இலங்கை-பிரித்தானிய உறவில் பாரிய விரிசல்?

நிசாந்தன் · நிசாந்தன் Thu Dec 23, 2010 3:06 am

பிரித்தானிய பாதுகாப்புச் செயலர் லியாம் ஃபொக்சின் இலங்கைக்கான தனிப்பட்ட விஜயம் பிரித்தானிய அமைச்சர்கள் மற்றும் புலம்பெயர் தமிழர்களின் அழுத்தங்களால் இரத்தாகியுள்ள இந்நிலையில், ஜனாதிபதி மஹிந்த ராஜபக்ஷவின் இரண்டாவது பதவிப் பிரமாணத்தை அடுத்து பிரித்தானிய பிரதமர் டேவிட் கமரூன் இலங்கைக்கு அனுப்பிய கடிதத்திலுள்ள விடயங்களைப் பகிரங்கப்படுத்த இலங்கை மறுத்துள்ளது. கமரூனின் கடிதம் குறித்து, ஜனாதிபதி செயலகத்தில் இக்கடிதங்களைக் கையாளும் கொள்கை அமுலாக்கல் மற்றும் தகவல் பிரிவிடம் கேட்டபோது, தமக்கு இவ்வாறான எக்கடிதமும் கிடைக்கவில்லை என்றும், இதுகுறித்து வெளிவிவகார அமைச்சிடம் கேட்குமாறும் கூறியுள்ளது.

மேலும், பிரித்தானிய மகாராணியாரிடமிருந்து ஒரு கடிதம் வந்ததாகவும் அது ஊடகங்களுக்கு வழங்கப்பட்டுள்ளதாகவும் அப்பிரிவு தெரிவித்தது. பின்னர் இதுகுறித்து வெளிவிவகார அமைச்சின் பொதுமக்கள் தொடர்புப் பணிப்பாளர் பந்துல ஜயசேகரவைக் கேட்டபோது, அவர் உபசரணை பிரிவுத் தலைவர் ஏ.எல் ரட்ணபாலவிடம் கேட்கச் சொன்னார். ரடணபாலவோ கமரூனிடமிருந்து கடிதம் வந்ததை உறுதிப்படுத்தினார். ஆனால் அதைவெளியிட தனக்கு உரிமை இல்லையென்றும், பந்துல ஜயசேகரவிடம் மேற்கொண்டு பேசுமாறும் கூறினாராம். ஆனால் மீண்டும் ஜயசேகரவைத் தொடர்புகொண்ட போது, அப்படி ஒரு கடிதம் தனக்குக் கிடைக்கவில்லை என்று அவர் மறுத்துள்ளார்.

மேற்படி கடிதத்தில் மஹிந்தவுக்கு வாழ்த்துத் தெரிவிக்கப்பட்டதோடு, இலங்கை நல்லாட்சி குறித்து ஏராளமான ஆலோசனைகளும் வழங்கப்பட்டிருந்தன என்பது குறிப்பிடத்தக்கது. தற்போது மஹிந்தவின் ஒக்ஸ்போர்ட் விஜயம் தோல்வி கண்டமை, ஃபொக்சின் இலங்கை விஜயம் ரத்தாகியமை ஆகியவற்றைத் தொடர்ந்து இரு நாடுகளுக்கும் இடையிலான உறவில் விரிசல் தோன்றியுள்ள நிலையில் அக்கடிதம் குறித்தும் தெரிய வந்துள்ளது.

கொழும்பு வரவிருந்த ஃபொக்ஸ் சர்வதேச பாதுகாப்பு குறித்து உரை நிகழ்த்தவிருந்தார். இவ்விஜயம் தனிப்பட்டது என்றாலும் கூட, முதலில் வெளிவிவகார அமைச்சின் அனுமதி இவருக்குக் கிடைத்திருந்தது. ஆனால் பின்னர் அவ்வமைச்சின் ஆலோசனைகளுக்கு அமையவே விஜயம் ரத்தும் செய்யப்பட்டது. இவர் மட்டுமே லண்டன் சென்ற மஹிந்தவை அங்குவைத்துச் சந்தித்திருந்தவர் ஆவார். இதுவும் ஒரு தனிப்பட்ட விஜயமே.

மேலும், இவ்வார ஆரம்பத்தில் பதவிக்காலம் முடிந்துச் செல்லும் பிரித்தானிய உயர் ஸ்தானிகர் பீற்றர் ஹேய்ஸ் நாட்டிலிருந்து வெளியேறுவதற்கு சில மணித்தியாலங்களுக்கு முன்புவரை அவரைச் சந்திக்க மஹிந்த மறுத்தார். பின்னர் ஹேய்ஸ் புறப்படும் நாளன்று காலை உணவுக்கு அவரை மஹிந்த அழைத்திருந்தார்.

முன்னாள் ஜனாதிபதி பிரேமதாசவின் காலத்தில் இலங்கைக்கான பிரித்தானிய உயர் ஸ்தானிகர் டேவிட் கிளாட்ஸ்டோன் இலங்கை தேர்தல் விடயத்தில் தலையிட்டதன் காரணமாக ஒதுக்கி வைக்கப்பட்டவராக அறிவிக்கப்பட்ட பின்னர், இரு நாடுகளுக்கும் இடையிலான உறவில் மிக மோசமான நிலைமை இப்போதுதான் ஏற்பட்டுள்ளதாக ராஜதந்திர வட்டாரத் தகவல்கள் கூறுகின்றன.

இலங்கை-பிரித்தானிய உறவில் பாரிய விரிசல்?

இலங்கை-பிரித்தானிய உறவில் பாரிய விரிசல்?

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக