ரத்த சரித்திரம் நிஜ ஹீரோ படுகொலை - ஆந்திராவில் பதட்டம்!

ரபீக் · ரபீக் Tue Jan 04, 2011 4:29 pm

ஆந்திராவை சேர்ந்த மெட்டலசெருவு சூரிய நாராயண ரெட்டி என்ற சூரி நேற்று மதியம் தனது வழக்கறிஞரை சந்தித்து விட்டு திரும்பும் வழியில் நவோதயா காலனியருகே வைத்து துப்பாக்கியால் சுடப் பட்டுள்ளார். ரத்த வெள்ளத்தில் மிதந்த சூரிய நாராயண ரெட்டியை அவரது டிரைவர் ஜூப்ளிஹில்ஸ் அப்பல்லோ மருத்துவமனையில் சேர்த்துள்ளார். தீவிர சிகிச்சை அளித்தும் பலனளிக்காத சூரிய நாராயண ரெட்டி நேற்று இரவு 7.30 மணியளவில் உயிரிழந்தார்.

இந்தப் படுகொலை குறித்து தெரிவித்த சூரிய நாராயண ரெட்டியின் சகோதரர் சுதிர் ரெட்டி, தனது சகோதரர் சூரி அவரது டிரைவர் மற்றும் சூரியின் உதவியாளர் பானு கிரண் மூவரும் மட்டுமே காரில் சென்றதாக தெரிவித்துள்ளார். சூரியின் உதவியாளர் பானு கிரனே சூரியை சுட்டதாக தெரிவித்துள்ளார் சூரியின் கார் டிரைவர்.

பரிதலா ரவியால் சூரியின் குடும்பத்தில் 7 பேர் ரேடியோ குண்டால் படுகொலை செய்யப் பட்ட பிறகு பழிக்குப் பழியாக பரிதலா ரவியும் படுகொலை செய்யப் பட்டார். இதன் காரணமாக இந்தப் படுகொலையில் பரிதலா ரவியின் ஆட்களுக்கும் தொடர்பு இருக்கலாம் என கருதப் படுகிறது.

இந்த படுகொலையை அடுத்து பரிதலா ரவியின் சொந்த ஊரான ஆனந்தப்பூரில் காவல்துறை பாதுகாப்பு பலப் படுத்தப் பட்டுள்ளது. பரிதலா ரவி கொலை வழக்கில் ஜாமீனில் வெளிவந்த சூரி பெங்களூரில் தங்கி இருந்து அவ்வப்போது வழக்குகளுக்காக மட்டுமே ஹைதராபாத் வந்து சென்றுள்ளார்.

தனது உண்மைக் கதையான ரத்த சரித்திரம் திரைப் படத்தையும் தனது ஆதரவாளர்கள் 200 பேர் புடை சூழ பெங்களூருவில் உள்ள தியேட்டரில் பார்த்துள்ளார் சூரி. தனிக் கட்சி ஆரம்பித்து கடப்பா நாடாளுமன்ற இடைத் தேர்தலில் போட்டியிடத் திட்டமிட்டு இருக்கும் ஜெகன் மோகன் ரெட்டிக்கும் இந்த படுகொலை கலக்கத்தை ஏற்படுத்தியுள்ளது.

இந்நேரம்