தமிழீழம் எங்கள் தாய்திருநாடு சிறுவர் பாடல்

ஈழத் தமிழ் திருநாடு -அது
எங்கள் அழகிய தாய்திருநாடு
வானிற் பறந்தங்கு சென்றேன் -நானும்
ஆகா என்னவொரு அற்புதம்கண்டேன்

மாமாவின் வீட்டினைச் சுற்றி -பல
மாமரங் கண்டேன் மரக்கிளை தன்னில்
தாவிக் குரங்குகள் போலே -துள்ளி
ஏறிக்கிளைமீது தொங்கிக் களித்தோம்
தென்னை இளங்காய் பறித்து - நல்ல
தாகம்தணித் திளநீரும் குடித்தோம்
புன்னைமர நிழல்மீது - கூடிப்
போயிருந்தே பலபாடல் படித்தோம்

வாழைமரம் பலஉண்டு – அதில்
தேனிற் பழுத்தகனி கொய்துஉண்டேன்
ஆழக் கிணறதன் பக்கம் – அதில்
அள்ளித் தண்ணிரூற்றி ஆனந்தமானேன்
கோழி அடைத்த தோர்கூடு -அதில்
குஞ்சு பத்துப்பதி னாறெனக் கண்டேன்
பொத்திப் பிடிக்கவோர் குஞ்சை -கோழி
கொத்தவரவிட் டோடியே போனேன்

மாட்டு வண்டிகட்டி ஏறி -எங்கள்
மாரியம்மனுக்குப் பொங்கிப் படைத்தோம்
மேட்டுவழி கல்லுபாதை -அதன்
மீது கடகட என்று குதித்து
துள்ளி உருண்டது வண்டி- நாமும்
உள்ளே இருந்து குலுங்கிச் சிரித்தோம்
ஆக்கிப் பொங்கல் படைத்துண்டு -சில
காக்கை குருவிக்கும் போட்டுக் களித்தோம்

வேலி முளைத்த கொடியில் -சிறு
குண்டுமணி தேடிக் கையிலெடுத்தோம்
வாயில் கிளுவங்காய் மென்று -அது
மெல்லக் கசந்திட நீருண் டினித்தோம்
பூவரசம் இலை சுற்றி -அதில்
நாதசுரம் செய்து பீப்பீ இசைத்தோம்
பூமிவிழும் குரும்பட்டி - கையில்
கொண்டொரு தேர் செய்து சுற்றி இழுத்தோம்

பச்சை வயல்வெளி சென்றோம் – அங்கு
முற்றிவிளைந்த கதிரினைக் கண்டோம்
சுற்றி வரம்பில் நடந்து - சென்று
சோ என்றடிக்கும் காற்றினை உண்டோம்
வானப் பறவைகள் எங்கும் -சுற்றி
வட்டமிட்டுப் பறந்தே கூச்சல் போட
ஆனை முகத்துடையானின்- நல்ல
ஆலயம் ஒன்று அருகினில் கண்டேன்

டண் என்றொலித்தது கோவில்-மணி
நாதம் இடியெனகேட்டு கலங்கி
விண்ணில் எழுந்தனபட்சி - அவை
மீண்டும் மரக்கிளை சேரும் நற்காட்சி
மாடு பசுக்களின் கூட்டம் -அவை
மந்தை மந்தையாக வீடு திரும்பும்
ஓடிக்குலைத்தொரு நாயும் - அதை
வீணில் துரத்திப்பின் விட்டோடிச் செல்லும்

தாமரைப் பொய்கையும் கண்டோம்- குளிர்
தண்ணீரில் நீந்தி மலர் கொய்தெடுத்தோம்
போரடித்தே வைத்த வைக்கோல் -போரின்
மேலேபடுத்து நம்மேனி கடித்தோம்
ஆயிரம் இன்பங்கள் உண்டு -அவை
அத்தனையும் எங்கள் தாய்திருநாடு
பாவி எதிரிபுகுந்தான் - எப்போ
ஈழம் அமைத்து எம்வளம் காப்போம்?

விரைவில் அமையும் நண்பா..... அருமை

பிளேடு பக்கிரி wrote:விரைவில் அமையும் நண்பா..... அருமை

மீனா wrote:

பிளேடு பக்கிரி wrote:விரைவில் அமையும் நண்பா..... அருமை

அருமை ..............ஈழம் அமைத்து எம்வளம் காப்போம்? நிச்சயமாக ...

விரைவில் எதிர்பார்கிறோம்..அருமை அண்ணா..

காத்திருக்கிறோம்.

நறுந்தேனை நாவுண்டு வருமினிதுஎன்ன
கரும்பான கருதுவதை எழுத்தூட்டமிட்டு
இருந்தோரை எனதுமனம் குளிரஉளம்தொட்டு
தருமன்பு வாழ்த்துக்கள்! தளிர்தோங்கி வாழ்க1

அருமையான பாடல் வரிகள் அண்ணா!