புத்திசாலி மனைவி v/s கணவன்.

விஜய் தொலைக்காட்சியில் - நீயா... நானா... நிகழ்ச்சி ஒன்றின் தலைப்பு இது. "புத்திசாலி மனைவி v/s கணவன்." இந்த பதிவுக்கும், அந்த நிகழ்ச்சிக்கும் எந்த தொடர்பும் இல்லை. தலைப்பு, இந்த பதிவுக்கும் பொருத்தமாக இருக்கலாம் என்பதால் தலைப்பை வைத்து கொண்டேன்.

புத்திசாலி கணவன் - மனைவி, புத்திசாலி கணவன் - புத்திசாலி மனைவி, சாமானிய கணவன் - சாமானிய மனைவி... இந்த மூன்று ஜோடிகளும் சந்திக்காத பிரச்சனைகளை எல்லாம், எழாத சிக்கல்களை எல்லாம் இந்த நான்காவது ஜோடி "புத்திசாலி மனைவி v/s கணவன்." சந்திக்கிறது. மற்ற எந்த ஜோடிகளையும் குறிப்பிடும் போதும், v/s என்று குறிப்பிடவில்லை. இந்த ஜோடிக்கு மட்டும் ஏன் v/s. என்ன காரணம். மனைவி புத்திசாலியாகவும், கணவன் சாமானியனாகவும் இருப்பதால்.

சரி. இப்படி ஜோடி அமைய பெற்றவர்கள் எல்லாம் மோதி கொண்டோ அல்லது மோதலுக்காண காரணங்கள் இருந்து கொண்டோ இருக்கும் என்று அர்த்தமா. இந்த ஜோடிகளுக்குள் மனவருத்தம் இருந்து கொண்டு தான் இருக்குமா. நான் பார்த்த பல ஜோடிகள் மோதலுக்குள்ளேயே தான் வாழந்து கொண்டிருக்கிறார்கள். இரண்டு வாரங்களுக்கு முன்னால், எங்கள் வீட்டிற்கு அருகாமையில் நடந்த ஒரு சம்பவமே, இந்த பதிவெழுத காரணம். அதை கடைசியாக சொல்லுகிறேன்.

புத்திசாலி மனைவி -கணவன் ஜோடிகளில் இரு வகைகள் உள்ளன. "நான் சாதாரணமான அறிவு பெற்றவன். என் மனைவி புத்திசாலி தான்" என்பதை நேர்மையாக ஒப்பு கொண்டு அல்லது ஏற்று கொண்டு, அதை கடுகளவு கூட பெரிது படுத்தாமல், "அவ சொல்றதை கேட்பதில் என்ன தப்பு இருக்கு" என்று யதார்த்தத்தை புரிந்து கொண்டு வாழ துவங்கினால், யாதொரு பிரச்சனையும் இராது. இது ஒரு வகை. ஆனால், இந்த மனோபாவம் அமைய பெற்ற கணவன்கள் மிக மிக குறைவே.

அடுத்த வகை... "தன் மனைவியின் புத்திசாலிசனத்தை சுத்தமாக ஏற்று கொள்ளாமலும், தானொரு புத்திசாலி இல்லை என்பதை ஏற்று கொள்ளாமலும்" இருக்கும் ரகம் மற்றொரு வகை. இவர்கள் மனதில் தான் மனைவியரின் நடத்தை குறித்து சந்தேகம் வருவது. அறிவோடு அழகும் இருந்து விட்டால், அந்த பெண்ணுக்கு வேறு வினையே இல்லை என்று சொல்லலாம்.

அப்படி தான் நடந்தது, நாமறிந்தவர்களின் வாழ்க்கை. அவர்கள் முதலில் எங்கள் தெருவில் தான் குடி இருந்தார்கள். அந்த பெண் அறிவோடும், அழகும் படைத்து இருந்தார். திருமணம் முடியும் வரை கிராமத்தில் வசித்தவர். அந்த கணவரை எனக்கு வெகு நாளாகவே தெரியும். சுய தொழில். வசதிக்கு பஞ்சமில்லை. பூர்விக சொத்து. மிக பெரிய காம்பவுண்ட் வீட்டின் மூலம் பல்லாயிரம் வாடகையாக கிடைத்தது. அப்பா தான் சொத்துகளை பராமரித்து வந்தார். கடை வைத்திருந்தார்கள். காலையில் பதினொரு மணிக்கு கடைக்கு போவார். போகும் போது, டாஸ்மாக் கடைக்கு போய் விட்டு தான் போவார்.

சில வருஷங்களுக்குள்ளாக குடும்பத்தின் நிலைமாறி சிக்கல் துவங்கியது. சில சொத்துக்கள் விற்கப்பட்டன. பணமாக, அவரவர் பங்கு பிரிக்கபட்டன. அந்த பெண்ணுக்கு புரிந்திருந்தது - தன் கணவன் புத்திசாலி இல்லை என்பது. அந்த பெண் மிக பெரிய புத்திசாலி. கிடைத்த பங்கு பணத்தை வைத்து, தங்கள் வாழ்க்கையை செப்பனிட முயற்சி கொண்டிருந்த வேளையில், தம்பதியருக்குள் மோதல் வெடித்தது. அவர் வேலைக்கே போகவில்லை. வீடு விற்று கிடைத்த பணத்தை வைத்து சாப்பிட்டு கொண்டிருந்தார்.

எவ்வளவு காலம் சாப்பிட முடியும். அந்த பெண், ஏதேனும் தொழில் புரிய வாய்ப்பு தேடிய போது, கணவர் மனைவியை சந்தேகப்பட்டார். "தானும் புரியோஜனமில்லாமல்... பிறரையும் புரியோஜனப்பட விடாமல்"... மோதல் தான் வளர்ந்தது. "பிரச்சனைக்கு தீர்வு சொல்லாமல் அல்லது தீர்வு சொல்ல தெரியாமல்"... "நீ வெளிய போகக்கூடாது, யாரோடும் பேசக் கூடாது, எதுவும் செய்யக்கூடாது" என்றால்...

சந்தேகம் எல்லாவற்றையும் கொன்றுவிடும். சந்தோஷம், அன்பு, நம்பிக்கை என்று ஆரம்பித்து கடைசியில் தன்னையே. சரியாக இருபது தினங்களுக்கு முன்பாக, கணவன் விஷம் குடித்து விட்டான். மிகவும் ஆபத்தான நிலையில் மருத்துவமனையில் சேர்க்கப்பட்டு, சிகிச்சை பலனளிக்காமல் ஐந்தாவது நாள் இறந்து போனான். இரண்டு குழந்தைகள்... வயது முறையே பதினொன்று மற்றும் ஐந்து.


புத்திசாலிதனமாய் இல்லாமல் இருப்பதில் தவறே இல்லை. தான் புத்திசாலி இல்லை என்பது தெரிந்தும், அதன் பிறகும் எதுவுமே கற்காமல் இருப்பது தான் தவறு.