பல இலட்சம் ரூபா பெறுமதியான நகைகள் நல்லை கந்தன் இரதோற்சவத்தில் அபகரிப்பு

செரின் · செரின் Thu Aug 20, 2009 5:55 pm

வரலாற்றுச் சிறப்புமிக்க நல்லூர்க் கந்தசுவாமி கோவிலில் நேற்று நடைபெற்ற இரதோற்சவத்தில் கலந்துகொண்ட பக்தர்கள் பலருடைய பல இலட்சம் ரூபா பெறுமதியான தங்க நகைகள் திருடர்களால் அபகரிக்கப்பட்டுள்ளன.

இதில் 5 பெண்களுடைய தாலிக்கொடிகள் திருடர்களால் அறுத்துச் செல்லப்பட்டிருப்பதுடன், 7 பெண்கள் தமது பெறுமதிமிக்க தங்கச் சங்கிலிகளைத் திருடர்களிடம் பறிகொடுத்துள்ளனர்.

இந்தப் 12 பேரும் தமது பெறுமதிமிக்க நகைகள் திருடப்பட்டமை தொடர்பான விபரங்களை நல்லூரில் இந்து விடுதியில் இயங்கிய அலுவலகத்தில் பதிவு செய்திருக்கின்றனர்.

இந்தப் 12 பேரையும் தவிர மேலும் பல பக்தர்கள் அணிந்து வந்த பெறுமதி மிக்க தங்க நகைகள் திருடர்களால் அபகரிக்கப்பட்டுள்ளதாகவும் அவர்கள் இது தொடர்பாக மேற்படி அலுவலகத்தில் பதிவு செய்யவில்லையென்றும் தெரிவிக்கப்படுகிறது.

இவர்கள் அனைவருடைய தங்க நகைகளும் ஆலயத்தின் உள் வீதியில் வைத்தே திருடர்களால் அறுத்துச் செல்லப்பட்டிருக்கின்றன.

ஆலயத்தின் உள் வீதியிலும் வெளி வீதிகளிலும் பொலிஸார் சிவில் உடையில் கடமையாற்றிய போதிலும் திருடர்களில் எவருமே கைது செய்யப்படவில்லை. மிகச் சாதுரியமாகவே திருடர்கள் தமது கைவரிசையைக் காட்டியிருக்கின்றனர்.
தாலிக்கொடிகளைப் பறிகொடுத்தவர்கள் உட்பட நகைகளைப் பறிகொடுத்த பெண்கள் ஆலய வீதியில் அழுத வண்ணமிருந்தனர்.

இவற்றையடுத்து நகைகளை அணிந்து வந்த பெருமளவு பெண் பக்தர்கள் தமது கழுத்திலிருந்த நகைகளைக் கைகளால் பற்றிப் பிடித்த வண்ணமே ஆலய தரிசனத்தில் ஈடுபட்டதையும் அவதானிக்க முடிந்தது.
பெறுமதி மிக்க தங்க நகைகளை அணிந்து வரவேண்டாமென்று ஊடகங்கள் ஊடாக அறிவித்தல்கள் விடுக்கப்பட்ட போதும் அதைப் பலர் பொருட்படுத்தவில்லையென்றும் தெரிவிக்கப்படுகிறது.

இதேவேளை, தவற விடப்பட்ட இரண்டு கையடக்கத் தொலை பேசிகளும் பல அடையாள அட்டைகளும் பக்தர்களால் கண்டெடுக்கப்பட்டு மேற்படி அலுவலகத்தில் ஒப்படைக்கப்பட்டதாகவும் அது உரியவர்களிடம் ஒப்படைக்கப்பட்டுள்ளதாகவும் இந்த அலுவலக உத்தியோகத்தர்கள் தெரிவித்தனர்.

பல இலட்சம் ரூபா பெறுமதியான நகைகள் நல்லை கந்தன் இரதோற்சவத்தில் அபகரிப்பு

பல இலட்சம் ரூபா பெறுமதியான நகைகள் நல்லை கந்தன் இரதோற்சவத்தில் அபகரிப்பு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக