மௌன தவம்

mkamal · mkamal Thu Jan 20, 2011 7:00 pm

மௌன தவம் !
(பி. எம். கமால், கடயநல்லூர்)
மிராஜ் !-
இறைவனின் பார்வை விரிப்பில்
ஒரு ஒளியின் முன்னேற்றம் !

நாயகமே !
நீங்கள்
பூமியிலிருந்தே
சுட்டு விரல் அசைத்ததால்
வட்ட நிலா
வாய் பிளந்தது !
உயரே சென்றபோது
வானம் வழி விட்டதில்
வியப்பென்ன ?

சொர்கத்தின் சொர்க்கமே !
நீங்கள்
மஸ்ஜிதுல் அக்ஸாவில்
இமாமாக நின்றபோது
ஈடில்லாத் தொழுகைஎன்று
தன்னை
இனங்காட்டிக் கொள்வதற்கு
தொழுகை கூட
ஒழுச்செய்து கொண்டதோ ?

நாயகமே !
உங்கள் இமைகளின் அசைவில்
நரகத்தில் கூட
சுகந்தம் வீசியது !
கஸ்தூரி வாடை
கமழ்ந்து நிறைந்தது !
வசந்தம் அங்கே
வந்து நின்றது !
சுவனத்தைப் பற்றிக்
கேட்கவா வேண்டும் ?

பேரொளிப் பெட்டகமே !
இருந்துவந்த இடத்திற்கு
திரும்பவும் சென்றது
இறையருள் இன்சுவை
விருந்துண்ண த்தானோ ?

ஐம்பது வேளை
விருந்துண்டால் நாங்கள்
ஜீரணிக்க மாட்டோம்
என்றுதானோ
ஐவேளை விருந்தை
ஆன்மாவின் மருந்தை
கொண்டு வந்து
எங்களை குதூகலப்
படுத்தினீர்கள் ?

சென்று வந்ததைச்
சொன்னபோது
அபூ ஜஅல்கள்
ஆர்ப்பாட்டம்
செய்தார்கள் !
நம்பிக்கை இல்லாமல்
நகைக்கவும் செய்தார்கள் !
உண்மைச் சூரியனை
உள்ளங்கை மறைத்திடுமா ?

நாயகமே !
நீங்கள்
இறைவனிடம் வாங்கிவந்த
முகவரியை வைத் துத்தானே
இப்பால் இருந்துகொண்டு
விண்ணுக்கு
"அப்போலோ)" கடிதம்
அழகாய் எழுதுகிறோம் ?

இமை முத்தம்
இடுவதற்குள்
இறைவனின் முன் சென்று
இதயத்தில் முத்திரையைப்
பெற்று வந்த நாயகமே !
வானத்தின் எல்லையைக்
கண்டு வந்த பின்
பூமியின் ஆழத்தைக்
காணவோ
மதீனத்து மண்ணினுள்
ஒரு மௌன தவம் ?

மௌன தவம்

மௌன தவம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக