முஸ்லிம் அல்லாத ஷாரியா வழக்குரைஞர்களுக்கான தடை: கட்டுப்படுத்தாது”

ஷாரியா நீதிமன்றங்களில் முஸ்லிம் அல்லாத வழக்குரைஞர்கள் வழக்காடுவதற்கு தேசிய பாத்வா மன்றம் விதித்துள்ள தடை, அது சட்ட ரீதியாக எந்தத் தாக்கத்தையும் ஏற்படுத்தாது. காரணம் இஸ்லாம் என்பது மாநில விவகாரமாக இருப்பதாகும்.

“ஆகவே அது மாநிலங்களைக் கட்டுப்படுத்தாது. அவை அந்த விஷயத்தை கவனிப்பதற்கு வேறு வழிகளைப் பின்பற்றக் கூடும்,,” பிரபலமான அரசமைப்புச் சட்ட நிபுணரான அப்துல் அஜீஸ் பேரி கூறுகிறார்.

அத்துடன் அந்தச் சட்டம் பிற்போக்கு சிந்தனையாகும். அது எந்த வகையிலும் ஷாரியா நீதிமன்றங்களின் நிலையை வலுப்படுத்தப் போவதில்லை என்றும் அப்துல் அஜீஸ் வாதாடினார்.

அவர் அனைத்துலக இஸ்லாமியப் பல்கலைக்கழகத்தில் விரிவுரையாளரும் ஆவார்.

“அது இஸ்லாத்தின் மனித நேய, அனைத்துலக நிலையைப் பிரதிபலிக்கவில்லை”, என்றும் அவர் சொன்னார். தேசிய பாத்வா மன்றம் அனைவரையும் அரவணைக்கும் கொள்கையை பின்பற்றியிருக்க வேண்டும் என அவர் கருதுகிறார்.

“முஸ்லிம் அல்லாத வழக்குரைஞர்களுக்கு இஸ்லாம் குறித்து போதுமான அறிவாற்றல் இருக்காது எனக் கூறுவது விவாதத்திற்குரிய விஷயம் ஆகும்.”

“அவர்களுக்குப் பட்டப் படிப்புக்குப் பிந்திய டிப்ளோமா பயிற்சிகளை வழங்குவதின் மூலம் அதனை சமாளிக்க முடியும். அனைத்துலக இஸ்லாமியப் பல்கலைக்கழகம் அதனை காலம் காலமாகச் செய்து வருகிறது”, என்றார் அப்துல் அஜீஸ்.

‘இஸ்லாத்தைப் பற்றியும் இஸ்லாமிய சட்டங்களைப் பற்றியும் ஏதும் தெரியாமல் இருந்தால் அது குறித்து கவலைப்படுவதில் நியாயமிருக்கிறது. அதே அம்சம் முஸ்லிம்களுக்கும் பொருந்தும். காரணம் எல்லா முஸ்லிம்களும் இஸ்லாத்தைப் பற்றிய அறிவு ஞானத்தைப் பெற்றவர்கள் அல்லர்.”

ஷாரியா வழக்குரைஞர்களாக முஸ்லிம் அல்லாதார் ஏற்றுக் கொள்ளப்படுவதற்கு அண்மையில் தேசிய பாத்வா மன்றம் தடை விதித்தது.

அந்த முடிவுக்கு பிரதமர் துறை அமைச்சர் ஜமில் கிர் பாஹாரோம் ஆதரவு தெரிவித்துள்ளார். அந்த முடிவு பொருத்தமானது என்றும் எல்லாத் தரப்புக்களும் அதனை ஏற்க வேண்டும் என்றும் அவர் சொன்னார்.

“ஷாரியா வழக்குரைஞராக இருப்பதற்கு ஒருவர் இஸ்லாம் பற்றி ஆழமான புரிந்துணர்வையும் அறிவாற்றலையும் பெற்றிருப்பது அவசியமாகும். அப்போதுதான் அவர் ஷாரியா வழக்குகளை முறையாக நடத்த முடியும்,” என்றும் ஜமில் கிர் குறிப்பிட்டார்.

முஸ்லிம் அல்லாதவர்கள் ஷாரியா வழக்குரைஞர்களாக தொழில் செய்ய அனுமதிக்கப்பட்டு, ஷாரியா நீதிமன்றத்தை அவமதித்திருப்பதாகக் கண்டு பிடிக்கப்பட்டால் அவர்கள் மீது நடவடிக்கை ஏதும் எடுக்க முடியாமல் போய் விடும். காரணம் ஷாரியா சட்டம் முஸ்லிம்களுக்கு மட்டுமே பொருந்தும் என்றும் அவர் சொன்னார்.

மலேசியாஇன்று!

ஷாரியா என்றால் என்ன தெரிந்தவர்கள் சொல்லவும் நன்றி!