ஆயுதப்போட்டி, இராணுவ மேலாதிக்கத்தில் சீனாவுக்கு ஆர்வம் இல்லை : சீன ஐனாதிபதி

ஆயுதப் போட்டியிலோ அல்லது ஏனைய நாடுகளின் மீது இராணுவ ஆதிக்கம் செலுத்துவதிலேயோ சீனாவுக்கு ஆர்வம் இல்லையென அந்நாட்டு ஜனாதிபதி ஹூஜிந்தாவோ தெரிவித்துள்ளார்.
அமெரிக்காவுக்கான விஜயத்தை மேற்கொண்டிருக்கும் ஹூ ஜிந்தாவோ இருநாடுகளிடையேயுமான பொருளாதார மற்றும் பாதுகாப்பு விவகாரங்கள் குறித்த ஒத்துழைப்புக்கும் அழைப்பு விடுத்துள்ளார்.

முன்னணி அமெரிக்க அரசியல்வாதிகள் பலரைச் சந்தித்த ஹூ சிக்காக்கோவிற்கு புறப்படுவதற்கு முன்னர் பல்வேறு கருத்துகளை வெளியிட்டுள்ளார்.

சிக்காக்கோவில் அம்மாகாண மேயர் ரிச்சர்ட் பலே மற்றும் அரசியல் வர்த்தகப் பிரமுகர்களுடன் இராப்போசன விருந்துபசாரத்தில் கலந்து கொண்டுள்ளார்.

22 வருடகாலமாக சிக்காக்கோ மேயராக இருந்து வரும் டலே 2004 ஆம் ஆண்டிற்குப் பின்னர் 4 தடவைகள் சீனாவுக்கு விஜயம் மேற்கொண்டு திரும்பியதுடன், சிக்காக்கோவை அமெரிக்காவின் 3 ஆவது பாரிய நகராக்கி உலக வர்த்தக மையமாக்கியுமுள்ளார்.

சிக்காக்கோவிற்கும் சீனாவுக்கும் இடையில் பாரிய இடைவெளி இருந்தும் நட்பினூடாக எமது இதயங்கள் இணைந்துள்ளனவென ஹூ இராப்போசனத்தின்போது உரை நிகழ்த்துகையில் கூறியுள்ளார்.

இதேவேளை, சீனாவின் மிக நெருங்கிய அமெரிக்க நகர் என்ற பெருமையை சிக்காக்கோ பெற வேண்டுமென்பதே அந்நகரின் நீண்டகால இலக்கு என மேயர் டலே,ஹூவின் கருத்துக்கு பதிலளித்து கூறியுள்ளார்.

அமெரிக்கத் தலைநகருக்கு வெளியில் சிக்காக்கோ நகருக்கு மட்டுமே ஹூ விஜயம் மேற்கொண்டுள்ளார்.

சிக்காக்கோவிலுள்ள சீனமொழி மற்றும் கலாசார நிலையத்திற்கும் ஹூ விஜயம் மேற்கொண்டிருந்தார்.

சிக்காக்கோவிற்கான விஜயத்தை மேற்கொள்வதற்கு முன்னர் வாஷிங்டனில் கருத்துத் தெரிவித்த ஹூ,

அமைதி நிறைந்த அபிவிருத்திக்கான பாதையில் சீனா தொடர்ந்தும் தனது பங்களிப்பினை வழங்கும். நாம் எந்தவிதமான ஆயுத மோதல்களிலும் ஈடுபடவில்லை.அத்துடன் எந்த நாட்டுக்கும் இராணுவ அச்சுறுத்தலை விடுக்கவில்லை.ஆக்கிரமிப்பு கொள்கையையோ ஆதிக்கம் செலுத்தும் நிலையையோ சீனா ஒருபோதும் கொண்டிருக்கவில்லை.

இரு நாடுகளிடையேயுமான உறவு வரலாற்று ரீதியாக இலகுவாகவும் இறுக்கமாகவும் பேணப்பட்டது.அக்காலங்களில் இருதரப்பின் நலன்களில் அக்கறை செலுத்தப்பட்டது.

இரு நாடுகளும் இரு தரப்பினரையும் பரஸ்பர மரியாதை அடிப்படையில் சமமாக நடத்த வேண்டும்.ஆனால், தாய்வான் மற்றும் திபேத் விவகாரங்களுடன் ஒப்பிடுகையில் அவை சீனாவின் பிராந்திய ஒருமைப்பாடு மற்றும் இறையாண்மைப் பிரச்சினை எனத் தெரிவித்தார்

விடுப்பு குலுமம்