கார்ப்பரேஷன் பாங்கில் 575 கிளார்க் பணியிடங்கள்

by **சிவா** Sat 22 Aug 2009 - 14:49

பொதுத் துறை முன்னணி வங்கிகளில் ஒன்றான கார்ப்பரேஷன் பாங்க் நாடெங்குமுள்ள தனது கிளைகளுக்குத் தேவைப்படும் கிளார்க் பணியிடங்களை அறிவித்துள்ளது.

கர்நாடகா மாநிலம் மங்களூருவைத் தலைமையகமாகக் கொண்ட இந்த வங்கி சிறப்பான செயல்பாட்டிற்காக அறியப்படும் வங்கி என்பது குறிப்பிடத்தக்கது. மாநில வாரியாகக் காலியிடங்கள் அறிவிக்கப்பட்டுள்ளன. டில்லியில் 60 காலியிடங்களும் அரியானாவில் 50, கர்நாடகாவில் 100, கேரளாவில் 30, ம.பி.,யில் 55 மற்றும் பஞ்சாபில் 50 என காலியிடங்கள் பிரிக்கப்பட்டுள்ளன. மாநில வாரியாகவே காலியிடங்களுக்கு ஆள் எடுக்கப்படும். ஒரு மாநிலம் அல்லது யூனியன் பிரதேசத்திற்கு மட்டுமே ஒருவர் விண்ணப்பிக்க முடியும்.

தகுதிகள்: பட்டப்படிப்பு ஒன்றில் தேர்ச்சி பெற்றிருக்க வேண்டும். அல்லது பிளஸ் 2ல் குறைந்தது 55 சதவீதத்துடன் தேர்ச்சி பெற்றிருக்க வேண்டும். வயது 1.8.2009 அன்று 18 முதல் 29 வயதுக்குள் இருக்க வேண்டும். எஸ்.சி., எஸ்.டி., பிரிவினருக்கு 5 ஆண்டுகளும் ஓ.பி.சி., பிரிவினருக்கு 3 ஆண்டுகளும் வயது வரம்பில் தளர்வு தரப்படும்.

தேர்வு நாள்: இப்பணிக்கான தேர்வு நவம்பர் 29, 2009 அன்று நடத்தப்படும். தமிழ்நாட்டில் சென்னையில் மட்டுமே இதை எழுதலாம். எந்த மாநில காலியிடத்துக்கு விண்ணப்பிக்கிறீர்களோ அந்த மாநிலத்தில் உள்ள தேர்வு மையத்தில் மட்டுமே இதை எழுத முடியும். பிற மாநில காலியிடங்களுக்கு விண்ணப்பிக்கும் போது அந்த மாநில மொழியில் திறன் பெற்றிருக்க வேண்டும் என பொதுவாக எதிர்பார்க்கப்படுகிறது. ஆனால் கார்ப்பரேஷன் வங்கி இதைப் பற்றிக் குறிப்பிடவில்லை. எனவே பிற மாநில காலியிடங்களுக்கும் விண்ணப்பிக்க நினைப்பவர்கள் விண்ணப்பிக்கலாம்.

தேர்வுப் பகுதிகள்: போட்டித் தேர்வில் அப்ஜக்டிவ் பகுதியில் ரீசனிங் மற்றும் கணிதம் ஒரு பிரிவாகவும், கிளரிகல் ஆப்டிடியூட் ஒரு பிரிவாகவும் ஆங்கிலம் ஒரு பிரிவாகவும் இடம் பெறும். தனித்தனியாக ஒவ்வொன்றிலும் பாஸ் செய்வதுடன் ரேங்கிங்கிலும் வர வேண்டும். தவறான பதில்களுக்கு நெகடிவ் மதிப்பெண்கள் கழிக்கப்படும். எஸ்.சி., எஸ்.டி., மதச் சிறுபான்மையினருக்கும் முன்னாள் ராணுவத்தினருக்கும் தேர்வுக்கான இலவச சிறப்புப் பயிற்சி நடத்தப்படும் விபரங்களை வங்கியின் இணைய தளத்தில் பார்த்துக் கொள்ளலாம்.

விண்ணப்பிக்கும் முறை: இப் பணிக்கு ஆன்லைனில் மட்டுமே விண்ணப்பிக்கலாம். www.corpbank.com தளத்திற்குச் சென்று விண்ணப்பிக்க வேண்டும். முழு விபரங்களையும் இதே தளத்தில் பார்த்துக் கொள்ளலாம். இப்பணிக்கான விண்ணப்பக் கட்டணம் ரூ.200. எஸ்.சி., எஸ்.டி., பிரிவினருக்கு ரூ.50. கார்ப்பரேஷன் வங்கியின் கிளைகளில் அக்கவுண்ட் எண் 0377/இஅ/01/000695 ல் பணம் செலுத்தி ரசீதைப் பெறலாம். இப்படிப் பெறப்படும் ரசீதை பத்திரமாக வைத்துக் கொண்டு தான் ஆன்லைனில் விண்ணப்பிக்க வேண்டும். பிற முறைகளில் விண்ணப்பிக்க முடியாது. தற்போது பயன்பாட்டிலுள்ள இமெயில் முகவரி ஒன்றையும் பெற்றிருக்க வேண்டும்.

ஆன்லைனில் விண்ணப்பித்த பின் கிடைக்கும் பதிவுத் தாளை பிரிண்ட் செய்து எடுத்துக் கொண்டு தபால் மூலமாக ரசீதுடன் சேர்த்து அனுப்ப வேண்டும். ஆன்லைனில் 18.8.2009 முதல் 18.9.2009 வரை விண்ணப்பிக்கலாம். பிரிண்ட் அவுட்டில் ஒரு போட்டோ ஒட்டப்பட வேண்டும். பிரிண்ட் அவுட்டுடன் அனைத்து சான்றிதழ்களின் அட்டெஸ்டட் நகல்களும் அனுப்பப்பட வேண்டும். இது சாதாரண தபால் மூலமாக மட்டுமே அனுப்பப்பட வேண்டும்.

பிரிண்ட் அவுட், ரசீது மற்றும் சான்றிதழ்கள் அனுப்பும் முகவரி:

Corporation Bank, Post Box No. 7743, Borivali (West), Mumbai 400 092.

இவை சென்றடைய கடைசி நாள் செப்டம்பர் 25, 2009.