பாஸ்: “நல்ல மாட்டுக்கு ஒரு சூடு”

கிளந்தான் மாநில அரசாங்கம் ஒரு கட்டத்தில் ஹுடுட் சட்டத்தை அமலாக்குவதற்கு எதிராக முடிவு செய்தது என அதன் மந்திரி புசார் நிக் அப்துல் அஜீஸ் நிக் மாட் கூறியிருக்கிறார்.

1977ல் அவசர காலத்தைப் பிரகடனம் செய்து மாநிலத்தை எடுத்துக் கொண்டது போன்ற நடவடிக்கையை கூட்டரசு அரசாங்கம் மீண்டும் எடுக்கக் கூடும் என்ற அச்சம் அதற்குக் கரணமாகும்.

அத்துடன் பாஸ் அரசாங்கம் அதனைச் செய்திருந்தால் மற்ற இஸ்லாமியப் போதனைகளையும் நடைமுறைகளையும் அறிமுகம் செய்வதற்கு தடை ஏற்பட்டிருக்கும் எனவும் அவர் சொன்னார்.

அத்தகைய அபாயங்களை எதிர் கொள்ளும் போது, தன்னைப் பின்பற்றுகின்றவர்கள் தங்களால் முடிந்த நல்லதைச் செய்ய வேண்டும் என்று இஸ்லாம் போதிக்கிறது என அவர் குறிப்பிட்டார்.

பாஸ் அரசாங்கம் எத்தகைய சூழ்நிலையை எதிர்நோக்கியது என்பதை அவர் தெளிவாக விளக்கவில்லை என்றாலும் முன்னாள் பிரதமர் டாக்டர் மகாதீர் முகமட் காலத்தில் “ஹுடுட்டை அமல் செய்ய வேண்டாம் என எங்களுக்கு எச்சரிக்கப்பட்டது” என்றார்.

“தேசிய நடவடிக்கை மன்றத்தின் வழியாக கடந்த காலத்தில் அவசரகால ஆட்சியை கிளந்தான் எதிர்நோக்கியதால் அது போன்ற நிகழ்வை மீண்டும் காண நாங்கள் விரும்பவில்லை. ஆகவே நாங்கள் அனைவரும் ஏற்றுக் கொள்ளத்தக்க வகையில் இஸ்லாமியச் சட்டங்களை மெதுவாக அறிமுகம் செய்ய நாங்கள் முடிவு செய்தோம்.”

“ஹுடுட் விவகாரம் காரணமாக கூட்டரசு தன்னைத் தாக்குவதற்கு அனுமதித்திருந்தால் அது தவறான நடவடிக்கையாக அமைந்திருக்கும்,” என வலைப்பதிவாளர்களுடன் நடத்திய சந்திப்பில் நிக் அஜீஸ் கூறினார்.

1973ம் ஆண்டு பாஸ் பிஎன் கூட்டணியில் இணைந்து அம்னோவுக்கு கூட்டாளி ஆகியது.

ஆனால் பாஸ் தலைவர்களுக்கும் பிஎன் தலைமையிலான அரசாங்கத்துக்கும் இடையில் உறவுகள் மோசமடைந்தன. கூட்டரசு அரசாங்கம் கிளந்தான் மந்திரி புசாராக நியமித்த முகமட் நாசிர் அதே ஆண்டு தமது கட்சியால் நீக்கப்பட்டார்.

அதனைத் தொடர்ந்து கிளந்தானில் நெருக்கடி முற்றியது. நாசிர், மாநிலச் சட்டமன்றத்தைக் கலைத்தார். கூட்டரசு அரசாங்கம் கிளந்தானில் அவசர காலத்தைப் பிரகடனம் செய்தது. அதற்குப் பின்னர் 12 ஆண்டுகளுக்கு பிஎன் கிளந்தானை ஆட்சி செய்தது. 1990ம் ஆண்டு மீண்டும் அங்கு ஆட்சியை பாஸ் கைப்பற்றியது.

மெதுவாகவும் சீராகவும் மேற்கொள்ளப்பட்டன

இஸ்லாத்தைப் பரப்புவது விவேகமாக செய்யப்பட வேண்டும் என்றும் நிக் அஜீஸ் சொன்னார்.

அந்த வகையில் ஹுடுட் சட்டத்தை அது அமலாக்கியிருந்தால் இஸ்லாம் மீது பொது மக்களுக்கு விளக்குவதற்கான நல்ல வாய்ப்பை இழந்திருக்கும் என்றார் அவர்.

அதே வேளையில் இஸ்லாமிய சீர்திருத்தங்களை மெதுவாகவும் சீராகவும் அறிமுகம் செய்ததின் மூலம் பாஸ் ஆட்சியை ஏற்றுக் கொள்வதற்குத் தயங்கிய முஸ்லிம் அல்லாதவர்கள் கூட அதனை பின்னர் ஏற்றுக் கொள்ளத் தொடங்கியதாக நிக் அஜீஸ் சொன்னார்.

மக்கள் நம்பிக்கையைப் பெறுவதே மிக் முக்கியம் என்று அவர் குறிபிட்டார்.

கிளந்தானிலும் மற்ற இடங்களிலும் பாஸ் கட்சியை முஸ்லிம் அல்லாதவர்கள் ஏற்றுக் கொண்டதால் பல இடங்களில் அது வெற்றி கண்டது. மக்கள் நம்பிக்கையையும் பெற்றது.

பக்காத்தான் ராக்யாட் கூட்டணியில் உள்ள டிஎபி கூட இஸ்லாம் பற்றி அதிகம் தெரிந்து கொள்ள முனைந்திருப்பதற்கு கட்சி கடைப்பிடிக்கும் திறந்த கொள்கையே காரணம் எனவும் நிக் அஜீஸ் சொன்னார்.

மலேசியாஇன்று!http://www.malaysiaindru.com/?p=63702