அணு விஞ்ஞானி டாக்டர் அப்துல்கலாம்

**சிவா** · **சிவா** Sat Feb 05, 2011 1:52 pm

சர்வதேச அளவில் புகழ்பெற்றவர், அணு விஞ்ஞானி டாக்டர் அப்துல்கலாம். `கனவு காணுங்கள்' என்ற வார்த்தைகளின் மூலம் இளைஞர்களின் மனதில் எழுச்சி தீபம் ஏற்றியவர். மிகப்பெரிய விஞ்ஞானியாக இருந்தும், சிறிது கூட கர்வமோ, அகம்பாவமோ இல்லாதவர். அவருடைய வாழ்க்கையில் நடைபெற்ற சில சம்பவங்களைப் பற்றி இங்கு பார்ப்போம்.

தற்பெருமை இல்லாதவர்

இந்திய அணு ஆராய்ச்சி மையத்தில் பணியாற்றியபோது, ஒருமுறை கண் சிகிச்சைக்காக மதுரையில் உள்ள ஒரு புகழ்பெற்ற கண் மருத்துவமனைக்கு சென்றார், கலாம். அவரைப் பரிசோதித்த மருத்துவருக்கு, வந்திருப்பது தலைசிறந்த விஞ்ஞானியான அப்துல் கலாம் என்பது தெரியவில்லை. கலாமும் தன்னைப் பற்றி அறிமுகம் செய்து கொள்ளவில்லை.

கலாமைப் பரிசோதித்த மருத்துவர், "நீங்கள் உடனே முன்பணம் செலுத்தி உள் நோயாளியாக சேர்ந்து விடுங்கள்'' என்றார்.

பணம் கட்டும் இடத்திற்குச் சென்ற கலாம், முன்பணத்திற்கான தொகையை காசோலையாகத் தந்தார். ஆனால், அங்கிருந்த பெண்மணி, "இங்கு காசோலை ஏற்றுக் கொள்ளப்பட மாட்டாது. பணம் மட்டுமே செலுத்த வேண்டும்'' என்று கண்டிப்புடன் கூறிவிட்டார்.

அப்போது கலாமிடம் அவ்வளவு பணம் கையில் இல்லை. மருத்துவரிடம் தன் நிலமையை எடுத்துச்சொல்லி, ஒருவழியாக சிகிச்சை எடுத்துக்கொண்டு சில நாட்களில் வீட்டுக்குத் திரும்பினார்.

இதை அறியாத அவருடைய பாதுகாப்பு அதிகாரி, அந்த கண் மருத்துவமனைக்குச் சென்று விசாரித்திருக்கிறார். தன்னிடம் சிகிச்சை பெற்றவர் `புகழ்பெற்ற அணு விஞ்ஞானி அப்துல் கலாம்' என்பது அப்போது தான் மருத்துவருக்கு தெரிந்திருக்கிறது. உடனே கலாமுக்கு ஒரு கடிதம் எழுதி, தன்னை மன்னிக்குமாறு கேட்டுக் கொண்டார் அந்த மருத்துவர்.

தமிழ்க் காதல்

அறிவியல் மற்றும் பொறியியல் துறைகளில் ஆர்வம் கொண்டிருந்தாலும், கலாமுக்கு தமிழ் மொழியின் மீது தீராத பற்று இருந்தது. 11-ம் வகுப்பு வரை தமிழ்வழிக் கல்வி பயின்றவர், அதன்பிறகே ஆங்கிலவழிக் கல்விக்கு மாறினார். எம்.ஐ.டி. நடத்திய `ஆகாய விமானம் கட்டுவோம்' என்ற தமிழ்க் கட்டுரைப் போட்டியில் கலந்து கொண்டு முதல் பரிசு பெற்றார், கலாம். அறிவியல் துறையில் இருந்தாலும், அன்று முதல் இன்றுவரை தமிழின் மீது கொண்டுள்ள காதல் குறையாமலே உள்ளது.

கடின உழைப்பு

அது கல்லூரியின் இறுதிப் பருவம். பாடங்கள் முடிந்து `புராஜக்ட் ஒர்க்' எனப்படும் செயல்திட்டம் தொடங்கியது. கலாமுக்கும், அவருடைய குழுவுக்கும் `போர் விமானம்' ஒன்றை வடிவமைக்கும் பணி வழங்கப்பட்டது. மிகுந்த உற்சாகத்துடன் செயலில் இறங்கினார், கலாம்.

ஆனால், குறிப்பிட்ட நாட்களுக்குள் திட்டத்தை முடிக்க முடியவில்லை. இன்னும் 30 நாட்கள் அவகாசம் வேண்டுமென பேராசிரியரிடம் அனுமதி கேட்டார். ஆனால், பேராசிரியர் அதற்கு ஒத்துக் கொள்ளவில்லை.

"இன்னும் 3 நாட்களில் செயல்திட்டத்தை முடிக்க வேண்டும். இல்லையென்றால் உங்களுடைய கல்வி உதவித்தொகை நிறுத்தப்படும்'' என்றார் பேராசிரியர்.

அதைக்கேட்ட கலாமுக்கு வருத்தமாக இருந்தது. `தாம் படிப்பதே கல்வி உதவித்தொகையைக் கொண்டுதான். அதையும் நிறுத்தி விட்டால் என்ன செய்வது?' என்று நினைத்து கவலைப்பட்டார். ஆனால், மன உறுதியை மட்டும் தளர விடவில்லை.

தன்னுடைய கவலையைத் தூக்கி எறிந்தவர், உடனடியாக தன் குழுவினருடன் செயலில் இறங்கினார். சாப்பாடு, தூக்கத்தைப் பற்றி கவலைப்படாமல், இரவு, பகல் பாராமல் கடுமையாக உழைத்தார். 30 நாட்கள் அவகாசம் கேட்டவர், கடைசியில் மூன்றே நாளில் செயல்திட்டத்தை வெற்றிகரமாக முடித்து, பேராசிரியரிடம் பாராட்டு பெற்றார்.

மூன்று பேர்

கலாம், இன்றைக்கு இந்த அளவுக்கு விஞ்ஞானியாக வளரக் காரணமாக மூன்று பேரைக் குறிப்பிடலாம்.

1. பேராசிரியர் ஸ்பாண்டர் - இவர் தான் கலாமுக்கு காற்றின் வேகம், செயல்திறன், விளைவுகள் பற்றி கற்றுக் கொடுத்தவர்.

2. பேராசிரியர் பண்டலை - இவர் தான் விமானம் கட்டுவது, வடிவமைப்பது மற்றும் விமானத்தின் நுட்பங்கள் போன்றவற்றை கலாமுக்கு கற்றுத் தந்தவர்.

3. பேராசிரியர் நரசிங்கராவ் - இவர் தான் கலாமுக்கு காற்று இயக்க அறிவியலை கற்றுக் கொடுத்தவர்.