தேசிய சேவை முகாமில் சீக்கிய இளைஞரின் தலைமுடி வெட்டப்பட்டது

தேசிய சேவையில் பங்கேற்றிருந்த ஒரு சீக்கிய இளைஞன் கடந்த ஞாயிற்றுக்கிழமை படுக்கையிலிருந்து விழித்தெழுந்து அவருடைய இரண்டரை அடி நீளமுள்ள தலைமுடி வெட்டப்பட்டிருந்ததை அறிந்த பின்னர் அந்த இளைஞரின் பெற்றோர்கள் அதனால் சீற்றம் அடைந்துள்ளனர்.

சீக்கிய மத கோட்பாட்டின்படி தலைமுடியை வெட்டிக்கொள்வது தடை செய்யப்பட்டுள்ளது.

தானும் தமது மனைவியும் மிகுந்த கலவரமடைந்துள்ளதாகவும் தங்களுடைய மகன் அந்தப் பயிற்சியில் தொடர்ந்து கலந்துகொள்வதை அனுமதிக்கப்போவதில்லை என்று சுரிந்தர்பால் சிங், 47, கூறினார்.

“இச்சம்பவத்திற்குப் பிறகு அவன் மிகுந்த அதிர்ச்சிக்குள்ளாகியிருக்கிறான். நாளை, இன்னும் மோசமான சம்பவங்கள் நடக்கலாம்”, என்று சுரிந்தர்பால் மலேசியாகினி தொடர்பு கொண்டபோது கூறினார்.

அந்த இளைஞர், பெற்றோர்கள் அவனது பெயரைக் கூற விரும்பவில்லை, கடந்த சனிக்கிழமை நடந்த நீண்ட நேர பயிற்சிக்குப்பின் அன்றிரவு அயர்ந்து தூங்கியிருக்கிறார்.

அடுத்த நாள் காலையில் எழுந்த பின்னர் தலைமுடியைச் சீவும்போது ஏதோ அசம்பாவிதம் நடந்துள்ளதை உணர்ந்ததாகவும் அதன் பின்னர் உடனடியாக காலை மணி 6.30 அளவில் தமது பெற்றோர்களுடன் தொடர்பு கொண்டதாக அந்த இளைஞர் தமது போலீஸ் புகாரில் கூறியுள்ளார்.

இதற்கு யார் பொறுப்பு என்று அந்த இளைஞருக்குத் தெரியவில்லை. வெட்டப்பட்ட முடியோ, வெட்டுவதற்கு பயன்படுத்தப்பட்ட கத்தியோ காணப்படவில்லை.

முகாமிற்கு திரும்பப் போவதில்லை

தாமும் தனது மனைவியும் உடனடியாக பினாங்கு, சுங்கை பாக்காப், செரி இம்பியான் பயிற்சி முகாமிற்கு சென்றதாக சுரிந்தர்பால் கூறினார்.

முகாமில் சுமார் ஒரு மணி நேரம் காத்திருந்த பின்னர் முகாமின் தலைவரை சந்தித்தாக அவர் கூறினார்.

அச்சந்திப்பின்போது, பயிற்சி பெறும் இளைஞர்கள் கத்தரிக்கோல் மற்றும் நகவெட்டி போன்றவை வைத்திருப்பதற்கு அனுமதிக்கப்படுவதில்லை. ஆனால், வார இறுதி நாள்களில் அவர்களைக் காண வரும் பெற்றோர்கள் கொண்டுவந்திருக்கலாம் என்று அம்முகாமின் தலைவர் கோடிகாட்டியுள்ளார்.

பின்னர், இச்சம்பவம் குறித்து விசாரிக்கப்படும் என்று கூறிய அவர், அந்த இளைஞருக்கு ஜனவரி 23 ஆம் தேதி வரையில் விடுப்பில் செல்வதற்கு அனுமதித்தார்.

தனது மகனுக்கு ஏற்பட்டுள்ள இக்கொடிய சோதனைக்குப் பின்னர், அதிகாரிகள் தனது மகனின் மற்றும் பயிற்சி பெறும் இதரின் பாதுகாப்புக்கு உத்தரவாதம் அளித்தாலன்றி தனது மகனை பயிற்சிக்குப் போக அனுமதிக்கப்போவதில்லை என்று சுரிந்தர்பால் கூறினார்.

“அவர்களின்( முகாம் அதிகாரிகள்) மீது எனக்கு நம்பிக்கை இல்லை. என் மகனுக்கு மேலும் ஆபத்துகள் ஏற்படலாம் என்று அஞ்சுகிறேன்…எனது மகன் அவனது முடியை 18 ஆண்டுகள் வைத்திருந்தான். இரண்டே வாரத்தில், எல்லாம் போய் விட்டது.

“அவன் அதிர்ச்சி அடைந்துள்ளான். நாங்களும் பெற்றோர்கள் என்ற முறையில் அதிர்ச்சி அடைந்துள்ளோம். நாங்கள் இப்போது சிக்கலான நிலையில் இருக்கிறோம். இன்று இது என் மகனுக்கு நடந்துள்ளது. மற்ற சமயத்தைச் சேர்ந்த இதர இளஞர்களுக்கும் ஏற்படலாம். பயிற்சி முகாம்கள் பாதுகாப்பானவை என்று பெற்றோர்களுக்கு பயிற்சி முகாம்களின் அதிகாரிகள் உறுதியளிக்க முடியுமா?”, அவர் வினவினார்.

“தனிமைப்படுத்தப்பட்ட சம்பவம்”

அந்த இளைஞர் ஜனவரி 16 இல் போலீஸ் புகார் செய்தார். இம்மாதிரியான சம்பவங்கள் “குறும்புத்தனமான இளைஞர்கள்” செய்யும் “சகஜமானவை” என்று முகாம் தலைவர் கூரியதாக அந்தப் புகாரில் கூறப்பட்டுள்ளது.

“ஜனவரி 23 இல் நான் மீண்டும் பயிற்சியில் கலந்து கொள்ள வேண்டும். ஆனால், நான் பயிற்சியைத் தொடர விரும்பவில்லை. இது எனக்கு திருப்தி அளிக்கவில்லை ஏனென்றால் இது சமயம் சம்பந்தப்பட்டது.

“நான் சட்ட நடவடிக்கை எடுக்க விரும்புகிறேன். இந்த விவகாரம் முழுமையாக புலன்விசாரணை செய்யப்பட வேண்டும்”, என்று அந்தப் புகாரில் கூறப்பட்டிருந்ததை வாசித்தார். அதன் நகல் ஒன்று மலேசியாகினிக்கு கொடுக்கப்பட்டது.

மலேசியாஇன்று!http://www.malaysiaindru.com/?p=64088