கோலாலம்பூரில் விலை உயர்வுகளுக்கு எதிரான இயக்கத்தை பாஸ் தொடக்கியுள்ளது

அண்மையில் அறிவிக்கப்பட்ட சீனி மற்றும் எண்ணெய் விலை ஏற்றங்களுக்கு எதிரான தனது இயக்கத்தின் முதல் கட்டமாக, இன்று மாலை கோலாலம்பூரில் 2,000 துண்டுப் பிரசுரங்களை பாஸ் விநியோகித்தது.

மாலை சுமார் 5.30 மணியளவில், மஸ்ஜிட் இந்தியாவில், கூட்டரசுப் பிரதேச மற்றும் சிலாங்கூர் பாஸ் இளைஞர்கள் கூடி, சோகோ விற்பனைத் தொகுதியை நோக்கிச் சென்று, மாலை மணி 6.15அளவில் தங்களது ஆட்சேப கூட்டத்தை தொடக்கினர்.

இதற்கு முன்னரே, சுமார் 12 போலீஸ் படையினர், மாலை மணி 4.15 வாக்கில் அந்த தொகுதிக்கு வெளியே நின்று கொண்டிருந்தனர்.

கூட்டரசுப் பிரதேச பாஸ் இளைஞர் தகவல் பிரிவுத் தலைவர் ஃபாடில் ஒஸ்மான் அவ்வியக்கத்துக்கும் துண்டுப் பிரசுர விநியோகத்துக்கும் தலைமை வகித்தார்.

கடந்த டிசம்பர் 3ஆம் திகதியன்று அறிவிக்கப்பட்ட பெட்ரோல், டீசல், எரிவாயு மற்றும் சீனி மீதான விலை உயர்வுகளை கூட்டரசு அரசாங்கம் மீட்டுக் கொள்ள வேண்டுமென தாங்கள் கேட்டுக் கொண்டதாக மலேசியாகினியிடம் ஃபாடில் கூறினார்.

தேமு அரசாங்கத்தின் உதவித் தொகை குறைப்புக்களை எதிர்க்கும்படி, பொது மக்களை அந்த துண்டுப் பிரசுரம் கேட்டுக் கொள்கிறது. இந்த குறைப்பினால், விலைகள் பொதுவாக 5 சென் உயர்ந்தன – எரிவாயு விலை 1.90 ரிங்கிட், சீனி 2.10ரிங்கிட், ரொன் 95 பெட்ரோல் 1.90ரிங்கிட் மற்றும் டீசல், 1.80 ரிங்கிட்.

இத்தகைய அதிகரிப்புகள், பொது பஸ்கள் போன்ற கூடுதல் போக்கு வரத்துச் செலவினங்களுக்கும் மற்றும் சுகாதாரச் செலவினங்களும் பள்ளிக் கட்டணங்களும் உயர்த்தப்படுவதற்கும் இட்டுச் செல்லும் என அவர் விளக்கினார்.

இன்றைய ஆட்சேபக் கூட்டத்தில் அதிக எண்ணிக்கையிலான உறுப்பினர்கள் கலந்து கொள்ளாதது குறித்தும் அவர் வருத்தம் தெரிவித்தார். ‘மற்ற வேலைகள்’ இருப்பதால் அவர்களால் கலந்து கொள்ள முடியவில்லை என்றாரவர்.

இன்றியமையாப் பொருட்களுக்கான விலைகளை உயர்த்துவதை நிறுத்தும்படி அரசாங்கத்தை கேட்டுக் கொள்ளும் ஆட்சேப பிரச்சாரங்களை பக்காத்தான் ராயாட் நடத்தியுள்ளது. இதே போன்ற விலை உயர்வுகள், கடந்த டிசம்பர் 9ஆம் திகதி அறிவிக்கப்பட்டன.

அதற்கு, மாணவர் தரப்புக்கள் உட்பட பல்வேறு தரப்புகள் கடும் கண்டனம் தெரிவித்தன. அவற்றை ரத்துச் செய்யும்படி கோரி, கடந்த டிசம்பர் 10ஆம் திகதி, மாணவர் குழுக்கள் மஸ்ஜிட் புத்ராஜெயாவில் திரண்டு, பிரதமர் துறையிடம் மகஜர் ஒன்றை சமர்பித்துள்ளன.

அந்த ஆட்சேபக் கூட்டத்தில் மூன்று மாணவர்கள் கைது செய்யப்பட்டு, பின்னர் விடுதலை செய்யப்பட்டனர்.



http://www.malaysiaindru.com