காப்பொன்று கா(ல்) ப்பொன்னில்

**T.N.Balasubramanian** · **T.N.Balasubramanian** Mon 20 Dec 2010 - 8:43

காப்பொன்று கா(ல்) ப்பொன்னில்

இரு கால்கள் உதைத்தப்போதும் உந்தன்
திருமுகம் கோணவில்லையே!
முற்றும் துறந்த ஞானியோ நீ?

நுரை ததும்பும் எச்சிலும் கக்கலும்,
வரையரை யின்றி உன் சட்டையில்.!
குறையேதும் காணா குணவானோ நீ!

முகக்கண்ணாடி கீழே விழுந்தாலும்,
நகக்குறிகள் முகத்தில் பதிந்தாலும்,
அகம் மகிழும் அஹிம்சாவாதியோ நீ!

இல்லையப்பா இல்லை ,
இதோர் பாட்டன்-பேரன் உறவு.
இலவசமாய் நீயும் பெற,
இன்னும் காலமுண்டு உனக்கு.

பிஞ்சுக் கால்கள் என்னைக் கொஞ்ச,
நெஞ்சம் நெகிழுதே பஞ்சு போன்று.
காப்புரிமை காலம் முழுதும் எனக்கே என்றால்,
காப்பொன்று கா(ல்) ப்பொன்னில் ,
கனமின்றி, கலை அழகுடன் செய்து,
காலில் பூட்டி, களித்திடுவேனே .

ரமணீயன்.