சுவிஸ் கறுப்புப் பண பட்டியல் விவரம்: ஓராண்டு காத்திருக்க வேண்டும்

புதுடில்லி : சுவிட்சர்லாந்து நாட்டு வங்கிகளில்,
இந்தியர்கள் குவித்துள்ள கறுப்புப் பணம் தொடர்பான விவரங்களைப் பெற வேண்டும்
எனில், மத்திய அரசு, இன்னும் ஓராண்டு காத்திருக்க வேண்டும். ஏனெனில், இது
தொடர்பாக போடப்பட்ட ஒப்பந்தம், இந்த ஆண்டு இறுதியில் தான் செயல்பாட்டிற்கு
வருகிறது.
சுவிட்சர்லாந்து உட்பட, பல அன்னிய நாட்டு வங்கிகளில், இந்தியாவைச்
சேர்ந்த அரசியல்வாதிகள் உட்பட பலர், ஏராளமான அளவில் கறுப்புப் பணத்தை
டிபாசிட் செய்துள்ளதாகவும், அந்தப் பணத்தை மீட்டுக் கொண்டுவர, நடவடிக்கை
எடுக்கும்படி மத்திய அரசுக்கு உத்தரவிடக் கோரியும், சுப்ரீம் கோர்ட்டில்
மனு தாக்கல் செய்யப்பட்டு, அது தொடர்பாக விசாரணை நடந்து வருகிறது.
இந்நிலையில், சுவிட்சர்லாந்து நாட்டின் நிதித்துறை தகவல் தொடர்பாளர் கூறியுள்ளதாவது:
இந்தியர்கள் குவித்துள்ள கறுப்புப் பணம் தொடர்பான விவரங்களை,
சுவிட்சர்லாந்து வங்கிகளிடம் இருந்து பெறுவதற்காக இந்திய அரசு, எங்கள்
நாட்டுடன் ஒப்பந்தம் ஒன்றை செய்துள்ளது. இந்த ஒப்பந்தத்திற்கு, இந்தியாவில்
உள்ள பல்வேறு துறையினரும், சுவிட்சர்லாந்து பார்லிமென்ட் உட்பட, அங்குள்ள
பல்வேறு நிர்வாகத்தினரும் ஒப்புதல் அளிக்க வேண்டும். இந்த ஒப்புதல்களைப்
பெற, இந்த ஆண்டு இறுதியாகிவிடும். அதன்பின்னரே ஒப்பந்தம் அமலுக்கு
வரும்.அதனால், இந்தியாவில் வரி ஏய்ப்பு செய்தும், நிதி ரீதியான குற்றங்கள்
புரிந்தும், சுவிட்சர்லாந்து நாட்டு வங்கிகளில் பணத்தைப் போட்டவர்கள்
பற்றிய விவரங்கள், 2012ம் ஆண்டு ஏப்ரல் மாதத்திற்கு பிறகுதான் தெரிய வரும்.
இவ்வாறு தகவல் தொடர்பாளர் கூறினார்.
இதற்கிடையில், லீடென்ஸ்டீன் நாட்டு அரசின் தகவல் தொடர்பாளர் கூறியுள்ளதாவது:
கறுப்புப் பண விவகாரத்தில், நிர்வாக ரீதியான சில உதவிகளை இந்திய அரசு
கோரியுள்ளது. அத்துடன், எங்கள் நாட்டு வங்கிகளில் பணத்தை டிபாசிட்
செய்துள்ள இந்தியர்கள் பற்றிய விவரங்களையும் கேட்கிறது. தற்போதைய நிலையில்
இந்தியாவின் வேண்டுகோளுக்கு நாங்கள் ஆட்பட முடியாது.ஏனெனில், இந்தியாவின்
கோரிக்கை சட்ட ரீதியானது அல்ல. கறுப்புப் பண டிபாசிட்தாரர்கள் பற்றிய
தகவல்களை தர, இரு நாடுகள் இடையே ஒப்பந்தம் எதுவும்
மேற்கொள்ளப்படவில்லை.லீடென்ஸ்டீன் அரசு, வரி ஒப்பந்தம் தொடர்பாக
இந்தியாவுடன் பேச்சுவார்த்தை நடத்த விருப்பம் தெரிவித்துள்ளது. ஒரு வேளை
அப்படி ஒப்பந்தம் ஏற்பட்டால், இந்தியாவில் வரி ஏய்ப்பு செய்து மற்றும்
நிதிக் குற்றங்களில் ஈடுபட்டு, எங்கள் நாட்டு வங்கிகளில் பணத்தைப்
போட்டவர்கள் குறித்த விவரங்களை எதிர்காலத்தில் நாங்கள் தர முடியும்.இவ்வாறு
லீடென்ஸ்டீன் தகவல் தொடர்பாளர் கூறினார்.
அதிக கண்காணிப்பு : சுவிஸ் வங்கியிலும் மற்ற நாடுகளின்
வங்கிகளில் உள்ள கறுப்புப் பணத் தகவலை, "விக்கி லீக்ஸ்' வெளியிடுவதாக வந்த
தகவல் புதிய பிரச்னையை எழுப்பியிருக்கிறது. சுவிஸ் வங்கிக் கணக்கில், 2,000
பேர் தங்கள் பணத்தை கறுப்புப் பணமாக சேமித்திருப்பதாக தகவல்
கூறப்படுகிறது.அதே சமயம், இம்மாதிரி ஏதாவது தகவல் கசிந்தால், அது
பிரச்னையாக உருவெடுக்கும் என்ற அச்சத்தில், இம்மாதிரி சேமித்தவர் ரியல்
எஸ்டேட், விவசாயம், அடிப்படை கட்டுமானத்தில் வேறு வழியாக தங்கள் பணத்தை
இந்தியாவுக்குள் அன்னிய மூலதன முதலீடு என்ற போர்வையில் கொண்டு வரலாம்
என்றும் அரசு கருதுகிறது.ஆகவே, "செபி' மற்றும் ரிசர்வ் வங்கி ஆகிய இரு
அமைப்புகளும், அன்னிய முதலீடுகளில் கறுப்புப் பண வருகை இருக்கிறதா என
கண்காணித்து வருவதாக கூறப்பட்டது.

சுத்தம் , எவங்க என்னைக்கு ஒப்பந்தம் போட்டு, எப்ப லிஸ்ட் வாங்குவது? NOT IN NEAR FUTURE எல்லா அரசியல் வாதிகளுக்கும் இனிப்பான செய்தியாக இருக்கும், நமக்கு தான் வயிறு
எரிகிறது

மத்திய அரசு எப்படி வெளிநாட்டு வங்கிகளில் பணம் போட்டுள்ளவர்கள் பட்டியலை வெளிக்கொணரும்? முதல் பெயர் கட்சித்தலைவியின் பெயரும், இரண்டாவது பெயர் இளைஞரணித்தலைவர் பெயரும் அதிலிருக்கும். மேலும் விவரங்கள் தெரியவேண்டுமாயின் 19.01.2011 தேதியிட்ட தினமணி நாளிதழைப் பார்க்கவும். குருமூர்த்தி மிக நீண்ட கட்டுரை பல்வேறு ஆதாரங்களைச்சுட்டிக்காட்டி எழுதியுள்ளார். 2006ஆம் ஆண்டிலிருந்தே இதுபோன்று விவரங்கள் பல நாளிதழ்களில் வந்துள்ளதாகவும் ஆனால் இதுவரை சம்பந்தப்பட்டவர்கள் வாயைத்திறக்கவில்லையாம் அல்லது செய்தி பொய் என்றால் மானநஷ்ட வழக்கும் போடவில்லையாம்.