வந்தது செல்போன்... இழந்தது கவுரவம்...

நான் ஆசிரியர் பயிற்சி மாணவர். அன்று, கல்வி இறுதி தேர்வு எழுத சென்றிருந்தேன். இன்னொரு கல்லூரியில் இருந்தும் நிறைய மாணவ, மாணவிகள் பரீட்சை எழுத வந்திருந்தார்கள். பரீட்சை நடந்த அறைக்குள் செல்போன் கொண்டுசெல்லக்கூடாது என்றுகூறி, அறை கண்காணிப்பாளரிடம் அவைகளை கொடுத்து விடும்படி கூறினார்கள்.

நானும் எனது செல்போனை `சுவிட்ச் ஆப்' செய்து எனது ஹால் சூப்பர்வைசரிடம் கொடுத்து விட்டு, பரீட்சை எழுதச் சென்றேன். நன்றாக எழுதிய சந்தோஷத்தில் வெளியே வந்து, எனது செல்போனை திரும்ப வாங்காமலே பஸ்நிலையம் வரை வந்துவிட்டேன். திடீரென்று ஞாபகம் வர, உடனே கல்லூரிக்கு வந்து ஹால் சூப்பர்வைசரை தேடிக் கண்டுபிடித்து, எனது செல்போனை திரும்பத் தருமாறு கேட்டேன். ஆனால் அவர், `வேறொரு மாணவர் வந்து தனது நண்பனின் செல்போன் என்றுகூறி அதை வாங்கிச் சென்றுவிட்டாரே' என்றார். அதிர்ந்து போனேன்.

எனது நிலையை புரிந்துகொண்ட சூப்பர்வைசர், `அந்த மாணவரை எனக்கு அடையாளம் தெரியும். நாளை எப்படியாவது வாங்கித் தருகிறேன்' என்றார். உடனடியாக கல்லூரியின் முதல்வர் மற்றும் பி.எட். தேர்வுத்துறை கமிட்டியின் செயலாளர் ஆகியோரிடம் இது குறித்துப் புகார் செய்தார். அப்போதே அந்த மாணவரின் பெயர், அவர் படிக்கும் கல்லூரி போன்ற அனைத்து தகவல்களையும் கண்டுபிடித்து ரகசியமாக வைத்துக் கொண்டார்கள்.

நான் அன்று இரவு முழுவதும் எனது நண்பர்களின் செல்போன்கள் மூலம், எனது செல்போன் நம்பருக்கு பலமுறை தொடர்பு கொண்டேன். `ஸ்விட்ச் ஆப்' செய்யப்பட்டிருப்பதாகவே எனக்குத் தகவல் கிடைத்தது.

மறுநாள் காலையிலும் அதே அறையிலே தேர்வு நடைபெற்றது. எனது செல்போனை எடுத்துச் சென்ற மாணவரும் பரீட்சை எழுத வந்தார். முதல் நாள் வந்த அதே சூப்பர்வைசரே, எனது ஹாலுக்கு `விஜிலன்ஸ் ஆபீசராக' வந்தார். முன்பே புகார் கொடுத்து இருந்ததன் அடிப்படையில், இந்த ஏற்பாட்டை `எக்ஸாம் கமிட்டியினர்' சிறப்பாக செய்திருந்தார்கள். அந்த மாணவரை தனியே அழைத்துச் சென்று விசாரித்தார்கள்.

முதலில் அந்த மாணவர் உண்மையை ஒப்புக்கொள்ளவில்லை. உண்மையைக் கூறாவிடில், மேற்கொண்டு எந்த பரீட்சையும் எழுத முடியாமல் போய் விடும் என்றும், அவருடைய கல்லூரிக்கு தகவல் தெரிவித்து அவர் மேல் கடுமையான நடவடிக்கை எடுக்க நேரிடும் என்றும் எக்ஸாம் கமிட்டியினர் மிரட்டிய பிறகே, அந்த மாணவர் உண்மையை ஒப்புக்கொண்டார். எனது செல்போனை தனது நண்பனிடமிருந்து வாங்கிக் கொடுத்தார். எல்லோர் முன்னிலையிலும் அந்த மாணவர் என்னிடம் மன்னிப்பு கேட்டார்.

எனது செல்போன் திரும்பக் கிடைத்த மகிழ்ச்சி ஒரு பக்கம் இருந்தாலும், அடுத்த தலைமுறையினருக்கு நல்ல ஒழுக்கங்களை கற்றுத்தர வேண்டிய ஆசிரிய பயிற்சி மாணவரே இப்படி செயல்பட்டதை நினைத்து வேதனைப்பட்டேன்.

-தமிழ்நிலவன், மதுரை.