தமிழ் சாப்ட்வேருக்கு ரூ.1 லட்சம் பரிசு தமிழக அரசு அறிவிப்பு

by **சிவா** Tue Aug 25, 2009 11:33 am

சிறந்த தமிழ் மென்பொருளுக்கு ரூ.1 லட்சம் பரிசு வழங்க தமிழக அரசு முடிவு செய்துள்ளது. இதுகுறித்து தமிழக அரசு வெளியிட்ட அறிக்கையில் கூறியிருப்பதாவது: கணினி யுகத்துக்கேற்ப தமிழ் வளர்ச்சியை கருத்தில் கொண்டு, ஆண்டுதோறும் சிறந்த தமிழ் மென்பொருளுக்கு கனியன் பூங்குன்றனார் பெயரில் ரூ.1 லட்சம் மற்றும் பாராட்டிதழ் வழங்க தமிழக அரசு முடிவு செய்துள்ளது.

2009 & 2010ம் ஆண்டு பரிசுக்குரிய விண்ணப்பங்கள் அடுத்த மாதம் 15ம் தேதிக்குள் தமிழ் வளர்ச்சி இயக்குனர், தமிழ் வளர்ச்சி வளாகம் முதல் தளம், ஆல்ஸ் சாலை, எழும்பூர், சென்னை & 600008 என்ற முகவரிக்கு வந்து சேர வேண்டும். இந்த மென்பொருள், தமிழ் வளர்ச்சியை கருத்தில் கொண்டு உருவாக்கப்பட்டதாக இருக்க வேண்டும்.

மென்பொருள் கடந்த 3 ஆண்டுக்குள் தயாரிக்கப்பட்டிருக்க வேண்டும். தனி ஒருவராலோ, கூட்டு முயற்சியாலோ, நிறுவனத்தாலோ உருவாக்கப்பட்டிருக்கலாம். கூட்டு முயற்சி என்றால் பரிசுத் தொகை பகிர்ந்தளிக்கப்படும். பதிவுக் கட்டணம் ரூ.100, பணம் அல்லது டிடியாக செலுத்தலாம். இவ்வாறு அரசு வெளியிட்ட அறிக்கையில் தெரிவித்துள்ளது.