தென்கொரியா மீது போர் தொடுப்போம்: வடகொரியா

வடகொரியாவுக்கும், தென் கொரியாவுக்கும் இடையே பல ஆண்டுகளாக கருத்து வேறுபாடு நிலவி வருகிறது. இதனால் இருநாடுகளுக்கும் இடையே அடிக்கடி பதட்டமான சூழ்நிலை நிலவி வருகிறது.

இந்த நிலையில் சமீபத்தில் தென்கொரியாவின் யான்பியாஸ் தீவு மீது வடகொரியாவின் கடற்படை பீரங்கி தாக்குதல் நடத்தியது.

அதற்கு பதிலடி கொடுக்கும் வகையில் தென் கொரியா ராணுவமும் வடகொரியாவை தாக்கியது. இதனால் அங்கு போர் பதட்ட சூழ்நிலை உருவானது. எனவே உலக நாடுகள் இதில் தலையிட்டு அமைதியை ஏற்படுத்தின.

இதற்கிடையே தென் கொரியாவுக்கு அமெரிக்கா ஆதரவு அளித்தது. தென் கொரியாவுடன் சேர்ந்து போர்ஒத்திகை நடத்தியது. இதனால் அங்கு மீண்டும் பதட்டம் அதிகரித்தது. இந்த நிலையில் கடலில் தட்வெப்ப நிலை சரியில்லாததால் போர் ஒத்திகை நிறுத்தப்பட்டது.

இதையடுத்து, மீண்டும் அமைதி நிலவிய நிலையில் மறுபடியும் போர் ஒத்திகையை தொடங்க தென்கொரியாவும், அமெரிக்காவும் முடிவு செய்துள்ளன. இது வடகொரியாவுக்கு ஆத்திரத்தை ஏற்படுத்தியுள்ளது.

போர் ஒத்திகை தொடரும் பட்சத்தில் தென்கொரியா மீது போர் தொடுப்போம் என வடகொரியா அறிவித்துள்ளது. இதனால் கொரிய தீபகற்பத்தில் பதட்டமான சூழ்நிலை நிலவுகிறது.

எனவே போர் ஒத்திகையை நிறுத்தி அமைதி ஏற்படுத்தும்படி தென் கொரியாவை ரஷியாவும், சீனாவும் வலியுறுத்தி வருகின்றன. மேலும் போர் பதட்டத்தை ஏற்படுத்த வேண்டாம் என வடகொரியா விடமும் கோரிக்கை விடுத்துள்ளன.

ஆனால் போர் ஒத்திகை தொடரும் என தென் கொரியா அறிவித்துள்ளது., எங்கள் நாட்டின் பாதுகாப் புக்காகதான் இதை நடத்துகிறோம். இப்பகுதியில் பதட்டத்தை ஏற்படுத்த வேண்டும் என்பதற்காக நடத்தவில்லை.

எனவே, தட்பவெப்ப நிலை சரியானதும் நாளையோ அல்லது நாளை மறு தினமோ மீண்டும் கூட்டு போர் ஒத்திகை தொடரும் என அறிவித்துள்ளது. இந்த தகவலை தென்கொரியாவின் வெளியுறவு துறை அமைச்சக செய்தி தொடர்பாளர் கிம்யங்-சன் தெரிவித்தார்.

ஆனால் வடகொரியாவோ தனது நிலையில் பிடிவாதமாக உள்ளது. இதை நாங்கள் எளிதாக எடுத்துக் கொள்ளப் போவதில்லை. போர் ஒத்திகை தொடர்ந்தால் தென் கொரியா மீது மீண்டும் தாக்குவோம் என்று அறிவித்துள்ளது.

நக்கீரன்