மாஸ்கோ விமான நிலையத்தில் மனித வெடிகுண்டு தாக்குதல், 31 பேர் பலி; 130 பேர் காயம்

மாஸ்கோ, ஜன.25- ரஷிய தலைநகர் மாஸ்கோ விமான நிலையத்தில் நடைபெற்ற மனித வெடிகுண்டு தாக்குதலில் 31 பேர் பலியானார்கள். 130 பேர் காயம் அடைந்தனர்.

31 பேர் பலி

ரஷிய தலைநகர் மாஸ்கோவில் டொமோடடோவோ விமான நிலையம் உள்ளது. ரஷியாவிலேயே அதுதான் மிகப்பெரிய விமான நிலையம். அந்த விமான நிலையத்தில் பயணிகள் வெளியேறும் வழியில், உடமைகளை எடுத்துக் கொள்ளும் பகுதியில் நேற்று பிற்பகலில் பயங்கர குண்டு வெடிப்பு நிகழ்ந்தது.

இந்த குண்டு வெடிப்பில் 31 பேர் பலியானார்கள். 130 பேர் காயம் அடைந்தனர். அவர்களில் 20 பேர் உயிருக்கு ஆபத்தான நிலையில் ஆஸ்பத்திரிகளில் அனுமதிக்கப்பட்டு உள்ளனர்.

மனித வெடிகுண்டு

குண்டு வெடிப்பை தொடர்ந்து, ஆங்காங்கே ரத்தம் தெறித்துக் கிடந்தது. விமான நிலையம் முழுவதும் கரும்புகை சூழ்ந்தது. உயிர் பிழைப்பதற்காக, பயணிகள் அங்குமிங்கும் ஓடினர். விமான நிலையத்தின் ஒரு சுவரை விமான நிலைய ஊழியர்களே இடித்து, பயணிகள் அவசரமாக வெளியேற வழி செய்தனர்.

2 மனித வெடிகுண்டுகள், தங்கள் உடலில் கட்டியிருந்த வெடிகுண்டுகளை வெடிக்கச் செய்து, இத்தாக்குதலை நிகழ்த்தியதாக நேரில் பார்த்தவர்கள் தெரிவித்தனர். போலீசாரும் அதே தகவலை தெரிவித்தனர். சம்பவம் பற்றி விசாரணைக்கு உத்தரவிடப்பட்டுள்ளது.

சம்பவத்தைத் தொடர்ந்து, ரஷியாவின் அனைத்து விமான நிலையங்களிலும் பாதுகாப்பை பலப்படுத்துமாறு அதிபர் டிமித்ரி மெட்வடேவ் உத்தரவிட்டுள்ளார். பிரதமர் விளாடிமிர் புதினுக்கும் சம்பவம் பற்றி தெரிவிக்கப்பட்டுள்ளது. குண்டு வெடிப்பையடுத்து, ரஷிய பங்குச்சந்தையில் வீழ்ச்சி ஏற்பட்டது.

தினதந்தி!

கடவுளே என்றுதான் இந்த மனிதப் படு கொலைகளுக்கு முடிவு வரப்போகுதோ தெரியல ..

எங்கெங்கு காணினினும் மனிதக் கொலைகள் தான் !!

கடவுளே எதுக்குதான் இப்படி அநியாயம் பண்ணுராங்களோ.
இப்படி மனித உயிர்களை கொன்னு என்னத்த சாதிக்க போராணுகளோ.
இவனுக்களுக்கு எல்லாம் கொதிக்கர எண்ணையில் போட்டு வருக்கற தண்டனை தரணும்.

இறந்தவர்கள் ஆத்மா சாந்தி அடைய என் பிரார்த்தனைகள்