58 கிராமங்களைத் தத்தெடுத்த தமிழக போலீஸ்

by **சிவா** Tue Jan 18, 2011 8:40 pm

ஆந்திர நக்சலைட்கள் தமிழக எல்லையோரம் உள்ள கிராமங்களை குறிவைத்து இயங்கப் போவதாக ஒரு தகவல் கசிந்தது. அந்த 58 கிராமங்களும் நக்சலைட்களின் பிடிக்குள் போவதற்குள் டி.ஜி.பி. லத்திகாசரண் அந்த கிராமங்களைத் தத்தெடுத்து, மக்களின் அனைத்து அடிப்படைத் தேவைகளையும் பூர்த்தி செய்ய ஆரம்பித்துவிட்டார் என்ற செய்தி பலரை சபாஷ் போட வைத்திருக்கிறது.

நக்சலைட் வலையில் விழாதீர்கள். உங்கள் தேவைகளை நாங்கள் நிறைவேற்றி வைக்கிறோம் என்று லத்திகாசரண் சந்தித்து பேசிக் கொண்டிருந்த மேல் பூங்குருத்தி கிராமத்திற்கு நாமும் சென்றோம். கவர்ன்மெண்ட் வேலை என்றால் என்ன என்றே தெரியாத அந்த கிராமத்தில் +2 வரை படித்திருந்த கிருஷ்ணமூர்த்தி, சில ஆண்டுகளுக்கு முன்பு பக்கத்திலிருக்கும் இந்த மலைகளில்தான் ஆந்திர நக்சலைட்கள் தங்கி இருந்தார்களாம். அவர்கள் எங்கள் ஊரைப்போல் உள்ள எல்லையோர கிராமத்து இளைஞர்களை, பேசிப் பேசியே மயக்கி தங்கள் இயக்கங்களில் சேர்த்து வந்தார்களாம். எந்த அடிப்படை வசதியும் வேலையும் வருமானமும் இல்லாதவர்கள் அவர்களின் பின்னால் சென்ற சம்பவங்கள் நிறைய உண்டு. இப்போதும் அப்படித்தான் அவர்கள் குறி வைத்து இயங்கப் போவதாகச் சொல்கிறார்கள். ஆனால் இம்முறை தமிழக காவல்துறையினர் முந்திக் கொண்டு, எங்கள் ஊருக்கு வந்து எங்கள் ஒவ்வொருவரின் பிரச்னைகளையும் தனித்தனியாக கேட்டனர். டி.ஜி.பி. லத்திகாசரண் நேரடியாக இங்கு வந்தார். குடிநீர் வசதி, ரோடு வசதி, பஸ் வசதி, பள்ளிக்கூட வசதி போன்றவை உடனே செய்யப்படும் என்று செயலிலும் இறங்கிவிட்டார். நிறைய பேருக்குத் தொழில் தொடங்க லோன் கொடுத்தார்.

வேலையும் வருமானமும் இல்லாததால்தான் அப்பாவிக் கிராம மக்கள் நக்சல் இயக்கத்தில் சேர்கிறார்கள். அடிப்படை வசதியில்லாதவர்களைத்தான் நக்சல் இயக்கத்தினர் குறிவைத்து சேர்க்கிறார்கள். அதனால், இப்போது அடிப்படை வசதியும் வேலையும் தருவதாக அரசாங்கமே உறுதி அளித்தபிறகு யாரும் நக்சல் இயக்கத்தில் சேரமாட்டார்கள். வறுமையிலும் விரக்தியிலும் குமுறிக் கொண்டிருந்த எங்கள் கிராமம் தற்போதுதான் நிம்மதியடைந்து வருகிறது. ஆந்திராவில் இருந்து யார் வந்து பேசினாலும் அவர்களைப் பிடித்து வைத்துக்கொண்டு போலீஸில் சொல்லுவோம் என்றார்.

கிராமங்களைத் தத்தெடுக்கும் திட்டத்தை முன்னின்று செய்த ஐ.ஜி. சிவனாண்டியிடம் பேசினோம்: இது முன்னெச்சரிக்கை நடவடிக்கை. உங்கள் ஊரில் அடிப்படை வசதியில்லை, வேலையில்லை, வருமானமும் இல்லை. அதனால் வாருங்கள் ஒன்று சேர்ந்து போராடுவோம் என்று இளைஞர்களை மூளைச் சலவை செய்துதான் நக்சலைட் இயக்கத்திற்கு ஆள் சேர்க்கிறார்கள். இதைத் தடுக்கத்தான் கிருஷ்ணகிரி மாவட்டத்தில் ஆந்திர எல்லையோரம் 58 கிராமங்களைத் தத்தெடுத்தோம். அடையாளம் தெரியாதவர்கள் தந்தாலும் உடனடியாக எங்களுக்குத் தகவல் தரவேண்டும். தமிழக எல்லைக்குள் நக்சலைட் யாரும் நுழைந்துவிடாதபடி எங்களோடு நல்ல ஒத்துழைப்புத் தருகிறார்கள் என்றார்.

சபாஷ் தமிழக போலீஸ்!

- அரவிந்த்