ஆயிரம் பொறியியல் கல்லூரிகளுக்கு நோட்டீஸ்: ஏ.ஐ.சி.டி.இ. தலைவர் மான்தா

தமிழ்ப்ரியன் விஜி · 26/06/2009

உள்கட்டமைப்பு வசதிகள் குறைபாடு தொடர்பாக நாடு முழுவதும் ஆயிரம் பொறியியல்
கல்லூரிகளுக்கு நோட்டீஸ் அனுப்பப்பட்டுள்ளது என அகில இந்திய தொழில்நுட்ப
கல்விக் கவுன்சில் (ஏ.ஐ.சி.டி.இ.) தலைவர் (பொறுப்பு) மான்தா கூறினார். இவற்றில் 9 நிறுவனங்கள் மீது முதல் தகவல் அறிக்கை (எஃப்.ஐ.ஆர்.) பதிவு செய்யப்பட்டுள்ளது என்றும் அவர் கூறினார். புதிய
பொறியியல் கல்லூரிகள் தொடங்குவதற்கு, மாணவர் சேர்க்கை, உள்கட்டமைப்பு
வசதிகள் தொடர்பான ஏ.ஐ.சி.டி.இ.-யின் புதிய நடைமுறைகள் தொடர்பான பயிலரங்கம்
சென்னை அண்ணா பல்கலைக்கழகத்தில் செவ்வாய்க்கிழமை நடைபெற்றது. இதில் பல்வேறு
பொறியியல் கல்லூரிகளின் நிர்வாகிகள் பங்கேற்றனர். கூட்டத்தில் புதிய
நடைமுறைகள் குறித்து விளக்கிய மான்தா, பின்னர் அளித்த பேட்டி:
ஆசிரியர்களுக்கு சரிவர ஊதியம் வழங்காதது, தொடர்ந்து தாற்காலிக கட்டடங்களில்
செயல்படுவது, கல்லூரி அமைந்துள்ள நிலத்துக்கு முறையான ஆவணங்கள் இல்லாதது
என பல்வேறு உள்கட்டமைப்பு வசதிகள் குறைபாடுடைய ஆயிரம் கல்லூரிகளுக்கு
ஏ.ஐ.சி.டி.இ. நோட்டீஸ் அனுப்பியுள்ளது. இதில் தமிழகத்தில் மட்டும்
140 கல்லூரிகளுக்கு நோட்டீஸ் அனுப்பப்பட்டுள்ளது. சரிவர பதிலளிக்காத,
நடவடிக்கை எடுக்காததால் 9 நிறுவனங்கள் மீது எஃப்.ஐ.ஆர். பதிவு
செய்யப்பட்டுள்ளது. ஏ.ஐ.சி.டி.இ. கொண்டு வந்துள்ள புதிய விதிமுறைகள்படி,
கம்பெனி சட்டம் பிரிவு (25)-ன் கீழ் பொறியியல் கல்லூரிகள் தொடங்கப்பட
வேண்டும். கல்லூரிகளே இல்லாத பின்தங்கிய பகுதிகளாக
கண்டறியப்பட்டுள்ள 241 மாவட்டங்களில் பொது, தனியார் பங்களிப்புடன்
கல்லூரிகளை அமைக்கவும், கட்டுதல் செயல்படுத்துதல் பின்னர் ஒப்படைத்தல்
திட்டத்தின்படி கல்லூரிகளை அமைக்கவும் அனுமதி அளிக்க முடிவு
செய்யப்பட்டுள்ளது. பொறியியல் முதுகலை படிப்புகளை மேம்படுத்த
பல்வேறு அம்சங்கள் புதிய விதிமுறையில் உள்ளன. இதன் மூலம் முதுகலை
படிப்புகளுக்கென தனி நிறுவனங்கள் உருவாக வாய்ப்பு உள்ளது. மேலும் ஒரு கல்லூரியின் பெயரில், வேறு பகுதியிலேயும் கல்லூரியை தொடங்க முடியும். நிலப்
பரப்பு எவ்வளவு? கிராமப் புறங்களில் பொறியியல் கல்லூரியைத் தொடங்க 10
ஏக்கர் நிலப் பரப்பு அவசியம். நகர்ப் புறங்களில் 2.5 ஏக்கர் இருந்தால்
போதும். பொது நுழைவுத் தேர்வு: பொறியியல் கல்லூரிகளில் சேர நாடு
முழுவதும் ஒரே நுழைவுத் தேர்வு என்பது, மாணவர்களுக்கு மிகவும்
பயனுள்ளதாகும். தகுதி: பொறியியல் படிப்புகளில் சேர பிளஸ் 2 தேர்வில்
பொதுப் பிரிவினர் குறைந்தபட்சம் 50 சதவீதம் மதிப்பெண்கள் பெற்றிருக்க
வேண்டும். இட ஒதுக்கீட்டின் கீழ் (ரிசர்வ்) சேருபவர்கள் 45 சதவீதம்
மதிப்பெண் பெற்றிருக்க வேண்டும். இதை குறைப்பதற்கு வாய்ப்பே கிடையாது.ஒரே
விதமான கல்விக் கட்டணம்: பொறியியல் படிப்பில் சேர நாடு முழுவதும் ஒரே
கல்விக் கட்டணம் என்ற நடைமுறையை தேசிய கட்டணக் குழு பரிந்துரைத்துள்ளது.
இதில் சில நடைமுறை சிக்கல்கள் உள்ளன. இதுதொடர்பாக மனிதவள மேம்பாட்டுத்
துறையுடன் பேசி வருகிறோம். விரைவில் இதுவும் நடைமுறைக்கு வர வாய்ப்பு
உள்ளது என்றார் மான்தா

நன்றி தினமணி