சுருதி வந்து சேருகின்ற காலம்

mkamal · mkamal Sat Jan 22, 2011 9:05 am

சுருதி வந்து சேருகின்ற காலம்
(பி. எம். கமால்)

பேசவறி யாமல் மண்ணில் பிறந்ததுமே அழுகின்ற
பிள்ளை மனம் பெறுவதுவே ஞானம்- அது
இல்லை யெனில் உள்ளம்பெறும் ஊனம் !

வாசலறி யாமல் தினம் வந்துவந்து மோதுகின்ற
எண்ணம் "ஒன்றில்" இணைவதுவே ஞானம் !-அதை
ஏந்துகின்ற இதயமதே ஏனம் !

தன்னுடலை மறந்து நிதம் தனிமையிலே ஏங்கி ஒளி
தன்னுளத்தில் ஏந்துவதே ஞானம் !-அதில்
தழைத்து வரும் இன்பசுக மோனம் !

கண்ணுடலில் இருப்பதுபோல் கள்ளமற்ற உள்ளமதில்
கண்ணொன்று விழிப்பதுவே ஞானம் !-அது
காட்டிவிடும் ஏழேழு வானம் !

வான்மழையைப் போல் சுத்த மோடு இந்தப் பூமியிலே
வாழ வைக்கும் பேரிறைவன் ஞானம் !-அது
வழங்குவதோ போதைமிக்க பானம் !

(தொடரும்)

கலைவேந்தன் · கலைவேந்தன் Sat Jan 22, 2011 9:21 am

இலக்கியச்செறிவோடு கவனமாகப் புனையப்பட்ட கவிதை என்று அறிகிறேன். எதுகையும் மோனையும் லயமும் நிறைந்து முழுமை பெற்று விளங்கிடும் கவிதை தான்..!

இருப்பினும் ஞானம் என்ற சொல்லுக்காய் கொஞ்சம் சிரமப்பட்டு சொற்களைத் தேர்ந்தெடுக்கும் ஆர்வத்தில் ஒரு சில சொற்கள் வலுக்கட்டாயப்படுத்தப்பட்டது போல் தோன்றுவதைத் தவிர்க்க இயலவில்லை. உதாரணம் : ஏனம்..என்னும் சொல்.

ஏனம் என்னும் சொல்லின் பொருளறியாமல் விழிக்கின்றேன்.

மற்றபடி தலைசிறந்த கவிதைகளில் வைத்துப் பாராட்டும் சிறப்பு இக்கவிதைக்கு உண்டு எனச் சான்றளிக்கிறேன்.

வாழ்த்துகள் கமால்... தொடருங்கள்..!

mkamal · mkamal Sat Jan 22, 2011 11:30 am

அன்புச் சகோதரர் கலை அவர்களுக்கு கலையாத எனது காலை வணக்கங்கள் !
தங்களின் செறிவுள்ள அறிவுள்ள உயர்ந்த விமரிசனங்களூக்கு யென் அன்பு நன்றிகள்.
ஏனம் யென்றால் பாத்திரம் என்று பொருள். இதயம் ஏனமாக்கப்பட்டுள்ளது

மீண்டும் நன்றிகள்

அன்புடன்
கமால்