்றி பெற்றவர்களை தீபக் கிரிஷன் கவுரவித்தார். மேலும் வீரத்திர செயல்கள் புரிந்ததற்காக இந்திய அரசின் விருதுக்காக தேர்ந்தெடுக்கப்பட்ட தெற்கு ரெயில்வே பாதுகாப்பு படை இன்ஸ்பெக்டர் எம்.எப். முகைதீனை பாராட்டி கவுரவித்தார். நிகழ்ச்சியில் தெற்கு ரெயில்வே பொது மேலாளர் தீபக் கிரிஷன்,


’’நடப்பு நிதியாண்டில் தற்போது நாகப்பட்டினம்-வேளாங்கண்ணி இடையே ரெயில் சேவை தொடங்கப்பட்டுள்ளது. விழுப்புரம்-வேலூர் இடையே உள்ள மீட்டர் கேஜ் பாதையை அகலபாதையாக மாற்றும் பணிகள் இறுதி கட்டத்தை எட்டியுள்ளது. விரைவில் பயணிகள் வசதிக்காக இங்கு ரெயில் போக்குவரத்து தொடங்கப்பட உள்ளது.


மேலும், இந்த நிதியாண்டின் இறுதிக்குள் திருநெல்வேலி-தென்காசி, மயிலாடுதுறை-திருவாரூர் மற்றும் திண்டுக்கல்-பழனி இடையேயான மீட்டர் கேஜ் பாதைகளை அகல ரெயில் பாதைகளாக மாற்றும் பணிகள், சேலம்-நாமக்கல் மற்றும் நாகூர்- காரைக்கால் இடையே புதிய ரெயில் சேவைகள் தொடக்கம் உள்ளிட்ட பணிகள் தொடங்க இலக்கு நிர்ணயிக்கப்பட்டுள்ளது.


கடந்த 2010-ம் ஆண்டு (ஏப்ரல்-டிசம்பரில்) 548.95 மில்லியன் பயணிகள் ரெயிலில் பயணம் செய்துள்ளனர். இது கடந்த ஆண்டை விட 6 சதவீதம் அதிகம் ஆகும். இதன் மூலம் தெற்கு ரெயில்வேயிற்கு ரூ.1,946.26 கோடி வருமானம் கிடைத்துள்ளது. இது கடந்த ஆண்டை விட 8 சதவீதம் அதிகம் ஆகும். மேலும் நடப்பு நிதியாண்டில் 1,349 சிறப்பு ரெயில்களை இயக்கியும் மற்றும் 5,526 உதிரி பெட்டிகளை பல்வேறு ரெயில்களில் இணைத்தும் உள்ளது.


2010-ம் ஆண்டு டிசம்பர் இறுதியில் ரெயில்வேயானது ரூ.3,429 கோடி வருமானம் ஈட்டியுள்ளது. இது முந்தைய ஆண்டை விட 5.2 சதவீதம் அதிகம் ஆகும். செலவு ரூ.3,668 கோடியாக இருந்தாலும் கடந்த ஆண்டில் ஏற்பட்ட செலவுத் தொகையான ரூ.3,776 கோடியை விட குறைவாகும்’’ என்று தெரிவித்தார்.