10 அடி ஆழ ஆற்றில் விழுந்த 2.5 வயது குழந்தை உயிர் பிழைத்த அதிசயம்

**krishnaamma** · **krishnaamma** Sat 18 Dec 2010 - 17:23

புனலூர்:வீட்டின் முன் நிறுத்திய காரில் விளையாடிக் கொண்டிருந்த இரண்டரை வயது குழந்தையுடன், கார் பின்னோக்கி நகர்ந்து, பத்தடி ஆழமுள்ள ஆற்றில் விழுந்தது. இவ்விபத்தில் காரில் இருந்த குழந்தை, அதிர்ஷ்டவசமாக சிறு காயங்களுடன் உயிர் பிழைத்தது.கேரள மாநிலம் கொல்லம் மாவட்டம், புனலூர் எம்.எல்.ஏ., சாலையைச் சேர்ந்தவர் மாத்யூ; இவரது மனைவி ஜிஜி. இவர்களது இரண்டரை வயது மகன் அல்பின், நேற்று முன்தினம் காலை 11 மணிக்கு, அவர்களது வீட்டுக்கு முன் நிறுத்தப்பட்டிருந்த காரில் விளையாடிக் கொண்டிருந்தான்.

கார் திடீரென, பின்னோக்கி நகரத் தொடங்கியது. வீட்டுக்குள் இருந்த மாத்யூ, இதைப் பார்த்து அலறிக் கொண்டே காரை நிறுத்த ஓடினார். அதற்குள் காரின் வேகம் அதிகரித்து, சாலையில் நின்றுகொண்டிருந்த பஸ்களின் பக்கவாட்டில் உரசிக் கொண்டே சென்றது. சிறிது நேரத்தில் சாலையை விட்டு விலகி, பக்கவாட்டில் இருந்த கடையின் சுவற்றை இடித்து, பத்தடி ஆழத்தில் இருந்த வெட்டிப்புழா ஆற்றில் விழுந்தது.அலறிக் கொண்டே ஓடி வந்த மாத்யூ, ஆற்றில் குதித்தார்.

அவரது அலறல் சத்தம் கேட்டு, அக்கம்பக்கத்தினரும் ஓடி வந்தனர். அதற்குள் கார், ஆற்று நீரில் தலைகீழாகக் கவிழ்ந்தது. காரின் அருகே வேகமாக சென்ற மாத்யூ, குழந்தைக்கு என்னவானதோ என்ற பதைபதைப்புடன், கதவை திறந்து உள்ளே பார்த்தார்.தன் அப்பாவைக் கண்டதும், நடந்த எதையும் அறியாமல், அப்போதும் காரில் விளையாடிக் கொண்டிருந்த குழந்தை, தன் சிறிய பற்களை காட்டி சிரித்தான். குழந்தையின் கை முட்டி, கால் விரலில் சிறிய காயங்கள் இருந்ததைத் தொடர்ந்து, சிகிச்சை அளிக்கப்பட்டு கண்காணிக்கப்படுகிறது.