மூங்கில் பரிசல்களுக்கு ஆயுள் குறைவு: பைபர் பரிசல்களுக்கு மாறும் மீனவர்கள்

மேட்டூர்: மூங்கில் பரிசல்களுக்கு ஆயுள் குறைவாக இருப்பதாலும், மேற்பரப்பில் பூசும் தார் கலவைக்கு தட்டுப்பாடு ஏற்பட்டுள்ளதாலும் மேட்டூர் அணையில் பைபர் பரிசல்கள் உபயோகிக்கும் மீனவர்கள் எண்ணிக்கை அதிகரித்துள்ளது. மேட்டூர் அணையில் மீன்துறை உரிமம் பெற்ற இரண்டாயிரம் மீனவர்கள் மீன் பிடிக்கின்றனர். கடந்த 50 ஆண்டாக மீனவர்கள் அணைக்கு மூங்கில் பரிசல்களில் சென்றே மீன் பிடித்தனர். மூங்கில்களை வளைத்து கட்டி, உர சாக்குகளை மேற்பகுதியில் கட்டி, தண்ணீர் புகாமல் இருக்க சாக்கு மேல் தார் கலவை பூசி பரிசல்கள் தயாரிக்கப்படுகிறது.

பரிசல் தயாரிக்கும் தொழிலாளர்கள் பலர் அணை கரையோரத்தில் வசிக்கின்றனர். அவர்களிடம் 3,000 முதல் 5,000 ரூபாய் வரை கொடுத்து மீனவர்கள் பரிசல்கள் வாங்குகின்றனர். அணையில் பரிசலில் செல்லும்போது, வலைகள் மூங்கில் குச்சியில் சிக்குவதால் பரிசல் மட்டுமின்றி, வலைகளும் சேதமாகிறது. அதனால், ஆண்டுதோறும் மீனவர்கள் புதிதாக மூங்கில் பரிசல்கள் வாங்க வேண்டிய நிர்பந்தம் ஏற்பட்டது.

அதனை தவிர்க்க தற்போது மேட்டூர் அணை மீனவர்கள் பைபர் பரிசல்கள் பயன்படுத்த துவங்கியுள்ளனர். பச்சை, நீலம், சிவப்பு என பைபர் பரிசல்கள் பல்வேறு நிறத்தில் இருப்பதால் 50 ஆண்டாக கறுப்பு நிற பரிசல் உலா வந்த மேட்டூர் அணையில் தற்போது வண்ண, வண்ண பரிசல்கள் உலா வருகிறது.பைபர் பரிசல்கள் குறித்து மேட்டூர் அணை மீனவர்கள் கூறியதாவது: மூங்கில் பரிசல்களில் மேற்பரப்பில் பூசும் தார் விலை அதிகரித்து விட்டது. விலை அதிகமாக இருந்தாலும் எளிதில் கிடைப்பதில்லை. தற்போது சேலத்தில் பைபர் பரிசல் தயாரிக்கின்றனர்.

பைபர் பரிசல் வாங்கி அணைக்கு எடுத்து வர 9,000 முதல் 9,300 ரூபாய் வரை செலவாகிறது. மூன்று ஆண்டுகளுக்கும் அதிகமாக பைபர் பரிசல்கள் உழைக்கிறது. ஆர்டர் கொடுத்தால்தான் பரிசல் செய்து தருகின்றனர். பரிசல்கள் செய்யும் தொழிலாளர்கள் எண்ணிக்கை குறைவு, தார் தட்டுப்பாடு, குறைந்த ஆயுள் உள்பட பல்வேறு காரணங்களால் மூங்கில் பரிசல்களை உபயோகிக்கும் ஆர்வம் மீனவர்களிடம் குறைந்து விட்டது. தற்போது 100க்கும் மேற்பட்ட பைபர் பரிசல்கள் அணையில் பயன்படுத்தப்படுகிறது. இவ்வாறு அவர் கூறினார்.