மலேசியா பத்துமலை முருகன் திருத்தலத்தில் கேளிக்கை சந்தை நடத்துவதற்கு அனுமதி மறுக்கப்பட்டுள்ளது

கடந்த ஆண்டுகளில் தைப்பூச விழா காலத்தில் பத்துமலை முருகன் திருத்தலத்தில் கேளிக்கை சந்தை மற்றும் பந்தயம் கட்டி சூதாட்ட விளயாட்டுகள் நடப்பது வழக்கமாக இருந்து வந்துள்ளது. நாளை பத்துமலையில் தொடங்கவிருக்கும் தைப்பூச விழாவில் அவ்வாறான கேளிக்கை மற்றும் சூதாட்ட விளையாட்டுகளுக்கு அனுமதி மறுக்கப்பட்டுள்ளது.
செலயாங் நகராண்மைக் கழகம் கேளிக்கை சந்தை மற்றும் பந்தயம் கட்டி விளையாடும் சூதாட்ட நிகழ்ச்சிகளுக்கு அனுமதி (பெர்மிட்) வழங்குவதில்லை என்று தீர்மானித்துள்ளது. இவ்விவகாரம் குறித்து அக்கழகத்தின் லைசென்ஸ் வழங்கும் குழு கடந்த வாரம் இம்முடிவை எடுத்ததாக கூறப்படுகிறது.
இம்முடிவை செலயாங் நகராண்மைக் கழகத்தின் உரிமங்கள் வழங்கும் இலாகாவின் இயக்குனர் முகமட் எபெண்டி பத்துமலை கோயில் நிர்வாகக் குழுவுக்கு கடிதம் மூலமாக கடந்த வாரம் தெரிவித்துள்ளார்.
இன்று பிற்பகல் மணி 3.00 க்கு நகராண்மைக் கழகத்தின் அமலாக்க அதிகாரிகள் பத்துமலை கோயில் வளாகத்திற்குச் சென்று அங்குள்ள நிலவரத்தைக் கவனிப்பர். அனுமதி மறுக்கப்பட்ட நடவடிக்கைகள் ஏதேனும் மேற்கொள்ளப்படுமானால், சம்பந்தப்பட்டவர்கள் மீது நடவடிக்கை எடுக்கப்படும்.
பத்துமலை முருகன் திருத்தலத்தில் கேளிக்கை சந்தைகள் போன்ற நிகழ்ச்சிகள் பல்லாண்டுகளாக அனுமதிக்கப்பட்டுள்ளபோதிலும், வழிபாட்டுத்தலம் ஒன்றில் கேளிக்கை சந்தைகள், பந்தயம் கட்டி விளையாடும் சூதாட்டங்கள் போன்றவை நடைபெற அனுமதிப்பது முறையல்ல என்ற கருத்து வலியுறுத்தப்பட்டு வருகிறது.
ஓரு வழிபாட்டுத்தலம் கேளிக்கைத் தளமாகவும் சுற்றுப்பயணிகளைக் கவருவதற்கான இடமாகவும் மாற்றப்படும்சாத்தியம் இருப்பதால், கேளிக்கை சந்தைகள் போன்ற நிகழ்ச்சிகள் பத்துமலை வளாகத்தில் தைப்பூச விழா காலத்தில் அனுமதிக்கப்படுவது நிறுத்தப்பட வேண்டும் என்பது பக்தர்களின் பொதுவான கருத்தாக இருக்கிறது.
கேளிக்கை சந்தைகளில் அமைக்கப்படும் ராட்டினம் மற்றும் வேலமாகச் சுற்றி வரும் வண்டிகள் எந்த அளவிற்கு பாதுகாப்பானவை என்ற கேள்வியும் எழுப்பப்படுகிறது.
தைப்பூச விழாவிற்கு வரும் இளைஞர்கள் பந்தயம் கட்டி விளையாடும் சூதாட்டத்தால் கவரப்படுகின்றனர். அது அவர்களுக்கு தவறானதாகத் தெரியவில்லை. “வழிப்பாட்டு தலத்தில் பகிரங்கமாக நடைபெறும் இந்த மாதிரியான விளையாட்டு எப்படி தவறானதாகும்”, என்று கேட்கும் இளைஞர்கள் இருக்கிறார்கள். மேலும், தவறு என்றால் கோயில் நிருவாகம் அதை ஏன் அனுமதிக்கிறது என்ற கேள்வியும் எழுப்பப்படுகிறது.
கேளிக்கை சந்தைகள் பத்துமலை தைப்பூச விழாவில் பங்கேற்க வருபவர்களுக்கு மிகுந்த அசௌகரியத்தை உண்டாக்குகிறது. குறுகிய இடத்தில் அவை நடைபெறுவதால், ஏதேனும் ஆபத்து ஏற்பட்டால் அது அங்கு குழுமியுள்ள மக்களுக்கு பேராபத்தை விளைவிக்கும் என்பதை கோயில் நிருவாகம் கவனத்தில் கொள்ள வேண்டும் என்று கூறப்படுகிறது.
“பத்துமலை திருத்தல வளாகத்தில் சூதாட்டம், மதுபானம் போன்றவற்றுக்கு இடம் அளிக்கவே கூடாது”, என்று மலேசிய இந்து சங்கத்தின் முன்னாள் தலைவர் எ.வைத்திலிங்கம் தொடர்பு கொண்டபோது கூறினார்.
'மலேசியா இன்று'