புல்லாங்குழல் வாசிக்கப்படட்டும்...(கவிஞர் செல்வா)

by j.selvaa Tue Jan 25, 2011 9:14 am

பருவ உணர்ச்சியென்னும்
முள் கிரீடத்தைச் சுமக்கும்
கன்னி மலர்களே !
உயிர்ப் பிணங்களே!

கல்யாணப் பத்திரிக்கையைத்தவிர
எல்லாப் பத்திரிக்கைக்கும்
ஆயுள் சந்தா செலுத்தியவர்களே!

ஜாதகம் என்னும்
சமூகச் சகதிக்குள்
சிக்கிச் சிதைந்துபோன
சித்திரங்களே!

கருவரையென்னும்
இருட்டறைக்குள்
கருக்கொண்டதால்
உங்களது கனவுகள்
கறுப்பாகிப்போனாதா?

சாஸ்திரவாதிகளின்
கால்களில் விழுந்தே
முதுகெலும்பு முடமாக்கப்பட்டு
இளமைக்காலம்
நரைத்துப்போனவளே!

உன் இளமைக்குச்
சிறகுகள் கிடைத்தும்
பறந்து செல்வதற்கு
வானம் வாய்க்கவில்லையா?

உன்பருவத்தின் மீது
காதல் நெருப்பு மூட்ட
தேசிங்குராஜன் இன்னும்
தேரோடு வரவில்லையா?

தேதி கிழித்தே
தேய்ந்து போனவளே..

உன் புல்லாங்குழல்
மூங்கிலாய் முளைக்கும்போதே
ஊமையாகும்படி
உத்தரவிடப்பட்டுவிட்டதா?

உனது மொட்டுக்கள்
மலர்வதற்கு முன்னரே
சருகாக்கும்படி
சபிக்கப்பட்டுவிட்டதா?

இந்தச் சமூகம்
உன் கைகளில்
விளக்குகளைத் தந்துவிட்டு
திரிகளை திருடிக்கொண்டதா?

இதழ்களைத் தந்துவிட்டு
புன்னகையை புடுங்கிங்க்கொண்டதா?

சுதந்திர இந்தியா
விடிந்த பிறகும்
ஆணாதிக்க காட்டுமிராண்டிகளுக்கு
உன் அழுகுரல்
கேட்கவில்லயா?
இல்லை....
சங்ககாலம் தொட்டு
சமகாலம் வரை
இன்னும் உன் கண்ணீர்
பரீசீலிக்கப்படவே இல்லையா?

போதுமடி சகோதரி
போதும் ....

சமூகவாதிகளுக்கு
செவிசாய்த்தே-உன்
இளமை நரைத்தது போதும்...

ஆண்வர்க்கம் நடத்திய
அடக்குமுறையில்
பெண்மையின் மென்மை
பேதலித்தது போதும்......

அறியாமையென்னும்
அடிமை விலங்கை
உடைத்தெறி...

அடக்குமுறையின்
ஆணிவேரை
அறுத்தெரி...

சருகாகும்படி-உன்னைச்
சபித்தவர்களை
விழி நெருப்பால்
பொசுக்கு...

சாஸ்திரங்களை
எரித்து
பெண்மையை உசுப்பு..

எதிர்வரும் நூற்றாண்டிலாவது
உன் பருவங்கள் புசிக்கப்படட்டும்.....
புல்லாங்குழல் வாசிக்கப்படட்டும்....

தமிழனாய் தலை நிமிரும்,

கவிஞர் செல்வா
காரியாபட்டி.

by **சிவா** Tue Jan 25, 2011 9:25 am

ஆண்களின் அடக்கு முறைகளை உடைத்தெறிய பெண்களுக்கு கூறப்பட்டுள்ள ஊக்க வரிகள் அருமை!

ஆனால் இப்பொழுது உள்ள பெண்களுக்கு அடிமை விலங்கிடப்பட்டுள்ளதா? ஆண் ஆதிக்கம் இன்னும் உள்ளதா? பெண்களுக்கு சுதந்திரம் இல்லையா?

எதிர்வரும் நூற்றாண்டு வரை பெண்கள் காத்திருக்க வேண்டியதில்லை. இப்பொழுதே அவர்களுக்கு முழுச் சுதந்திரம் கிடைத்துவிட்டது என்பதே என் கருத்து.

ஓரிரு இடங்களில் மட்டும், ஆணாதிக்கவாதிகள் மனைவியை அடக்கி வைக்கும் நிகழ்வுகள் இப்பொழுதும் உண்டு. ஆனால் 90% பெண்களுக்கு சுதந்திரம் உள்ளது.

by கலைவேந்தன் Tue Jan 25, 2011 12:03 pm

அருமையான சமூகச்சாடல் ... நன்றி கவிஞரே...!

by SK Tue Jan 25, 2011 12:08 pm

by ARR Tue Jan 25, 2011 12:13 pm

கவி வரிகளில் தாண்டவமாடும் சொல்லாடல்களைச் சுவைத்துக்கொண்டே வந்தபோது, கல்லாய் கடிபட்டது ஒரு வரி..

(எதிர்வரும் நூற்றாண்டிலாவது
உன் பருவங்கள் புசிக்கப்படட்டும்.....)

அட .. இதற்குத்தான் கவிஞர் எழுத்தாடினாரா என ஒரு ஆயாசம்.. அதற்குக்கூட ஒரு நூற்றாண்டு காத்திருக்க வேண்டுமோ..?