இரு கொரியாவில் அணு ஆயுத குறைப்பு மீண்டும் 6 நாடுகள் பேச வாய்ப்பில்லை

சியோல் : "இரு கொரிய நாடுகளுக்கிடையிலான அணு ஆயுதக் குறைப்பு விவகாரத்தை பேச்சு வார்த்தை மூலம் தீர்த்துக் கொள்ள முடியும்' என தென்கொரிய அதிபர் லீ மியுங் பாக் தெரிவித்துள்ளார். எனினும், மீண்டும் ஆறு நாடுகள் பேச்சு வார்த்தை துவங்கக் கூடிய சாத்தியம் குறைவு தான் என்று நிபுணர்கள் கூறியுள்ளனர். வடகொரியா, 2012க்குள் அணு ஆயுத வல்லரசாக வளரத் திட்டமிட்டுள்ளது. அதற்கு அடிப்படை தேவையான அணுகுண்டு தயாரிப்பதற்கு யுரேனியம் செறிவூட்டலில் அது தற்போது ஈடுபட்டு வருகிறது. ஏற்கனவே இரண்டு முறை அணுகுண்டு பரிசோதனை செய்த வடகொரியா, அடுத்தாண்டில் மூன்றாவது முறையும் அணுகுண்டு பரிசோதனையில் ஈடுபடப்போவதாக சமீபத்தில் தென்கொரியப் பத்திரிகை ஒன்று தெரிவித்திருந்தது.

இந்நிலையில், நேற்று தென்கொரிய வெளியுறவுக் கொள்கையை வெளியிட்டு பேசிய அந்நாட்டு அதிபர் லீ மியுங் பாக் கூறியதாவது: வடகொரியா தனது அணு ஆயுதங்களை அகற்றுவது குறித்த விவகாரத்தை, ஆறு நாடுகள் பேச்சு வார்த்தை மூலம் தீர்க்க முடியும் என்று நான் நம்புகிறேன். அதேநேரம், தென்கொரியா தனது போர் ஒத்திகைகளை கைவிடாது. கொரிய தீபகற்பத்தில் அமைதி நிலவுவது ஒன்று தான் முன்னேற்றத்திற்கு வழி. என்றாலும், அதை வெறும் ராஜதந்திர நடவடிக்கைகளால் மட்டும் சாதித்து விட முடியாது. வட மற்றும் தென்கொரியாக்களுக்கு இடையிலான பேச்சு வார்த்தை மூலம் அமைதியை நிலைநாட்டவும் முடியும். இவ்வாறு பாக் தெரிவித்துள்ளார்.

ஆறு நாடுகளின் நிலை: "ஆறு நாடுகள் பேச்சு வார்த்தையோ அல்லது இரு கொரிய நாடுகளுக்கிடையிலான பேச்சு வார்த்தையோ நடப்பதற்கு பெரும்பான்மையும் வாய்ப்பில்லை. அப்படி நடந்தாலும், வடகொரியாவின் அணு ஆயுதக் குறைப்பு என்பது அதில் இடம் பெறாது' என்று நிபுணர்கள் கூறுகின்றனர். இரு கொரிய நாடுகள், சீனா, ரஷ்யா, ஜப்பான் மற்றும் அமெரிக்கா ஆகிய ஆறு நாடுகள் இவ்விவகாரத்தை வெவ்வேறு கோணங்களில் இருந்து அணுகுகின்றன என்கின்றனர் அவர்கள். வடகொரியா, தனது அணு ஆயுதங்களை எவ்வழியிலாவது அதிகரிக்கவே முயல்கிறது. தென்கொரியா: தென்கொரியாவைப் பொருத்தவரை, முன் நிபந்தனைகளுடன் பேச்சு வார்த்தைக்கு சம்மதிக்க அது தயாராக உள்ளது. தனது யுரேனிய செறிவூட்டலை சர்வதேச விதிகளுக்கு கட்டுப்பட்டு வடகொரியா செய்ய வேண்டும் என்பது அந்த நிபந்தனைகளில் ஒன்று.

சீனா: வடகொரியாவுக்கு நெருங்கிய நட்பு நாடு மற்றும் நிதியுதவி அளிக்கும் நாடு என்ற வகையில், சீனாவும், பேச்சு வார்த்தையை வலியுறுத்தி வருகிறது. சர்வதேச அணுசக்தி ஏஜன்சி பிரதிநிதிகள், அணு உலைகளைப் பார்வையிட வடகொரியா அனுமதிக்க வேண்டும் என்றும் கூறுகிறது. ஆனால், தனக்கருகில் இன்னொரு அணு ஆயுத வல்லரசை அது விரும்பவில்லை. "வடகொரியா அழிந்தால், லட்சக்கணக்கான மக்கள் சீனாவுக்குள் அகதிகளாக வருவர். இரு கொரியாவும் இணையும். அதுவே நமக்கு நல்லது' என்று சீனா கருதுகிறது.

அமெரிக்கா: வடகொரியா தனது அணு ஆயுதங்களைக் குறைத்தால் ஒழிய பேச்சு வார்த்தைக்கு சாத்தியமே இல்லை என்று அமெரிக்கா கூறி வருகிறது. இவ்விவகாரத்தில் சீனா உறுதியான முடிவு எடுக்க வேண்டும் என்று கூறுகிறது. ஜனவரி 19ம் தேதி அமெரிக்காவுக்கு வர உள்ள சீன அதிபர் ஹூ ஜிண்டாவோ உடன் இது பற்றி பேச்சு வார்த்தை நடக்கும் என எதிர்பார்க்கப்படுகிறது.

ஜப்பான்: அமெரிக்க மற்றும் தென்கொரிய நாடுகளின் கருத்தையே ஜப்பானும் வழி மொழிகிறது. ஆனால், பேச்சு வார்த்தைக்கு இணங்கும்படி வடகொரியாவை வலியுறுத்துகிறது.

ரஷ்யா: முன் நிபந்தனை எதுவும் இல்லாமல் பேச்சு வார்த்தை நடக்க வேண்டும் என, ரஷ்யா கூறி வருகிறது. சீனாவைப் போலவே தனது எல்லைக்கருகில் ஒரு அணு ஆயுத வல்லரசு உருவாவதை ரஷ்யாவும் விரும்பவில்லை.

தினமலர்!